‘സ്മൃതിക്ക് നായകസ്ഥാനം നൽകേണ്ട സമയം കഴിഞ്ഞു’; ഹർമൻപ്രീതിന്റെ ഫിറ്റ്നസിനെക്കുറിച്ച് മിതാലി രാജിന്റെ വിമർശനം

ഡൽഹി: ഇന്ത്യൻ വനിതാ ക്രിക്കറ്റിൽ നേതൃത്വമാറ്റത്തിന് സമയമായെന്ന് മുൻ നായിക മിതാലി രാജ്. ഏകദിന, ടെസ്റ്റ് ടീമുകളുടെ നായകസ്ഥാനത്തേക്ക് സ്മൃതി മന്ദാനയെ പരിഗണിക്കണമെന്നും, ഈ മാറ്റം നേരത്തെ തന്നെ സംഭവിക്കേണ്ടതായിരുന്നുവെന്നും മിതാലി അഭിപ്രായപ്പെട്ടു. ഇന്ത്യൻ വനിതാ ടീമിന്റെ ടി20 ലോകകപ്പ് പുറത്താകലിന് പിന്നാലെ പി.ടി.ഐയോട് സംസാരിക്കുകയായിരുന്നു മിതാലി. തുടർച്ചയായ രണ്ടാം തവണയും ടി20 ലോകകപ്പിന്റെ സെമിഫൈനൽ കടക്കാൻ ഇന്ത്യയ്ക്ക് സാധിക്കാത്ത സാഹചര്യത്തിലാണ് മുൻ നായികയുടെ പ്രതികരണം.

കഴിഞ്ഞ വർഷം ഏകദിന ലോകകപ്പിൽ ഇന്ത്യയെ ചരിത്ര വിജയത്തിലേക്ക് നയിച്ചെങ്കിലും, നിലവിലെ നായിക ഹർമൻപ്രീത് കൗറിന്റെ നേതൃത്വത്തെക്കുറിച്ച് വിമർശനങ്ങൾ ഉയർന്നിരുന്നു. എന്നാൽ ഒരു ടൂർണമെന്റിലെ പരാജയം മാത്രം അടിസ്ഥാനമാക്കി നായകനെ മാറ്റേണ്ടതില്ലെന്നും, ടീമിന്റെ ദീർഘകാല പദ്ധതികളാണ് പ്രധാനമായി വിലയിരുത്തേണ്ടതെന്നും മിതാലി വ്യക്തമാക്കി.ഹർമൻപ്രീതിന്റെ ഫിറ്റ്നസ് പ്രശ്നങ്ങളും ബാറ്റിങ് ഫോമിലെ സ്ഥിരതക്കുറവും മിതാലി പ്രത്യേകം ചൂണ്ടിക്കാട്ടി. കഴിഞ്ഞ ഏതാനും വർഷങ്ങളായി പല മത്സരങ്ങളിലും ഫിറ്റ്നസ് നിലനിർത്താൻ താരത്തിന് ബുദ്ധിമുട്ടുകൾ നേരിട്ടിട്ടുണ്ടെന്നും, ഒരു നായിക എപ്പോഴും മികച്ച ശാരീരികക്ഷമതയിൽ ആയിരിക്കണമെന്നാണ് ടീമിന്റെ ആവശ്യമെന്നും അവർ പറഞ്ഞു.

ഐസിസി ടൂർണമെന്റുകളിലെ ഹർമൻപ്രീതിന്റെ ബാറ്റിങ് പ്രകടനത്തിലെ ആവർത്തിക്കുന്ന പ്രശ്നങ്ങളും സെലക്ടർമാർ പരിശോധിക്കണമെന്ന് മിതാലി അഭിപ്രായപ്പെട്ടു. അടുത്ത ഏകദിന, ടി20 ലോകകപ്പ് സൈക്കിളുകളിൽ ഹർമൻപ്രീതിന്റെ പങ്ക് സംബന്ധിച്ച് സെലക്ടർമാർ തീരുമാനമെടുക്കണമെന്നും അവർ വ്യക്തമാക്കി.അതേസമയം, ടീമിന്റെ പരാജയത്തിന്റെ ഉത്തരവാദിത്തം നായികയ്ക്ക് മാത്രം നൽകാനാകില്ലെന്നും പരിശീലകൻ അമോൽ മുസുംദാറിനും ഇതിൽ പങ്കുണ്ടെന്നും മിതാലി പറഞ്ഞു.

ടി20 ഫോർമാറ്റിൽ യുവതാരങ്ങൾക്ക് കൂടുതൽ അവസരം നൽകണമെന്നാണ് മിതാലിയുടെ നിലപാട്. ടി20 നായക സ്ഥാനത്തേക്ക് ഷെഫാലി വർമ്മയെ പരിഗണിക്കാമെന്നും അവർ നിർദേശിച്ചു. അണ്ടർ-19 ലോകകപ്പിൽ ഇന്ത്യയെ കിരീടത്തിലേക്ക് നയിച്ച അനുഭവം ഷെഫാലിക്കുണ്ടെന്നും, ടി20യാണ് അവരുടെ പ്രധാന ഫോർമാറ്റെന്നും മിതാലി ചൂണ്ടിക്കാട്ടി.ജെമിമ റോഡ്രിഗസിനെയും നായക സ്ഥാനത്തേക്ക് പരിഗണിക്കാവുന്ന താരമായി മിതാലി വിലയിരുത്തി. എന്നാൽ ആരെ തെരഞ്ഞെടുത്താലും നേതൃത്വത്തിൽ വളരാൻ ആവശ്യമായ സമയം നൽകണമെന്നും അവർ കൂട്ടിച്ചേർത്തു.

ഇന്ത്യൻ വനിതാ ടീമിന് ദീർഘകാല ലക്ഷ്യങ്ങളോടെയുള്ള വ്യക്തമായ റോഡ് മാപ്പ് ആവശ്യമാണെന്നും മിതാലി വ്യക്തമാക്കി. പരമ്പരകൾ മാത്രം മുന്നിൽ കണ്ടുള്ള സമീപനം ടീമിന്റെ വളർച്ചയ്ക്ക് തിരിച്ചടിയാകുമെന്നും, ഫിറ്റ്നസ്, ഫീൽഡിംഗ് നിലവാരം, മികച്ച ഫിനിഷർമാരുടെ വളർച്ച എന്നിവയിൽ കൂടുതൽ ശ്രദ്ധ നൽകണമെന്നും മുൻ നായിക ആവശ്യപ്പെട്ടു.