മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുകൊണ്ട് കോൺഗ്രസ് ആരംഭിച്ച സമരം പുതിയ തലങ്ങളിലേക്ക് വ്യാപിക്കുന്നു. വോട്ടർ പട്ടിക പുതുക്കുന്നതുമായി ബന്ധപ്പെട്ട് ഉയർന്ന അപാകതകളും തിരഞ്ഞെടുപ്പ് കമ്മീഷന്റെ ഭാഗത്തുനിന്നുണ്ടാകുന്ന ബി.ജെ.പി അനുകൂല സമീപനങ്ങളും ചൂണ്ടിക്കാണിച്ചാണ് കോൺഗ്രസ്സ് പ്രക്ഷോഭം കൂടുതൽ തീവ്രമാക്കുന്നത്.
പ്രശ്നത്തിൽ ശക്തമായ നടപടി ആവശ്യപ്പെട്ട് രാജ്യവ്യാപകമായി പ്രതിഷേധ പരിപാടികൾക്കാണ് പാർട്ടി നേതൃത്വം ആഹ്വാനം നൽകിയിരിക്കുന്നത്. ഇതിന്റെ ഭാഗമായി വിവിധ കേന്ദ്രങ്ങളിൽ പ്രതിഷേധ മാർച്ചുകളും മറ്റ് ധർണ്ണാ പരിപാടികളും ഇന്ന് സജീവമായി തുടരുകയാണ്.
