ന്യൂനമര്ദ്ദ പാത്തി ശക്തം; കേരളത്തില് ഇന്നും കനത്ത മഴയ്ക്ക് സാധ്യത; 11 ജില്ലകളില് യെല്ലോ അലര്ട്ട്
തിരുവനന്തപുരം: സംസ്ഥാനത്ത് ഇന്നും അതിശക്തമായ മഴ തുടരുമെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. മധ്യ-വടക്കന് കേരളത്തിലാണ് മഴ കൂടുതല് ശക്തമാകാന് സാധ്യത. ആലപ്പുഴ മുതല് കാസര്കോട് വരെയുള്ള 11 ജില്ലകളില് യെല്ലോ അലര്ട്ട് പുറപ്പെടുവിച്ചു. ജൂലൈ 10 വരെ കേരളത്തിലും മാഹിയിലും പരക്കെ മഴ ലഭിച്ചേക്കും.
മഴയ്ക്കൊപ്പം ശക്തമായ ഇടിമിന്നലിനും മണിക്കൂറില് 40 മുതല് 50 കിലോമീറ്റര് വരെ വേഗതയില് വീശിയടിച്ചേക്കാവുന്ന കാറ്റിനും സാധ്യതയുണ്ട്. തെക്കന് ഗുജറാത്ത് തീരം മുതല് വടക്കന് മധ്യകേരള തീരം വരെ സമുദ്രനിരപ്പില് തീരദേശ ന്യൂനമര്ദ്ദ പാത്തി സ്ഥിതി ചെയ്യുന്നുണ്ട്. കിഴക്കന് മധ്യപ്രദേശിന് മുകളിലുള്ള ശക്തികൂടിയ ന്യൂനമര്ദ്ദ മേഖല അടുത്ത 24 മണിക്കൂറിനുള്ളില് തെക്ക്-പടിഞ്ഞാറന് ഉത്തര്പ്രദേശ് ഭാഗത്തേക്ക് നീങ്ങാന് സാധ്യതയുണ്ട്. ഇതിന്റെ സ്വാധീനത്തിലാണ് കേരളത്തില് മഴ ശക്തമാകുന്നത്.
കേരള - കര്ണാടക - ലക്ഷദ്വീപ് തീരങ്ങളില് നാളെ വരെ മത്സ്യബന്ധനത്തിന് വിലക്കേര്പ്പെടുത്തിയിട്ടുണ്ട്. ഈ തീരങ്ങളില് മണിക്കൂറില് 40 മുതല് 50 കിലോമീറ്റര് വരെയും, ചില അവസരങ്ങളില് 60 കിലോമീറ്റര് വരെയും വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യതയുള്ളതിനാല് കടലില് പോകുന്നവര് ജാഗ്രത പാലിക്കണമെന്ന് അധികൃതര് അറിയിച്ചു.
MOST POPULAR
EDITOR'S PICK 6
TRENDING
GET DAILY UPDATES
Newsletter
Get daily news updates directly to your inbox.