ഡിജിറ്റൽ ആശയവിനിമയം ശക്തമാക്കാൻ ആർ.ബി.ഐ; സോഷ്യൽ മീഡിയ ഏജൻസിയെ നിയമിക്കുന്നു

ഡിജിറ്റൽ രംഗത്തെ വാർത്താവിനിമയവും പൊതുജനങ്ങളുമായുള്ള ആശയവിനിമയവും കൂടുതൽ ശക്തമാക്കുന്നതിന്റെ ഭാഗമായി റിസർവ് ബാങ്ക് ഓഫ് ഇന്ത്യ (RBI) പുതിയ സോഷ്യൽ മീഡിയ ഏജൻസിയെ നിയമിക്കാനൊരുങ്ങുന്നു. പോഡ്‌കാസ്റ്റുകൾ നിർമ്മിക്കുക, ആകർഷകമായ ഡിജിറ്റൽ ഉള്ളടക്കങ്ങൾ തയ്യാറാക്കുക, ഓൺലൈൻ സംഭാഷണങ്ങൾ നിരീക്ഷിക്കുക, പൊതുജനങ്ങളുടെ സംശയങ്ങൾക്കും പ്രതികരണങ്ങൾക്കും ഉടനടി മറുപടി നൽകുക എന്നിവയാണ് പുതിയ ഏജൻസിയുടെ പ്രധാന ചുമതലകൾ.

24 മണിക്കൂറും സജീവമായിരിക്കുന്ന സോഷ്യൽ മീഡിയ തന്ത്രങ്ങൾ ആവിഷ്കരിക്കുക, വിവിധ പ്ലാറ്റ്‌ഫോമുകൾക്കായി ക്രിയേറ്റീവുകൾ തയ്യാറാക്കുക, വിശകലനം നടത്തുക, ക്യാമ്പയിനുകൾ സംഘടിപ്പിക്കുക എന്നിവയും കരാറിന്റെ ഭാഗമായിരിക്കും. അടിയന്തര സാഹചര്യങ്ങളിലോ ആവശ്യമായ ഘട്ടങ്ങളിലോ പ്രൊഫൈൽ ഉള്ളടക്കങ്ങൾ നീക്കം ചെയ്യേണ്ടിവന്നാൽ അതിനുള്ള നടപടികളും ഏജൻസി തന്നെ കൈകാര്യം ചെയ്യണമെന്ന് ആർ.ബി.ഐ വ്യക്തമാക്കുന്നു.

ഒക്ടോബർ 7-നാണ് ഇത് സംബന്ധിച്ച ടെൻഡർ നടപടികൾക്ക് തുടക്കമായത്. താല്പര്യമുള്ള ഏജൻസികൾക്ക് നവംബർ 6 ഉച്ചയ്ക്ക് 12 മണിവരെ ബിഡുകൾ സമർപ്പിക്കാവുന്നതാണ്. തുടർന്ന് നവംബർ 9 ഉച്ചയ്ക്ക് 12 മണിക്ക് ബിഡുകൾ തുറക്കും. സെൻട്രൽ പബ്ലിക് പ്രൊക്യൂർമെന്റ് പോർട്ടൽ (CPPP) വഴിയാണ് അപേക്ഷിക്കേണ്ടത്.

ടെക്നിക്കൽ, കൊമേഴ്സ്യൽ എന്നിങ്ങനെ രണ്ട് ഘട്ടങ്ങളിലായാണ് ബിഡ്ഡിംഗ് നടക്കുക. ടെക്നിക്കൽ മൂല്യനിർണ്ണയത്തിൽ യോഗ്യത നേടുന്ന സ്ഥാപനങ്ങളിൽ നിന്ന് ഏറ്റവും കുറഞ്ഞ തുക വാഗ്ദാനം ചെയ്യുന്ന ഏജൻസിക്കായിരിക്കും കരാർ ലഭിക്കുക. ടെൻഡർ നടപടികളുടെ സുതാര്യത ഉറപ്പാക്കാൻ മുൻ ഐ.ആർ.എസ് ഉദ്യോഗസ്ഥൻ നാഗേശ്വർ റാവു കൊറിപ്പല്ലി, മുൻ ഐ.പി.എസ് ഉദ്യോഗസ്ഥൻ പ്രമോദ് ശ്രീപദ് ഫൽനികർ എന്നിവരെ സ്വതന്ത്ര എക്സ്റ്റേണൽ മോണിറ്റർമാരായി ആർ.ബി.ഐ നിയമിച്ചിട്ടുണ്ട്. എന്നാൽ കരാർ തുകയെക്കുറിച്ചോ കാലാവധിയെക്കുറിച്ചോ ടെൻഡർ നോട്ടീസിൽ വ്യക്തമാക്കിയിട്ടില്ല.