തിരുവനന്തപുരം: തിരുവനന്തപുരം കോർപ്പറേഷൻ ബിജെപിയിലെ ആഭ്യന്തര തർക്കങ്ങൾക്കും രാഷ്ട്രീയ നാടകങ്ങൾക്കും ഒടുവിൽ താൽക്കാലിക ശമനം. ബിജെപി കോർപ്പറേഷൻ കൗൺസിലറായ മുൻ ഐപിഎസ് ഉദ്യോഗസ്ഥ ആർ. ശ്രീലേഖ തന്റെ രാജി തീരുമാനം പിൻവലിച്ചു. പാർട്ടി മുതിർന്ന നേതൃത്വം നേരിട്ട് ഇടപെട്ട് നടത്തിയ ചർച്ചകൾക്കും അനുനയ നീക്കങ്ങൾക്കും ഒടുവിലാണ് രാജി പിൻവലിക്കാൻ ശ്രീലേഖ തയ്യാറായത്.
നഗരസഭാ ഭരണസമിതിയിലെയും പാർട്ടിയിലെയും ആഭ്യന്തര ഭിന്നതകളെ തുടർന്നായിരുന്നു ശ്രീലേഖ രാജിവെക്കാൻ സന്നദ്ധത അറിയിച്ചിരുന്നത്. തുടർന്ന് സംസ്ഥാന നേതൃത്വം വിഷയത്തിൽ അടിയന്തരമായി ഇടപെടുകയായിരുന്നു. വരും ദിവസങ്ങളിൽ പാർട്ടിയിൽ പുതിയ സ്ഥാനമാനങ്ങളും ചുമതലകളും ഓഫർ ചെയ്തതിന്റെ അടിസ്ഥാനത്തിലാണ് അനുനയ നീക്കങ്ങളോട് ശ്രീലേഖ സഹകരിച്ചതെന്നാണ് പുറത്തുവരുന്ന വിവരങ്ങൾ.
