പിഎസ്സി പരീക്ഷാ ക്രമക്കേടിൽ പിഎസ്സി ചെയർമാൻ എം.ആർ. ബൈജുവിനെയും മറ്റ് അംഗങ്ങളെയും പ്രതികളാക്കി പുതിയ കേസ് രജിസ്റ്റർ ചെയ്തു. ഫിഷറീസ് എക്സ്റ്റൻഷൻ ഓഫീസർ നിയമനത്തിൽ നടന്ന ക്രമക്കേടുമായി ബന്ധപ്പെട്ട് പ്രത്യേക അന്വേഷണ സംഘമാണ് (SIT) പുതിയ എഫ്ഐആർ രജിസ്റ്റർ ചെയ്തത്. തസ്തികയ്ക്ക് ആവശ്യമായ യോഗ്യതയില്ലാത്തവർക്ക് അധികാര ദുർവിനിയോഗത്തിലൂടെ നിയമനം നൽകിയെന്നാണ് എഫ്ഐആറിലെ പ്രധാന ആരോപണം.
കേരള മത്സ്യബന്ധന സമുദ്രഗവേഷണ സർവ്വകലാശാലയിൽ (കുഫോസ്) നിന്നുള്ള ഉദ്യോഗാർഥികളെ വഴിവിട്ട രീതിയിൽ റാങ്ക് പട്ടികയിൽ തിരുകിക്കയറ്റിയെന്നാണ് കേസിന്റെ അടിസ്ഥാനം. ഫിഷറീസ് സർവകലാശാലയിൽ നിന്നുള്ള ബിരുദമോ ബിരുദാനന്തര ബിരുദമോ അപേക്ഷിക്കാനുള്ള പ്രധാന യോഗ്യതയായിരിക്കെ, ഫലം വന്നപ്പോൾ റാങ്ക് പട്ടികയിൽ ഭൂരിഭാഗവും കുഫോസിൽ നിന്നുള്ളവരായിരുന്നു. എന്നാൽ യോഗ്യതയുള്ളവർ കൂടുതലായി അവിടെയുള്ളതിനാലാണ് അവർ പട്ടികയിൽ ഉൾപ്പെട്ടതെന്നും, അർഹരായവർ ലിസ്റ്റിൽ വന്നതിൽ അത്ഭുതപ്പെടാനില്ലെന്നുമാണ് ചോദ്യം ചെയ്യലിൽ പിഎസ്സി ചെയർമാൻ നൽകിയ വിശദീകരണം. തനിക്കെതിരായ ആരോപണങ്ങൾ അദ്ദേഹം പൂർണ്ണമായും നിഷേധിക്കുകയും ചെയ്തു.
പിഎസ്സിയുമായി ബന്ധപ്പെട്ട് 150 പരാതികൾ ലഭിച്ചതിൽ നാലെണ്ണത്തിലാണ് നിലവിൽ കേസെടുത്തിട്ടുള്ളതെന്ന് മുഖ്യമന്ത്രി നിയമസഭയെ അറിയിച്ചിട്ടുണ്ട്. ആസൂത്രണ ബോർഡ് ചീഫ് നിയമനക്കേസിൽ നേരത്തെ പിഎസ്സി ചെയർമാന്റെ മൊഴിയെടുത്ത എസ്‌ഐടി, പുതിയ കേസിന്റെ പശ്ചാത്തലത്തിൽ എം.ആർ. ബൈജുവിനെ വീണ്ടും ചോദ്യം ചെയ്യാനുള്ള തയ്യാറെടുപ്പിലാണ്.
