റായ്പൂര്‍: സിംബാബ്വെയ്ക്കെതിരായ ട്വന്റി20 പരമ്പരയിലെ മുഴുവന്‍ മത്സരങ്ങളും ജയിച്ച് ഇന്ത്യന്‍ വനിതാ ടീം പരമ്പര സ്വന്തമാക്കി (3-0). റായ്പൂരില്‍ നടന്ന മൂന്നാം മത്സരത്തില്‍ 92 റണ്‍സിന്റെ മികച്ച വിജയമാണ് ഇന്ത്യ നേടിയത്. മുന്‍ നായിക ഹര്‍മന്‍പ്രീത് കൗറിന്റെ വെടിക്കെട്ട് ബാറ്റിംഗാണ് ഇന്ത്യന്‍ വിജയത്തിന് അടിത്തറയിട്ടത്.
ടോസ് നേടി ബാറ്റിംഗ് തിരഞ്ഞെടുത്ത ഇന്ത്യ നിശ്ചിത 20 ഓവറില്‍ 7 വിക്കറ്റ് നഷ്ടത്തില്‍ 216 റണ്‍സ് അടിച്ചുകൂട്ടി. നായിക സ്മൃതി മന്ദാനയ്ക്ക് പകരം ഷെഫാലി വര്‍മ്മയ്ക്കൊപ്പം അനുഷ്‌ക ശര്‍മ്മയാണ് ഇന്നിംഗ്‌സ് ഓപ്പണ്‍ ചെയ്തത്. ആദ്യ അഞ്ചോവറില്‍ തന്നെ ടീം സ്‌കോര്‍ 50 കടത്തി. 37 പന്തില്‍ 5 സിക്‌സും 6 ഫോറുമടക്കം 69 റണ്‍സെടുത്ത ഷെഫാലി വര്‍മ്മയും, 41 പന്തില്‍ പുറത്താകാതെ 91 റണ്‍സ് നേടിയ ഹര്‍മന്‍പ്രീത് കൗറും ചേര്‍ന്നാണ് ഇന്ത്യന്‍ സ്‌കോര്‍ ഉയര്‍ത്തിയത്. അനുഷ്‌ക (28), നിക്കി പ്രസാദ് (9) എന്നിവര്‍ പുറത്തായ ശേഷമെത്തിയ ഹര്‍മന്‍പ്രീത് ക്യാപ്റ്റന്‍ സ്ഥാനം ഒഴിഞ്ഞ ശേഷമുള്ള തന്റെ ഏറ്റവും മികച്ച പ്രകടനമാണ് പുറത്തെടുത്തത്. കരിയറിലെ 19-ാം അര്‍ദ്ധ സെഞ്ചുറി കുറിച്ച ഹര്‍മന്‍പ്രീത് തന്നെയാണ് മത്സരത്തിലെ താരം. പരമ്പരയിലാകെ 128 റണ്‍സ് അടിച്ചുകൂട്ടിയ വൈസ് ക്യാപ്റ്റന്‍ ഷെഫാലി വര്‍മ്മ പ്ലെയര്‍ ഓഫ് ദി സീരീസായി തിരഞ്ഞെടുക്കപ്പെട്ടു.
217 റണ്‍സ് വിജയലക്ഷ്യവുമായി മറുപടി ബാറ്റിംഗിനിറങ്ങിയ സിംബാബ്വെയ്ക്ക് തുടക്കത്തില്‍ തന്നെ തിരിച്ചടിയേറ്റു. ആദ്യ പന്തില്‍ തന്നെ ഓപ്പണര്‍ കെലിസ് എന്‍ഡ്ലോവുവിനെ നഷ്ടമായ അവര്‍ക്ക് 20 റണ്‍സെടുക്കുന്നതിനിടെ 4 വിക്കറ്റുകള്‍ നഷ്ടമായി. നിശ്ചിത ഓവറില്‍ 7 വിക്കറ്റ് നഷ്ടത്തില്‍ 124 റണ്‍സെടുക്കാനേ സന്ദര്‍ശകര്‍ക്ക് സാധിച്ചുള്ളൂ. ഇന്ത്യയ്ക്കായി 4 ഓവറില്‍ 18 റണ്‍സ് മാത്രം വഴങ്ങി 3 വിക്കറ്റ് വീഴ്ത്തിയ നന്ദനി ശര്‍മ്മ ബോളിംഗില്‍ തിളങ്ങി. ക്രാന്തി ഗൗഡ്, അരുന്ധതി റെഡ്ഡി, ദീപ്തി ശര്‍മ്മ, നിക്കി പ്രസാദ് എന്നിവര്‍ ഓരോ വിക്കറ്റ് വീതം വീഴ്ത്തി.
തിളങ്ങി ഹര്‍മന്‍പ്രീത്;സിംബാബ്വെയ്ക്കെതിരായ ടി20 പരമ്പര തൂത്തുവാരി ഇന്ത്യ; മൂന്നാം മത്സരത്തില്‍ 92 റണ്‍സ് വിജയം
Jaihind TV News Report
Jaihind TV Web Desk
2 min read
480 reads
