മുംബൈ: മുംബൈ ഇന്ത്യന്‍സിന്റെ പുതിയ മുഖ്യ പരിശീലകനായി മുന്‍ വെസ്റ്റ് ഇന്‍ഡീസ് ഓള്‍റൗണ്ടര്‍ കീറോണ്‍ പൊള്ളാര്‍ഡിനെ നിയമിച്ചു. മുംബൈയുടെ ബാറ്റിംഗ് കോച്ച് സ്ഥാനത്തുനിന്നാണ് പൊള്ളാര്‍ഡിനെ മുഖ്യ പരിശീലകനായി ഉയര്‍ത്തിയിരിക്കുന്നത്. ടീമിന്റെ മുന്‍കാല വിജയങ്ങളില്‍ നിര്‍ണായക പങ്കുവഹിച്ച പൊള്ളാര്‍ഡിന്റെ നിയമനം ഫ്രാഞ്ചൈസിയുമായുള്ള അദ്ദേഹത്തിന്റെ ദീര്‍ഘകാല ബന്ധത്തിന് പുതിയൊരു മാനം നല്‍കുന്നു.
കളിക്കാരനായി 13 വര്‍ഷത്തോളമാണ് പൊള്ളാര്‍ഡ് മുംബൈ ഇന്ത്യന്‍സിനെ പ്രതിനിധീകരിച്ചത്. ടി20 ക്രിക്കറ്റ് ചരിത്രത്തിലെ തന്നെ ഏറ്റവും ദീര്‍ഘകാലമുള്ള ബന്ധങ്ങളിലൊന്നാണിത്. മുംബൈക്കായി 3,915 റണ്‍സ് നേടിയിട്ടുള്ള അദ്ദേഹം ഫ്രാഞ്ചൈസിയുടെ എക്കാലത്തെയും മികച്ച മൂന്നാമത്തെ റണ്‍വേട്ടക്കാരനാണ്. ടീമിന്റെ എല്ലാ കിരീടനേട്ടങ്ങളിലും പങ്കാളിയായ അദ്ദേഹം താല്‍ക്കാലികമായി ടീമിനെ നയിക്കുകയും ചെയ്തിട്ടുണ്ട്. ഐ.പി.എല്‍. കരിയര്‍ അവസാനിപ്പിച്ച ശേഷം ബാറ്റിംഗ് കോച്ചായി ചുമതലയേറ്റ പൊള്ളാര്‍ഡ്, ഫ്രാഞ്ചൈസിയുടെ സംസ്‌കാരത്തെയും കളിക്കാരെയും കുറിച്ച് പൂര്‍ണ്ണമായ ധാരണയുള്ള വ്യക്തിയാണ്.
പുതിയ ഉത്തരവാദിത്തത്തില്‍ വലിയ സന്തോഷമുണ്ടെന്ന് പ്രതികരിച്ച പൊള്ളാര്‍ഡ്, നീത അംബാനി, ആകാശ് അംബാനി എന്നിവര്‍ക്കും എം.ഐ. കുടുംബത്തിനും നന്ദി അറിയിച്ചു. ടീമിന്റെ പാരമ്പര്യം നിലനിര്‍ത്താനും പുതിയ പ്രതിഭകളെ വാര്‍ത്തെടുക്കാനും ആരാധകര്‍ക്ക് സന്തോഷിക്കാന്‍ വക നല്‍കാനും സാധിക്കുമെന്ന് അദ്ദേഹം വ്യക്തമാക്കി.
ഐ.പി.എല്ലിലെ മുന്‍നിര ടീമുകളിലൊന്നായി തിരിച്ചെത്താനുള്ള ശ്രമത്തിലാണ് മുംബൈ ഇന്ത്യന്‍സ്. ഹാര്‍ദിക് പാണ്ഡ്യ ക്യാപ്റ്റനായി തിരിച്ചെത്തിയതിന് ശേഷം കഴിഞ്ഞ സീസണുകളില്‍ ടീമിന് വലിയ മുന്നേറ്റം നടത്താന്‍ കഴിഞ്ഞിരുന്നില്ല. ഈ പശ്ചാത്തലത്തിലാണ് പുതിയ പരിശീലകന്റെ വരവ്. മുന്‍ പരിശീലകന്‍ മഹേല ജയവര്‍ധനെ പടിയിറങ്ങിയ ഒഴിവിലേക്കാണ് പൊള്ളാര്‍ഡ് എത്തുന്നത്. മഹേലയുടെ കീഴില്‍ മൂന്ന് ഐ.പി.എല്‍ കിരീടങ്ങള്‍ മുംബൈ സ്വന്തമാക്കിയിരുന്നു.
മുംബൈ ഇന്ത്യന്‍സ് പുതിയ മുഖ്യ പരിശീലകനായി കീറോണ്‍ പൊള്ളാര്‍ഡ്
Jaihind TV News Report
Jaihind TV Web Desk
2 min read
212 reads
