ഒരു സാമ്രാജ്യത്തിന്റെ അധിപനെപ്പോലെ, കൊടുങ്കാറ്റുകളെയും പ്രതിസന്ധികളെയും അനായാസം അതിജീവിച്ച് അയാള്‍ പതിറ്റാണ്ടുകളോളം പോര്‍ച്ചുഗല്‍ ഫുട്‌ബോളിനെ നയിച്ചു. ലോകം മുഴുവന്‍ അവിശ്വാസത്തോടെ നോക്കിക്കണ്ട ഒരു കാലത്തുനിന്ന്, രാജ്യത്തിന് മൂന്ന് കിരീടങ്ങളുടെ സുവര്‍ണനേട്ടങ്ങള്‍ സമ്മാനിച്ചാണ് ക്രിസ്റ്റ്യാനോ റൊണാള്‍ഡോ എന്ന ഇതിഹാസം അന്താരാഷ്ട്ര ഫുട്‌ബോളില്‍ നിന്നും പടിയിറങ്ങുന്നത്.
41-ാം വയസ്സില്‍ അമേരിക്കന്‍ മണ്ണില്‍ വെച്ച് തന്റെ അവസാന ലോകകപ്പും കളിച്ച് റൊണാള്‍ഡോ കളംവിടുമ്പോള്‍, ഫുട്‌ബോള്‍ ലോകം ഒരു യുഗാന്ത്യത്തിന് സാക്ഷ്യം വഹിക്കുകയാണ്. കരിയറില്‍ ഒരു ലോകകിരീടം എന്ന അപൂര്‍ണത ബാക്കിയാണെങ്കിലും, ചരിത്രത്തിന്റെ ഏടുകളില്‍ തന്റെ പേര് സുവര്‍ണലിപികളില്‍ എഴുതിവെച്ചാണ് റോണോയുടെ മടക്കം. ലോകകപ്പ് പ്രീക്വാര്‍ട്ടറില്‍ സ്‌പെയിനിനോട് പരാജയപ്പെട്ട് പുറത്തായ ആ നിമിഷം ചരിത്രത്തിലെ നോവായി മാറിക്കഴിഞ്ഞു. മത്സരത്തിന്റെ ഫൈനല്‍ വിസില്‍ മുഴങ്ങിയപ്പോള്‍ വികാരാധീനനായ റൊണാള്‍ഡോ മൈതാനത്ത് കണ്ണീരടക്കാന്‍ പാടുപെടുന്നത് ആരാധകരെയും വേദനയിലാഴ്ത്തി. സ്പാനിഷ് കൗമാരതാരം ലാമിന്‍ യമാല്‍ അടക്കമുള്ളവര്‍ താരത്തെ ആലിംഗനം ചെയ്ത് ആദരിച്ചു.
മത്സരശേഷം വിതുമ്പലോടെ റോണോ പറഞ്ഞ വാക്കുകള്‍ ഫുട്‌ബോള്‍ ലോകത്തിന്റെ നെഞ്ചുതകര്‍ക്കുന്നതായിരുന്നു:
'ഇങ്ങനെ ലോകകപ്പില്‍ നിന്ന് പുറത്തുപോകേണ്ടി വന്നതില്‍ എനിക്ക് ദുഃഖമുണ്ട്. ഞാന്‍ എല്ലാം നല്‍കി. എന്റെ കഴിവിന്റെ പരമാവധി ഞാന്‍ ചെയ്തു. ഒരു കുറ്റബോധവുമില്ലാതെയാണ് പോകുന്നത്. ഇത് എന്റെ അവസാന ലോകകപ്പായിരുന്നു. ഞാന്‍ പോര്‍ച്ചുഗലിനായി മൂന്ന് കിരീടങ്ങള്‍ നേടിയിട്ടുണ്ട്. എനിക്ക് മുന്‍പ് പോര്‍ച്ചുഗലിന് ഒരു കിരീടവും നേടാനായിരുന്നില്ല.'
പോര്‍ച്ചുഗലിന്റെ ഫുട്‌ബോള്‍ ചരിത്രം മാറ്റിമറിച്ച റോണോ
റൊണാള്‍ഡോയ്ക്ക് മുമ്പ് ഫുട്‌ബോള്‍ ഭൂപടത്തില്‍ പോര്‍ച്ചുഗല്‍ വലിയൊരു ശക്തിയായിരുന്നില്ല. 1966-ല്‍ യുസേബിയോയുടെ നേതൃത്വത്തില്‍ സെമിയിലെത്തിയതൊഴിച്ചാല്‍, ഇരുപതാം നൂറ്റാണ്ടില്‍ പലപ്പോഴും വലിയ ടൂര്‍ണമെന്റുകളില്‍ നിന്ന് അവര്‍ നിരാശയോടെ മടങ്ങിയിരുന്നു. ലൂയിസ് ഫിഗോയും റൂയി കോസ്റ്റയും അടങ്ങിയ സുവര്‍ണ തലമുറ പ്രതീക്ഷകള്‍ നല്‍കിയെങ്കിലും ലോകകിരീടം മാത്രം അകന്നുനിന്നു.
ആ പ്രതിസന്ധിഘട്ടത്തിലാണ് ഫിഗോയുടെ ഏഴാം നമ്പര്‍ കുപ്പായവുമണിഞ്ഞ് ക്രിസ്റ്റ്യാനോ റൊണാള്‍ഡോ എന്ന അത്ഭുതം അവതരിക്കുന്നത്. പിന്നീടുള്ള ചരിത്രം രാജ്യത്തിനായി പോരാടിയ ഒരു പോരാളിയുടെ മാത്രം കഥയാണ്. 2016-ല്‍ പോര്‍ച്ചുഗലിന് അവരുടെ ആദ്യ യൂറോപ്യന്‍ ചാമ്പ്യന്‍ഷിപ്പ് കിരീടം നേടിക്കൊടുത്തുകൊണ്ട് റോണോ തന്റെ രാജ്യത്തിന്റെ കായിക ചരിത്രം തന്നെ മാറ്റിപ്പണിതു.
റെക്കോഡുകളുടെ പെരുമഴയോടെ ഒരു വിടവാങ്ങല്‍
ആറ് ലോകകപ്പുകളില്‍ ഗോള്‍ നേടുന്ന ലോകത്തിലെ ഏക താരമെന്ന ചരിത്രനേട്ടത്തോടെയാണ് റൊണാള്‍ഡോ വിടപറയുന്നത്. ഉസ്‌ബെക്കിസ്താനെതിരായ മത്സരത്തില്‍ ആറാം മിനിറ്റില്‍ വലകുലുക്കിക്കൊണ്ട് തനിക്കെതിരെയുള്ള വിമര്‍ശനങ്ങള്‍ക്ക് താരം ചുട്ടമറുപടി നല്‍കി. 41 വയസ്സും 138 ദിവസവും പ്രായമുള്ളപ്പോള്‍ ഗോള്‍ നേടിക്കൊണ്ട് ലോകകപ്പിലെ എക്കാലത്തെയും പ്രായംകൂടിയ രണ്ടാമത്തെ ഗോള്‍വേട്ടക്കാരനാകാനും അദ്ദേഹത്തിന് കഴിഞ്ഞു. (1994-ല്‍ റഷ്യക്കെതിരെ ഗോള്‍ നേടിയ കാമറൂണിന്റെ റോജര്‍ മില്ലയാണ് (42 വയസ്സ്) ഈ പട്ടികയില്‍ ഒന്നാമത്).
ആദ്യ മത്സരങ്ങളില്‍ തിരിച്ചടികള്‍ നേരിട്ടെങ്കിലും, തളരാത്ത പോരാട്ടവീര്യവുമായി അവസാന നിമിഷം വരെ പൊരുതിയ റോണോ പുതിയൊരു ചരിത്രമെഴുതിയാണ് മൈതാനത്തോട് വിടപറയുന്നത്.
