ന്യൂഡല്‍ഹി: വോട്ടര്‍പ്പട്ടികയുടെ തീവ്രപുനഃപരിശോധന നടത്താന്‍ കേന്ദ്ര തെരഞ്ഞെടുപ്പ് കമ്മീഷന് പൂര്‍ണ്ണ അധികാരമുണ്ടെന്ന് സുപ്രീംകോടതി. എസ്ഐആറിന്റെ നിയമസാധുത ചോദ്യം ചെയ്ത് വിവിധ രാഷ്ട്രീയപാര്‍ട്ടികളും സംഘടനകളും സമര്‍പ്പിച്ച ഹര്‍ജികള്‍ തള്ളിക്കൊണ്ടാണ് ചീഫ് ജസ്റ്റിസ് സൂര്യകാന്ത് അധ്യക്ഷനായ മൂന്നാംഗ ബെഞ്ചിന്റെ സുപ്രധാന വിധി. ജസ്റ്റിസുമാരായ ജോയ്മാല്യ ബാഗ്ചി, വിപുല്‍ എം. പഞ്ചോളി എന്നിവരായിരുന്നു ബെഞ്ചിലെ മറ്റ് അംഗങ്ങള്‍.
സ്വതന്ത്രവും നിഷ്പക്ഷവുമായ തെരഞ്ഞെടുപ്പ് ഉറപ്പാക്കാനാണ് കമ്മീഷന് ശ്രമിക്കുന്നതെന്നും, ഈ നടപടി വോട്ടര്‍പട്ടിക അട്ടിമറിക്കാനല്ല, മറിച്ച് അതിന്റെ കൃത്യത ഉറപ്പാക്കാനാണെന്നും കോടതി നിരീക്ഷിച്ചു. ഭരണഘടനയുടെ ആര്‍ട്ടിക്കിള്‍ 324, 1950 ലെ ജനപ്രാതിനിധ്യ നിയമം എന്നിവയനുസരിച്ച് വോട്ടര്‍പട്ടിക പുതുക്കാന്‍ കമ്മീഷന് അവകാശമുണ്ട്. കമ്മീഷന് നിയമപരമായ പരിധികള്‍ ലംഘിച്ചിട്ടില്ല. എസ്ഐആര്‍ പ്രക്രിയയ്ക്ക് പൗരത്വ നിര്‍ണയവുമായി യാതൊരു ബന്ധവുമില്ല. ഏതെങ്കിലും പൗരന്‍ പട്ടികയില്‍ നിന്ന് പുറത്തായാല്‍ പോലും താന്‍ ഇന്ത്യന്‍ പൗരനാണെന്ന് തെളിയിക്കുന്ന പക്ഷം പേര് വീണ്ടും ഉള്‍പ്പെടുത്താം.
ജനപ്രാതിനിധ്യ നിയമപ്രകാരം അയോഗ്യരായവരെ വോട്ടര്‍പട്ടികയില്‍ നിന്നും ഒഴിവാക്കാന്‍ തെരഞ്ഞെടുപ്പ് കമ്മീഷന് അധികാരമുണ്ട്. എന്നാല്‍ ഈ നടപടികള്‍ ജുഡീഷ്യല്‍ അവലോകനത്തിന് വിധേയമായിരിക്കും. 2025 ജൂണ്‍-സെപ്റ്റംബര്‍ കാലയളവില്‍ ബീഹാറിലാണ് എസ്ഐആര്‍ പ്രക്രിയയുടെ ആദ്യഘട്ടം ആരംഭിച്ചത്. നിലവില്‍ പദ്ധതിയുടെ മൂന്നാം ഘട്ടം തെരഞ്ഞെടുപ്പ് കമ്മീഷന് പ്രഖ്യാപിച്ചിട്ടുമുണ്ട്. വോട്ടര്‍പട്ടികയുടെ തീവ്രപുനഃപരിശോധന നടത്താനുള്ള കേന്ദ്ര തെരഞ്ഞെടുപ്പ് കമ്മീഷന്റെ നടപടി സുപ്രീംകോടതി ശരിവെച്ചു. ഇത് വോട്ടര്‍പട്ടികയുടെ കൃത്യത ഉറപ്പാക്കാനും നിഷ്പക്ഷമായ തെരഞ്ഞെടുപ്പ് നടത്താനുമുള്ള കമ്മീഷന്റെ നിയമപരമായ അധികാരമാണെന്നും ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് വ്യക്തമാക്കി.
വോട്ടര്‍പട്ടിക തീവ്രപുനഃപരിശോധന: ഹര്‍ജികള്‍ തള്ളി സുപ്രീംകോടതി; കമ്മീഷന് പൂര്‍ണ്ണ അധികാരം
Jaihind TV News Report
Jaihind TV Web Desk
Updated Oct 13, 2026
2 min read
193 reads
