കേരളത്തിലെ എം.പിമാരെയോ സംസ്ഥാന സർക്കാരിനെയോ അറിയിക്കാതെ അർദ്ധരാത്രിയിൽ എടുത്ത ഈ തീരുമാനം കർണാടകയിലെ ബി.ജെ.പി നേതൃത്വത്തെ പ്രീണിപ്പിക്കാൻ വേണ്ടിയുള്ളതാണെന്ന് വി.കെ. ശ്രീകണ്ഠൻ എം.പി കുറ്റപ്പെടുത്തി. പാലക്കാട് ഡിവിഷൻ വിഭജിക്കില്ലെന്ന് റെയിൽവേ മന്ത്രി മുൻപ് കേരളത്തിന് നൽകിയ ഉറപ്പിന്റെ ലംഘനമാണിതെന്നും അദ്ദേഹം വ്യക്തമാക്കി.
മംഗലാപുരത്തെ പാലക്കാട് ഡിവിഷനിൽ നിന്ന് ഒഴിവാക്കുന്നത് വഴി വലിയ സാമ്പത്തിക നഷ്ടമുണ്ടാക്കുകയും, വരുമാനവും ഫണ്ടും കുറച്ച് ഈ ഡിവിഷനെ പൂർണ്ണമായും തകർക്കുകയുമാണ് കേന്ദ്രസർക്കാർ ലക്ഷ്യമിടുന്നത്. ജനവിരുദ്ധമായ റെയിൽവേ ബോർഡിന്റെ ഈ നീക്കത്തിനെതിരെ പാർലമെന്റിനകത്തും പുറത്തും ശക്തമായ പ്രതിഷേധ പരിപാടികളുമായി മുന്നോട്ട് പോകുമെന്നും എം.പി മുന്നറിയിപ്പ് നൽകി.
