കുതിപ്പുമായി സൊമാറ്റോയും ബ്ലിങ്കിറ്റും; റെക്കോർഡ് വരുമാനം, മാതൃകമ്പനിയായ എറ്റേണലിന്റെ ലാഭം 125 കോടി രൂപ

ഡൽഹി: ഇന്ത്യയിലെ ഓൺലൈൻ ഭക്ഷണവിതരണ രംഗത്തും ക്വിക്ക് കൊമേഴ്‌സ് മേഖലയിലും പ്രമുഖ സാന്നിധ്യമായ എറ്റേണൽ ലിമിറ്റഡിന് (Eternal Limited) രണ്ടാം പാദത്തിൽ മികച്ച ലാഭവളർച്ച. സൊമാറ്റോയുടെയും ബ്ലിങ്കിറ്റിന്റെയും മാതൃകമ്പനിയായ എറ്റേണലിന്റെ അറ്റാദായം കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 92.3 ശതമാനം ഉയർന്ന് 125 കോടി രൂപയായി. 2026 സെപ്റ്റംബറിൽ അവസാനിച്ച രണ്ടാം പാദത്തിൽ കമ്പനിയുടെ പ്രവർത്തന വരുമാനം 77.6 ശതമാനം വാർഷിക വളർച്ചയോടെ 24,138 കോടി രൂപയായി ഉയർന്നു. മുൻവർഷത്തെ സമാന പാദത്തിൽ ഇത് 13,590 കോടി രൂപയായിരുന്നു.

ബ്ലിങ്കിറ്റിന്റെ ക്വിക്ക് ഡെലിവറി ബിസിനസും ഭക്ഷണവിതരണ മേഖലയിലെ മുന്നേറ്റവുമാണ് കമ്പനിയുടെ വരുമാന വർധനയിൽ പ്രധാന പങ്കുവഹിച്ചത്. ബ്ലിങ്കിറ്റിന്റെ വരുമാനം 93.6 ശതമാനം ഉയർന്ന് 19,152 കോടി രൂപയിലെത്തിയപ്പോൾ, ഭക്ഷണ ഓർഡറിങ്-ഡെലിവറി വിഭാഗത്തിന്റെ വരുമാനം 36.7 ശതമാനം വർധിച്ച് 3,396 കോടി രൂപയായി. എന്നാൽ വരുമാനത്തിനൊപ്പം കമ്പനിയുടെ ചെലവുകളിലും വർധന രേഖപ്പെടുത്തിയിട്ടുണ്ട്. വിതരണ ചെലവുകളും ജീവനക്കാരുമായി ബന്ധപ്പെട്ട ചെലവുകളും ഉയർന്നതോടെ ആകെ ചെലവ് 13,813 കോടി രൂപയിൽനിന്ന് 75 ശതമാനം ഉയർന്ന് 24,166 കോടി രൂപയായി.

വിപണി വിശകലന വിദഗ്ധർ 304 കോടി രൂപയുടെ അറ്റാദായം പ്രതീക്ഷിച്ചിരുന്നെങ്കിലും കമ്പനി നേടിയത് 125 കോടി രൂപ മാത്രമാണ്. അതേസമയം, വരുമാനം വിപണിയുടെ പ്രതീക്ഷയായ 23,447 കോടി രൂപയെ മറികടന്നു. കമ്പനിയുടെ EBITDA 239 കോടി രൂപയിൽനിന്ന് 752 കോടി രൂപയായി ഉയർന്നപ്പോൾ, EBITDA മാർജിൻ 1.8 ശതമാനത്തിൽനിന്ന് 3.1 ശതമാനമായി മെച്ചപ്പെട്ടു. ഇതിനുപുറമേ, റെസ്റ്റോറന്റുകളിൽ ഭക്ഷണം കഴിക്കുന്നതിനും വിനോദ പരിപാടികൾ ബുക്ക് ചെയ്യുന്നതിനുമുള്ള ബിസിനസുകൾ ഏകീകരിക്കുന്നതിനുള്ള നടപടികളും കമ്പനി പ്രഖ്യാപിച്ചിട്ടുണ്ട്.

അപ്പാർട്ട്‌മെന്റുകളിലും ഗേറ്റഡ് കമ്മ്യൂണിറ്റികളിലും സുരക്ഷയും ദൈനംദിന പ്രവർത്തനങ്ങളും നിയന്ത്രിക്കുന്ന പ്ലാറ്റ്‌ഫോമായ 'മൈഗേറ്റിന്റെ' (MyGate) 5.4 ശതമാനം ഓഹരി സ്വന്തമാക്കാൻ 156 കോടി രൂപയുടെ ഇടപാടിനും എറ്റേണൽ പദ്ധതിയിടുന്നുണ്ട്. മൈഗേറ്റിന്റെ ആപ്പും ഡിജിറ്റൽ പരസ്യ ശൃംഖലയും പ്രയോജനപ്പെടുത്തി റെസിഡൻഷ്യൽ സമുച്ചയങ്ങളിലേക്ക് സൊമാറ്റോയുടെയും ബ്ലിങ്കിറ്റിന്റെയും സേവനങ്ങൾ കൂടുതൽ വിപുലീകരിക്കുകയാണ് ലക്ഷ്യം. ബിസിനസ് വിപുലീകരണം ശക്തമായി തുടരുമ്പോഴും, ഉയരുന്ന ചെലവുകൾ നിയന്ത്രിച്ച് ലാഭം മെച്ചപ്പെടുത്താൻ കമ്പനിക്ക് കഴിയുമോ എന്നതാണ് നിക്ഷേപകർ ഉറ്റുനോക്കുന്നത്.