കരൾ ക്യാൻസർ; ശരീരം മുൻകൂട്ടി കാണിക്കുന്ന ഈ ലക്ഷണങ്ങൾ അവഗണിക്കരുത്

കരളിലെ കോശങ്ങളിൽ മാരകമായ ട്യൂമറുകൾ അസാധാരണമായി വളരുന്ന ജീവന് തന്നെ ഭീഷണിയായ ഒരു രോഗമാണ് കരൾ ക്യാൻസർ. 'ഹെപ്പറ്റോസെല്ലുലാർ കാർസിനോമ' (HCC) ആണ് ഏറ്റവും സാധാരണയായി കണ്ടുവരുന്ന പ്രാഥമിക കരൾ അർബുദം. മറ്റ് ക്യാൻസറുകളിൽ നിന്ന് കരളിലെ ക്യാൻസറിനെ വ്യത്യസ്തമാക്കുന്ന പ്രധാന ഘടകം, ഇത് സാധാരണയായി നേരത്തെ തന്നെ രോഗബാധിതമായ കരളിനെയാണ് ബാധിക്കുക എന്നതാണ്.

ആൽക്കഹോളിക് ലിവർ ഡിസീസ്, നോൺ ആൽക്കഹോളിക് ഫാറ്റി ലിവർ ഡിസീസ്, ഹെപ്പറ്റൈറ്റിസ് ബി, ഹെപ്പറ്റൈറ്റിസ് സി തുടങ്ങിയ കരൾ രോഗങ്ങളാണ് പലപ്പോഴും കരളിലെ ക്യാൻസറിലേക്ക് നയിക്കുന്നത്. ഈ രോഗങ്ങൾ മൂലം കരളിന് സംഭവിക്കുന്ന നാശം പിന്നീട് 'സിറോസിസ്' എന്ന അവസ്ഥയിലേക്കും, പ്രാരംഭ ഘട്ടത്തിൽ ചികിത്സിച്ചില്ലെങ്കിൽ അത് കരൾ ക്യാൻസറിലേക്കും കരളിന്റെ പ്രവർത്തന തകരാറിലേക്കും നയിക്കുന്നു.

തുടക്കത്തിലേ തിരിച്ചറിഞ്ഞാൽ കൃത്യമായ ചികിത്സ നൽകാൻ സാധിക്കുന്ന കരൾ ക്യാൻസറിന്റെ പ്രധാന ലക്ഷണങ്ങൾ എന്തൊക്കെയാണെന്ന് നോക്കാം:

1. അകാരണമായി ശരീരഭാരം കുറയുക

ഡയറ്റിലോ വ്യായാമത്തിലോ മാറ്റം വരുത്താതെ തന്നെ അപ്രതീക്ഷിതമായി ശരീരഭാരം കുറയുന്നത് കരൾ ക്യാൻസറിന്റെ ഒരു പ്രാരംഭ ലക്ഷണമായിരിക്കാം. കരൾ ക്യാൻസർ കണ്ടെത്തിയ രോഗികളിൽ 40 ശതമാനത്തോളം പേർക്കും ഇത്തരത്തിൽ ശരീരഭാരം കുറയുന്നതായി റിപ്പോർട്ടുകൾ വ്യക്തമാക്കുന്നു.

2. വയറുവേദനയും അസ്വസ്ഥതയും

വയറിന്റെ മുകൾഭാഗത്ത് കരൾ ക്യാൻസർ മൂലം വേദനയും അസ്വസ്ഥതയും അനുഭവപ്പെടാൻ സാധ്യതയുണ്ട്. രോഗത്തിന്റെ പ്രാരംഭ ഘട്ടത്തിൽ കഠിനമായ വേദന വളരെ അപൂർവമായി മാത്രമേ ഉണ്ടാകാറുള്ളൂ. എന്നാൽ ക്യാൻസർ പുരോഗമിക്കുമ്പോൾ ഈ വേദന കൂടുതൽ വഷളാകുന്നു. ചിലരിൽ തോളുകളുടെ വലതുവശത്തും ഇത്തരത്തിൽ വേദന അനുഭവപ്പെടാം.

3. വിശപ്പില്ലായ്മയും ദഹനക്കുറവും

മറ്റ് ലക്ഷണങ്ങൾ പ്രത്യക്ഷപ്പെടുന്നതിന് മുൻപ് തന്നെ വിശപ്പില്ലായ്മയും വയറുവേദനയും അനുഭവപ്പെടാം. കരൾ ശരിയായി പ്രവർത്തിക്കാതാകുമ്പോൾ ശരീരത്തിലെ ദോഷകരമായ വസ്തുക്കളെ ഫിൽട്ടർ ചെയ്യാൻ അതിന് കഴിയില്ല. മെറ്റബോളിസം ദുർബലമാകുന്നതിന്റെ ഫലമായാണ് ഇത് സംഭവിക്കുന്നത്. കൃത്യമായ ചികിത്സ നൽകിയില്ലെങ്കിൽ ഇത് കൂടുതൽ വഷളാകുകയും ഛർദ്ദിയിലേക്കും വിശപ്പ് പൂർണ്ണമായി നഷ്ടപ്പെടുന്ന അവസ്ഥയിലേക്കും നയിക്കും.

4. മഞ്ഞപ്പിത്ത ലക്ഷണങ്ങളും ചർമ്മത്തിലെ മാറ്റങ്ങളും

ചർമ്മത്തിനും കണ്ണിനും മഞ്ഞ നിറം ഉണ്ടാകുന്നത് കരളിലുണ്ടാകുന്ന ക്യാൻസറിന്റെ വ്യക്തമായ ലക്ഷണമാകാം. ഇതോടൊപ്പം ചർമ്മത്തിൽ അകാരണമായി ഉണ്ടാകുന്ന ചൊറിച്ചിൽ, മലത്തിന്റെ നിറ വ്യത്യാസം, മൂത്രത്തിന് ഉണ്ടാകുന്ന കടുംനിറം എന്നിവയും കരൾ ക്യാൻസറിന്റെ ലക്ഷണങ്ങളാകാം.

5. വിട്ടുമാറാത്ത ക്ഷീണവും ബലഹീനതയും

അമിതമായ ബലഹീനതയും വിട്ടുമാറാത്ത ക്ഷീണവുമാണ് മറ്റൊരു പ്രധാന ലക്ഷണം. ക്യാൻസർ ശരീരത്തിന്റെ മെറ്റബോളിസത്തെയും ഊർജ്ജ നിലയെയും താറുമാറാക്കുന്നതിനാലാണ് ശരീരം എപ്പോഴും ക്ഷീണിതമായിരിക്കുന്നത്.

ഓർക്കുക: മുകളിൽ പറഞ്ഞ ലക്ഷണങ്ങൾ കണ്ടാലുടൻ അത് ക്യാൻസർ ആകണമെന്നില്ല. എങ്കിലും ഇത്തരം ലക്ഷണങ്ങൾ ശ്രദ്ധയിൽപ്പെട്ടാൽ ഒട്ടും വൈകാതെ ഒരു ഡോക്ടറെ കണ്ട് കൃത്യമായ പരിശോധനകൾ നടത്തേണ്ടത് അനിവാര്യമാണ്.