ബംഗാൾ ഉൾക്കടലിൽ രൂപംകൊണ്ട 'അർണാബ്' ചുഴലിക്കാറ്റ് കരതൊട്ടതോടെ ആന്ധ്രാപ്രദേശ്, യാനം തീരദേശ മേഖലകളിൽ വൻനാശനഷ്ടം വിതച്ചു. മണിക്കൂറിൽ 150 കിലോമീറ്റർ വരെ വേഗതയിൽ വീശിയടിച്ച ചുഴലിക്കാറ്റിലും കനത്ത മഴയിലും ആന്ധ്രാപ്രദേശിൽ മൂന്ന് മരണങ്ങൾ റിപ്പോർട്ട് ചെയ്തു. അനകപ്പള്ളിയിലെ യെല്ലമഞ്ചിലിയിൽ പൊട്ടിവീണ വൈദ്യുത ലൈനിൽ തട്ടി 55-കാരിയായ സ്ത്രീയും കൃഷിയിടത്തിൽ വച്ച് 53-കാരനുമാണ് ജീവൻ നഷ്ടമായത്. അതിശക്തമായ കാറ്റിൽ 31 വീടുകൾ തകരുകയും നിരവധി മരങ്ങളും വൈദ്യുത തൂണുകളും കടപുഴകി വീഴുകയും ചെയ്തതോടെ മേഖലയിൽ വൈദ്യുതി ബന്ധം പൂർണ്ണമായി തടസ്സപ്പെട്ടു. മുൻകരുതലിന്റെ ഭാഗമായി ആന്ധ്രാപ്രദേശിൽനിന്നും ഒഡീഷയിൽനിന്നുമായി 1,80,000-ത്തിലധികം ആളുകളെയാണ് ഇതുവരെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിച്ചത്.
ചുഴലിക്കാറ്റിന്റെ ആഘാതത്തിൽ തീരദേശങ്ങളിൽ കനത്ത പ്രളയസാഹചര്യമാണ് നിലനിൽക്കുന്നത്. വിശാഖപട്ടണത്ത് 217 മില്ലീമീറ്ററും കലിംഗപട്ടണത്ത് 147 മില്ലീമീറ്ററും മഴ രേഖപ്പെടുത്തിയപ്പോൾ, ആന്ധ്രയിലെ ശ്രീകാകുളത്ത് 167 ഗ്രാമങ്ങളിൽ വെള്ളപ്പൊക്ക മുന്നറിയിപ്പ് നൽകിയിട്ടുണ്ട്. അതിനിടെ, ആന്ധ്രയിലെ അന്തർവേദി തീരത്തിന് സമീപം എഞ്ചിൻ തകരാറിലായതിനെ തുടർന്ന് ഒരു ചരക്കുകപ്പൽ തീരത്തടിയുകയും ചെന്നൈയിലെ എന്നൂർ തീരത്ത് രാക്ഷസത്തിരമാലകൾ റോഡിലേക്ക് അടിച്ചുകയറി വാഹനങ്ങൾ ഒഴുകിപ്പോവുകയും ചെയ്തു.
പ്രതികൂല കാലാവസ്ഥയെ തുടർന്ന് മേഖലയിലെ വ്യോമ-റെയിൽ ഗതാഗതം പൂർണ്ണമായും തടസ്സപ്പെട്ടു. ചെന്നൈയിൽനിന്ന് ആന്ധ്രയിലേക്കുള്ള 12 വിമാനങ്ങളും വിജയവാഡയിലെ 18 സർവീസുകളും റദ്ദാക്കിയപ്പോൾ കിഴക്കൻ തീരത്തുകൂടിയുള്ള 50-ലധികം ട്രെയിൻ സർവീസുകൾ വഴിതിരിച്ചുവിട്ടു. കനത്ത മഴ കാരണം ഝാർഖണ്ഡിലെ റാഞ്ചി ഉൾപ്പെടെയുള്ള ജില്ലകളിൽ സ്കൂളുകൾക്ക് ബുധനാഴ്ച അവധി പ്രഖ്യാപിച്ചിരുന്നു. കൂടാതെ കനത്ത മഞ്ഞുവീഴ്ചയെ തുടർന്ന് അയൽരാജ്യമായ നേപ്പാളിൽ ഹിമാലയൻ മേഖലകളിലേക്കുള്ള ട്രെക്കിങ് പെർമിറ്റുകൾ താൽക്കാലികമായി നിർത്തിവെച്ചിരിക്കുകയാണ്.
'അർണാബ്' ചുഴലിക്കാറ്റ് കരതൊട്ടു: ആന്ധ്രയിൽ കനത്ത നാശനഷ്ടം; മൂന്ന് മരണം, 1.8 ലക്ഷം പേരെ മാറ്റിപ്പാർപ്പിച്ചു
Jaihind TV News Report
Jaihind TV Web Desk
2 min read
25 reads
