ലണ്ടനിലെ ചെറിയ തുടക്കം മുതൽ ആഗോള വിപണിയിലെ രാജാക്കന്മാർ വരെ; റോളക്സിന്റെ ചരിത്രം അറിയാമോ?

ലോകത്തിലെ ഏറ്റവും പ്രശസ്തമായ ആഡംബര വാച്ച് നിര്‍മാതാക്കളാണ് റോളക്സ്. സ്വിസ് നിർമാണ മികവ്, കൃത്യത, ഈടുനിൽപ്പ്, ഉയർന്ന റീസെയിൽ മൂല്യം എന്നിവയാണ് റോളക്സിനെ മറ്റ് വാച്ചുകളിൽ നിന്ന് വേറിട്ടുനിർത്തുന്നത്. വെള്ളത്തിനടിയിലായാലും ഏത് മലയുടെ മുകളിലായാലും റോളക്സ് വാച്ചുകൾ കൃത്യമായ സമയം കാണിക്കുന്നു. നാല് മുതൽ അഞ്ച് ലക്ഷം രൂപ മുതലാണ് ഈ വാച്ചുകളുടെ വില ആരംഭിക്കുന്നത്. ഒറിജിനൽ റോളക്സ് വാച്ച് വാങ്ങണമെങ്കിൽ ഒരാൾക്ക് 4 മുതൽ 5 വർഷം വരെ കാത്തിരിക്കേണ്ടിയും വന്നേക്കാം. എന്നാൽ റോളക്സ് വാച്ചുകൾക്ക് ഇത്രയധികം ജനപ്രീതി ലഭിക്കുന്നത് എന്തുകൊണ്ടാണെന്നും അവയ്ക്ക് എന്തുകൊണ്ടാണ് ഇത്ര ഉയർന്ന വിലയെന്നും ചിന്തിച്ചിട്ടുണ്ടോ?

1905-ൽ ഹാൻസ് വിൽസ്‌ഡോർഫും ആൽഫ്രഡ് ഡേവിസും ചേർന്ന് ലണ്ടനിൽ 'വിൽസ്‌ഡോർഫ് & ഡേവിസ്' എന്ന കമ്പനി സ്ഥാപിച്ചതോടെയാണ് റോളക്സിന്റെ ചരിത്രം ആരംഭിക്കുന്നത്. റിസ്റ്റ് വാച്ചുകൾ നിർമിച്ച് ജ്വല്ലറികൾക്ക് വിൽപന നടത്തുകയായിരുന്നു ആദ്യം ചെയ്തിരുന്നത്. അക്കാലത്ത് സമയം നോക്കാൻ റിസ്റ്റ് വാച്ചുകളല്ല ഉപയോഗിച്ചിരുന്നത്. പോക്കറ്റ് വാച്ചുകളുടേത് പോലെ കൃത്യമല്ലാത്തതായിരുന്നു കാരണം. എന്നാൽ പോക്കറ്റ് വാച്ചുകൾക്കും വെള്ളം വീണാൽ കേടാവുകയോ ഉയരങ്ങളിൽ വച്ച് പ്രവര്‍ത്തനം നിര്‍ത്തുകയോ ചെയ്യുന്ന പോരായ്മകളുണ്ടായിരുന്നു. എന്നിട്ടും സമയം പാലിക്കാൻ മറ്റ് മാര്‍ഗങ്ങൾ ഇല്ലാത്തതിനാൽ പോക്കറ്റ് വാച്ചുകളാണ് വ്യാപകമായി ഉപയോഗിച്ചിരുന്നത്.

എന്നാൽ പോക്കറ്റ് വാച്ചുകളെക്കാൾ സമയം നോക്കാൻ നല്ലത് റിസ്റ്റ് വാച്ചുകളാണെന്ന് ഹാൻസ് വിൽസ്ഡോർഫ് മനസ്സിലാക്കി. റിസ്റ്റ് വാച്ചുകളെക്കുറിച്ചുള്ള വിവരങ്ങൾ അന്വേഷിച്ച ശേഷം ആൽഫ്രഡും വിൽസ്ഡോർഫും വിപുലമായി പരീക്ഷണം നടത്തി ലോകത്തിലെ ഏറ്റവും കൃത്യമായ റിസ്റ്റ് വാച്ച് നിര്‍മിക്കുകയായിരുന്നു. വിപണിയിൽ തങ്ങളുടെ വാച്ചുകളുടെ ഡിമാൻഡ് ക്രമേണ വർധിച്ചുവരുന്നതും ആളുകൾക്ക് അവ ഇഷ്ടപ്പെടുന്നതും ശ്രദ്ധയിൽ പെട്ടതോടെ സ്വന്തം ബ്രാൻഡ് നാമത്തിൽ വാച്ചുകൾ നിർമിക്കാൻ തീരുമാനിച്ചു.

ആ സമയത്ത് കമ്പനിയുടെ പേര് 'വിൽസ്, ഡഫ് & ഡേവിസ്' എന്നായിരുന്നു, അത് ഡയലിൽ എഴുതുക സാധ്യമായിരുന്നില്ല. തുടർന്ന് 1908-ൽ കമ്പനിയുടെ പേര് 'റോളക്സ്' എന്നാക്കി മാറ്റുകയായിരുന്നു. ഓരോ തവണയും സ്വയം മെച്ചപ്പെടുത്തിക്കൊണ്ടിരിക്കുന്ന മികവ് തന്നെയാണ് റോളക്സിനെ വ്യത്യസ്തമാക്കിയിരുന്നത്. 1908-ൽ സ്വിറ്റ്സർലൻഡിലെ ജനീവയിൽ കമ്പനിയുടെ ഓഫീസ് തുറന്നു. 1919-ൽ സര്‍ക്കാര്‍ നികുതി വര്‍ധിപ്പിച്ചതോടെ ലണ്ടൻ കമ്പനി അടച്ചുപൂട്ടേണ്ടി വന്നു. എന്നാൽ സ്വിറ്റ്സർലൻഡിലുള്ള കമ്പനിയുടെ സ്ഥാനം അതിന്റെ ബ്രാൻഡ് മൂല്യം വർധിപ്പിക്കുന്നതിന് വളരെയധികം സഹായകരമായി. അക്കാലത്ത് സ്വിസ് നിർമിത വാച്ചുകൾ ലോകമെമ്പാടും ഉയർന്ന ഡിമാൻഡുള്ളവയായിരുന്നു.

സമയ കൃത്യതയിൽ മാത്രമല്ല, വെള്ളം, പൊടി തുടങ്ങിയ ബാഹ്യകാരണങ്ങളാൽ ഒരിക്കലും കേടുപാടുകൾ സംഭവിക്കാത്ത ഒരു വാച്ച് സൃഷ്ടിക്കുക എന്നതായിരുന്നു റോളക്സിന്റെ ലക്ഷ്യം. കഠിനാധ്വാനത്തിന് ശേഷം, 1926-ൽ അവർ ലോകത്തിലെ ആദ്യത്തെ വാട്ടർപ്രൂഫ് വാച്ച് നിർമിച്ചു. എന്നാൽ ഇത് കൂടുതൽ ആളുകളിലേക്ക് എത്തിക്കുകയെന്ന വെല്ലുവിളി അവർ നേരിട്ടു. പരസ്യങ്ങളെ പൂർണ്ണമായും ആശ്രയിക്കുന്നതിന് പകരം, ഹാൻസ് വെൽസ്-ഡർഫ് ഇവന്റ് മാർക്കറ്റിംഗിലേക്ക് തിരിയുകയും വിവിധ കായിക ഇനങ്ങളിൽ അത്ലറ്റുകൾക്ക് വാച്ച് ധരിക്കാൻ നൽകുകയും ചെയ്തു. ഈ തന്ത്രം കമ്പനിക്ക് വലിയ വിജയം നേടിക്കൊടുത്തു.