തിരുവനന്തപുരം: കുട്ടികളുടെ ക്ഷേമം സമൂഹത്തിന്റെ പൊതുവായ ഉത്തരവാദിത്തമാണെന്നും ഈ വിഷയത്തില്‍ സര്‍ക്കാരിന് തുറന്ന മനസ്സാണ് ഉള്ളതെന്നും മന്ത്രി ബിന്ദു കൃഷ്ണ. അട്ടപ്പാടിയിലെ ജനങ്ങളുടെ ക്ഷേമത്തിനായി സര്‍ക്കാര്‍ പൂര്‍ണ്ണ പിന്തുണയോടെ ഒപ്പമുണ്ടെന്നും മന്ത്രി മാധ്യമങ്ങളോട് പറഞ്ഞു.
അട്ടപ്പാടിയില്‍ നിലവിലുള്ള ആരോഗ്യ-ക്ഷേമ പദ്ധതികള്‍ കൂടുതല്‍ കൃത്യതയോടെ നടപ്പിലാക്കുമെന്ന് മന്ത്രി അറിയിച്ചു. നിലവിലെ പദ്ധതികളില്‍ എന്തെങ്കിലും പോരായ്മകളോ വീഴ്ചകളോ ഉണ്ടെങ്കില്‍ അവ സമഗ്രമായി പരിശോധിച്ച് പരിഷ്‌കരിക്കും. അടിയന്തര സാഹചര്യത്തില്‍ പുതിയ പദ്ധതികള്‍ അനിവാര്യമാണെങ്കില്‍ അതും സര്‍ക്കാരിന്റെ സജീവ പരിഗണനയിലുണ്ട്.
എല്ലാ വകുപ്പുകളെയും ഏകോപിപ്പിച്ചുകൊണ്ട് കൂട്ടായ പ്രവര്‍ത്തനങ്ങളിലൂടെയായിരിക്കും പ്രശ്‌നപരിഹാരം കാണുക. പ്രത്യേകിച്ച്, അട്ടപ്പാടിയിലെ അമ്മമാരുടെ ആരോഗ്യ സംരക്ഷണവുമായി ബന്ധപ്പെട്ട് പുതിയ പദ്ധതികള്‍ ആവശ്യമുണ്ടെങ്കില്‍ അവ എത്രയും പെട്ടെന്ന് നടപ്പിലാക്കുമെന്നും മന്ത്രി ബിന്ദു കൃഷ്ണ പ്രസ് മീറ്റില്‍ വ്യക്തമാക്കി. കാര്‍ത്തിക പള്ളിയിലെ കുഞ്ഞിനെ ഇന്ന് ശിശു വികസന വകുപ്പ് ഏറ്റെടുക്കാന്‍ ശ്രമം നടത്തുമെന്നും മന്ത്രി വ്യക്തമാക്കി.
കുട്ടികളുടെ ക്ഷേമം പൊതു ഉത്തരവാദിത്തം; അട്ടപ്പാടിയില്‍ ആവശ്യമെങ്കില്‍ പുതിയ പദ്ധതികള്‍ നടപ്പിലാക്കുമെന്ന് മന്ത്രി ബിന്ദു കൃഷ്ണ
Jaihind TV News Report
Jaihind TV Web Desk
2 min read
166 reads
