തിരുവനന്തപുരം: സംസ്ഥാനത്തെ ജില്ലാ, താലൂക്ക് ആശുപത്രികളിൽ നഴ്സിങ് കോളേജുകൾ ആരംഭിക്കുമെന്ന് മുഖ്യമന്ത്രി വി.ഡി. സതീശൻ പ്രഖ്യാപിച്ചു. പ്രാരംഭഘട്ടത്തിൽ ഷിഫ്റ്റ് അടിസ്ഥാനത്തിലായിരിക്കും ഇവയുടെ പ്രവർത്തനം. ബി.എസ്സി. നഴ്സിങ്ങും അനുബന്ധ കോഴ്സുകളും ആരംഭിക്കുന്നതിനാവശ്യമായ അടിസ്ഥാന സൗകര്യങ്ങൾ ഒരു വർഷത്തിനുള്ളിൽ ആശുപത്രികളിൽ സജ്ജമാക്കുമെന്നും അദ്ദേഹം വ്യക്തമാക്കി. കേരള ഗവ. നഴ്സസ് യൂണിയൻ (കെ.ജി.എൻ.യു.) 38-ാം സംസ്ഥാന പൊതുസമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു മുഖ്യമന്ത്രി.
സംസ്ഥാനത്തെ നഴ്സിങ് സീറ്റുകൾ 50 ശതമാനം വർധിപ്പിക്കുമെന്നും നഴ്സിങ് സർവകലാശാല യാഥാർഥ്യമാക്കുമെന്നും മുഖ്യമന്ത്രി അറിയിച്ചു. ഇതിനുപുറമെ ആറുമാസത്തെ ഇന്റേൺഷിപ്പ് പരിശീലനത്തിൽ കാലോചിതമായ പരിഷ്കാരങ്ങൾ കൊണ്ടുവരും. ആശുപത്രികളിലെ രോഗികളുടെയും നഴ്സുമാരുടെയും അനുപാതം കൃത്യമായി ക്രമീകരിക്കുന്നതിനായി പുതിയ തസ്തികകൾ സൃഷ്ടിക്കുമെന്നും അദ്ദേഹം ഉറപ്പുനൽകി.
ചടങ്ങിൽ മന്ത്രി കെ. മുരളീധരൻ മുഖ്യപ്രഭാഷണം നടത്തി. കെ. കരുണാകരൻ മെമ്മോറിയൽ മെഡിക്കൽ കോളേജിന്റെ പ്രാരംഭ പ്രവർത്തനങ്ങൾക്കായി മുഖ്യമന്ത്രി ആറുകോടി രൂപ അനുവദിച്ചതായി അദ്ദേഹം അറിയിച്ചു. രണ്ടുമാസത്തിനുള്ളിൽ തൃശ്ശൂർ മെഡിക്കൽ കോളേജിൽ പെറ്റ് സ്കാൻ സംവിധാനവും തിരുവനന്തപുരം മെഡിക്കൽ കോളേജിൽ റോബോട്ടിക് സർജറിയും ആരംഭിക്കുമെന്നും മന്ത്രി പ്രഖ്യാപിച്ചു.
കെ.ജി.എൻ.യു. സംസ്ഥാന പ്രസിഡന്റ് കെ.എസ്. സന്തോഷ് ചടങ്ങിൽ അധ്യക്ഷത വഹിച്ചു. എം.എൽ.എ.മാരായ എൻ. ശക്തൻ, എം.ആർ. ബൈജു, കോൺഗ്രസ് നേതാവ് വി.എസ്. ശിവകുമാർ, കെ.പി.സി.സി. ജനറൽ സെക്രട്ടറി കെ.എസ്. ശബരീനാഥൻ, കെ.ജി.എൻ.യു. ജനറൽ സെക്രട്ടറി എസ്.എം. അനസ്, ഭാരവാഹികളായ ദിനേശ് ചന്ദന, എൽ. ആശ, ടി.എസ്. ബിന്ദു, ജോസ്മി ജോർജ് എന്നിവർ ചടങ്ങിൽ സംസാരിച്ചു.
ജില്ലാ, താലൂക്ക് ആശുപത്രികളിൽ നഴ്സിങ് കോളേജുകൾ; സീറ്റുകൾ 50 ശതമാനം വർധിപ്പിക്കുമെന്ന് മുഖ്യമന്ത്രി