പിഎസ്സി പരീക്ഷാ ക്രമക്കേട് കേസിൽ ചോദ്യം ചെയ്യലിന് ഹാജരാകാതെ തുടർച്ചയായി ഒഴിഞ്ഞുമാറുന്ന പിഎസ്സി ചെയർമാൻ എം.ആർ. ബൈജുവിനെതിരെ നിലപാട് കടുപ്പിച്ച് പ്രത്യേക അന്വേഷണസംഘം. ക്രൈംബ്രാഞ്ച് സമൻസ് നൽകിയിട്ടും ഹാജരാകാതിരുന്ന ചെയർമാന്റെ നിലപാടിനെതിരെ ഹൈക്കോടതിയിലും ജില്ലാ വിജിലൻസ് കോടതിയിലും അന്വേഷണസംഘം റിപ്പോർട്ട് നൽകും. കോടതി നിർദ്ദേശം വരുന്നതുവരെ ചെയർമാന് കൂടുതൽ നോട്ടീസ് നൽകില്ലെന്നാണ് അന്വേഷണസംഘത്തിന്റെ തീരുമാനം.
കേസ് റദ്ദാക്കണമെന്നാവശ്യപ്പെട്ട് പിഎസ്സി നൽകിയ ഹർജി ഹൈക്കോടതിയുടെ പരിഗണനയിലാണെന്ന് ചൂണ്ടിക്കാട്ടിയാണ് ചെയർമാൻ ചോദ്യം ചെയ്യലിൽ നിന്ന് വിട്ടുനിൽക്കുന്നത്. എന്നാൽ, പരീക്ഷാ ക്രമക്കേടിൽ ചെയർമാനെതിരെ ഗുരുതരമായ മൊഴികളും തെളിവുകളുമാണ് അന്വേഷണസംഘത്തിന് ലഭിച്ചിട്ടുള്ളത്. പിഎസ്സി സെക്രട്ടറിയും നിരവധി അംഗങ്ങളും ചെയർമാനെതിരെ മൊഴി നൽകിയതിനെ തുടർന്നാണ് അദ്ദേഹത്തെ വീണ്ടും ചോദ്യം ചെയ്യാൻ ക്രൈംബ്രാഞ്ച് തീരുമാനിച്ചത്. നിലവിൽ മറ്റ് പിഎസ്സി അംഗങ്ങളുടെ ചോദ്യം ചെയ്യലും മൊഴിയെടുപ്പും പുരോഗമിക്കുകയാണ്.
പിഎസ്സി പരീക്ഷാ ക്രമക്കേട്: ചെയർമാനെതിരെ നിലപാട് കടുപ്പിച്ച് അന്വേഷണസംഘം; കോടതിയിൽ റിപ്പോർട്ട് നൽകും