ചോദ്യങ്ങൾക്ക് 'വീട്ടിൽ പോയി ചോദിക്ക്' എന്ന് പറയുന്നയാൾ താനല്ല, പിണറായി പ്രസംഗിക്കുന്ന വേദിയിൽ ബാനർ ഉയർത്താൻ SFI ക്ക് ധൈര്യമുണ്ടോ ; റോജി എം. ജോൺ

കൊച്ചി: മഹാരാജാസ് കോളേജിലെ ബിരുദദാന ചടങ്ങിനിടെ ഉണ്ടായ എസ്.എഫ്.ഐ (SFI) പ്രതിഷേധത്തിൽ രൂക്ഷവിമർശനവുമായി ഉന്നത വിദ്യാഭ്യാസ മന്ത്രി റോജി എം. ജോൺ. ബിരുദദാന ചടങ്ങ് പോലെ തികച്ചും അച്ചടക്കം പാലിക്കേണ്ട ഒരു പരിപാടി അലങ്കോലപ്പെടുത്തിയാണോ വിദ്യാർത്ഥി രാഷ്ട്രീയം മുന്നോട്ട് കൊണ്ടുപോകേണ്ടതെന്ന് അദ്ദേഹം മാധ്യമങ്ങളോട് ചോദിച്ചു. പരിപാടിയിൽ എങ്ങനെയെങ്കിലും പ്രശ്നം ഉണ്ടാക്കുക എന്നതായിരുന്നു പ്രതിഷേധക്കാരുടെ ലക്ഷ്യമെന്നും ചോദ്യങ്ങൾക്ക് വ്യക്തമായ മറുപടി നൽകിയ ശേഷമാണ് താൻ വേദിയിൽ നിന്ന് ഇറങ്ങിയതെന്നും മന്ത്രി വ്യക്തമാക്കി.

ബാനറുകളും പ്ലക്കാർഡുകളും ഉയർത്തുന്നതിനെ എതിർക്കുന്ന ആളല്ല താനെന്നും, ചടങ്ങ് പൂർത്തിയായ ശേഷം സംസാരിക്കാമെന്ന് അറിയിച്ചിട്ടും എസ്.എഫ്.ഐ പ്രവർത്തകർ അനാവശ്യമായി ബഹളം വെക്കുകയായിരുന്നുവെന്നും അദ്ദേഹം വിവരിച്ചു. ചോദ്യങ്ങൾ ചോദിക്കുമ്പോൾ 'വീട്ടിൽ പോയി ചോദിക്ക്' എന്ന് മറുപടി നൽകുന്ന ശൈലി തന്റേതല്ലെന്ന് വ്യക്തമാക്കിയ മന്ത്രി, മുഖ്യമന്ത്രി പിണറായി വിജയൻ പ്രസംഗിക്കുന്ന വേദിയിൽ ഇതുപോലെ ബാനർ ഉയർത്താൻ എസ്.എഫ്.ഐക്കാർക്ക് ധൈര്യമുണ്ടോ എന്നും തുറന്നടിച്ചു. ഞങ്ങൾ രാഹുൽ ഗാന്ധിയുടെ ശൈലിയിൽ പഠിച്ചുവന്നവരാണെന്നും സമരം ചെയ്യുന്നവരെ ക്രൂരമായി തല്ലിച്ചതയ്ക്കുന്ന എൽ.ഡി.എഫ് സർക്കാരിന്റെ രീതി ഭരണപക്ഷത്തിനില്ലെന്നും റോജി എം. ജോൺ ഓർമ്മിപ്പിച്ചു.