മുൻ ആരോഗ്യ മന്ത്രിമാരായ പി.കെ. ശ്രീമതി, കെ.കെ. ശൈലജ, വീണ ജോർജ് എന്നിവർ ചേര്‍ന്ന് ആരോഗ്യ വകുപ്പിനെതിരെ നടത്തിയ സംയുക്ത വാർത്താസമ്മേളനത്തിലെ വിമർശനങ്ങൾക്കെതിരെ രൂക്ഷമായ മറുപടിയുമായി ആരോഗ്യ മന്ത്രി കെ. മുരളീധരൻ. കോഴിക്കോട്ട് മാധ്യമങ്ങളോട് സംസാരിക്കവെ, മുൻ മന്ത്രിമാരുടെ ആരോപണങ്ങൾക്ക് പുല്ലുവില പോലും കൽപ്പിക്കുന്നില്ലെന്ന് അദ്ദേഹം വ്യക്തമാക്കി. തനിക്ക് അവരുടെ സർട്ടിഫിക്കറ്റിന്റെ ആവശ്യമില്ലെന്നും, ആരോഗ്യ വകുപ്പ് നശിപ്പിച്ചു കളഞ്ഞ മൂന്നു പേരാണ് ഈ ആരോപണങ്ങൾക്ക് പിന്നിലെന്നും അദ്ദേഹം കുറ്റപ്പെടുത്തി.
കുട്ടികൾക്ക് നൽകുന്ന മരുന്നുകളുമായി ബന്ധപ്പെട്ട വിവാദത്തിലും മന്ത്രി നിലപാട് വ്യക്തമാക്കി. ലക്ഷങ്ങൾ വിലമതിക്കുന്ന വിദേശ മരുന്നുകൾക്ക് പകരം, അതേ ഗുണനിലവാരമുള്ള ഇന്ത്യൻ നിർമ്മിത ജനറിക് മരുന്നുകൾ കുറഞ്ഞ ചെലവിൽ ലഭ്യമാക്കുകയാണ് സർക്കാരിന്റെ ലക്ഷ്യമെന്ന് അദ്ദേഹം പറഞ്ഞു. അഞ്ചു ലക്ഷം രൂപയുടെ മരുന്നിന് പകരം എണ്ണായിരം രൂപയുടെ മികച്ച ഇന്ത്യൻ മരുന്നാണ് കുട്ടികൾക്ക് നൽകുന്നത്. എം.ബി.ബി.എസ് പാസായ ഡോക്ടർമാർ ഉൾപ്പെടെയുള്ളവർ ഈ ജനറിക് മരുന്നുകൾ നല്ലതാണെന്ന് സാക്ഷ്യപ്പെടുത്തുന്നുണ്ടെന്നും, അതുകൊണ്ടുതന്നെ ഈ മരുന്നുതന്നെ തുടര്‍ന്നും നൽകുമെന്നും അദ്ദേഹം കൂട്ടിച്ചേർത്തു.
താൻ സ്ഥാനത്ത് തുടരുന്നിടത്തോളം കാലം വിദേശ മരുന്ന് കമ്പനികളെ പ്രോത്സാഹിപ്പിക്കില്ലെന്ന് കെ. മുരളീധരൻ ഉറപ്പിച്ചു പറഞ്ഞു. വരും നാലു വർഷവും താൻ തന്നെയായിരിക്കും സംസ്ഥാനത്തെ ആരോഗ്യ മന്തിയെന്നും, അത് തീരുമാനിക്കുന്നത് തന്റെ പാർട്ടിയാണെന്നും വ്യക്തമാക്കിയ അദ്ദേഹം, അതുകൊണ്ടുതന്നെ മറ്റാരുടെയും സർട്ടിഫിക്കറ്റ് തനിക്ക് ആവശ്യമില്ലെന്നും കൂട്ടിച്ചേർത്തു.
