അഹമ്മദാബാദ്: രഞ്ജി ട്രോഫിയില്‍ ഗുജറാത്തിനെതിരെ കേരളത്തിന് തിരിച്ചടി. ഇന്നിങ്സിനും 58 റണ്‍സിനുമാണ് ഗുജറാത്ത് കേരളത്തെ പരാജയപ്പെടുത്തിയത്. ആദ്യ ഇന്നിങ്സില്‍ 255 റണ്‍സിന്റെ കൂറ്റന്‍ ലീഡ് വഴങ്ങി ഫോളോഓണ്‍ ചെയ്ത കേരളം, രണ്ടാം ഇന്നിങ്സില്‍ 197 റണ്‍സിന് പുറത്താവുകയായിരുന്നു.
സ്‌കോര്‍ ചുരുക്കത്തില്‍:
ഗുജറാത്ത് (ആദ്യ ഇന്നിങ്സ്): 534/9 ഡിക്ലയേര്‍ഡ്
കേരളം (ആദ്യ ഇന്നിങ്സ്): 279 ഓള്‍ഔട്ട്
കേരളം (രണ്ടാം ഇന്നിങ്സ്): 197 ഓള്‍ഔട്ട്
ഒരു വിക്കറ്റിന് 41 റണ്‍സെന്ന നിലയില്‍ അവസാന ദിനം ബാറ്റിങ് ആരംഭിച്ച കേരളത്തിന് തുടക്കത്തില്‍ തന്നെ തിരിച്ചടിയേറ്റു. തലേന്നത്തെ സ്‌കോറിനോട് റണ്‍സൊന്നും കൂട്ടിച്ചേര്‍ക്കും മുന്‍പ് 29 റണ്‍സെടുത്ത അഭിഷേക് പി. നായരെ അര്‍സാന്‍ നഗ്വാസ്വെല്ല ക്ലീന്‍ ബൗള്‍ഡാക്കി. തുടര്‍ന്നെത്തിയ വരുണ്‍ നായനാര്‍ (8) സിദ്ധാര്‍ത്ഥ് ദേശായിയുടെ പന്തില്‍ ഉര്‍വില്‍ പട്ടേലിന് ക്യാച്ച് നല്‍കി മടങ്ങി. തുടര്‍ന്ന് നാലാം വിക്കറ്റില്‍ ഒന്നിച്ച സച്ചിന്‍ ബേബിയും വിഷ്ണു വിനോദും ചേര്‍ന്ന് 66 റണ്‍സ് കൂട്ടിച്ചേര്‍ത്ത് പ്രതിരോധം തീര്‍ത്തു. ലഞ്ചിന് പിരിയുമ്പോള്‍ മൂന്ന് വിക്കറ്റിന് 121 റണ്‍സെന്ന നിലയിലായിരുന്നു കേരളം.
എന്നാല്‍ ഉച്ചഭക്ഷണത്തിന് ശേഷം കളി പുനരാരംഭിച്ചയുടന്‍ വിഷ്ണു വിനോദിനെ (39) വിശാല്‍ ജയ്സ്വാള്‍ പുറത്താക്കി. തുടര്‍ന്നെത്തിയ മുഹമ്മദ് അസറുദ്ദീന്‍ (4) റണ്ണൗട്ടായതോടെ കേരളം സമ്മര്‍ദ്ദത്തിലായി. അര്‍ധസെഞ്ചുറി നേടി പൊരുതിയ ക്യാപ്റ്റന്‍ സച്ചിന്‍ ബേബി (52) അമിത് ദേശായിയുടെ പന്തില്‍ എല്‍.ബി.ഡബ്ല്യു ആയി പുറത്തായതോടെ കേരളത്തിന്റെ പ്രതീക്ഷകള്‍ അസ്തമിച്ചു.
തുടര്‍ന്നുള്ള 43 റണ്‍സിനിടെ ശേഷിച്ച നാല് വിക്കറ്റുകള്‍ കൂടി വീണതോടെ കേരള ഇന്നിങ്സ് 197 റണ്‍സില്‍ അവസാനിച്ചു. ആദിത്യ സര്‍വാതെ 30 റണ്‍സും ജലജ് സക്സേന 11 റണ്‍സുമെടുത്തു. ഗുജറാത്തിനു വേണ്ടി അര്‍സാന്‍ നഗ്വാസ്വെല്ല നാല് വിക്കറ്റും സിദ്ധാര്‍ത്ഥ് ദേശായി രണ്ട് വിക്കറ്റും വീഴ്ത്തി.
രഞ്ജി ട്രോഫി; ഗുജറാത്തിനെതിരെ കേരളത്തിന് ഇന്നിങ്സ് തോല്‍വി
Jaihind TV News Report
Jaihind TV Web Desk
2 min read
253 reads
