'പണി'ക്ക് ശേഷം വീണ്ടും ഞെട്ടിക്കാൻ സാഗർ സൂര്യ; 'ഭൗമ'യിലെ ജേക്കബ്ബ് എത്തുന്ന പോസ്റ്റർ വൈറൽ

മനോഹരമായ ഒരു ബംഗ്ലാവിലെ ഡൈനിംഗ് ടേബിളിൽ ഇരുവശത്തും കത്തിനിൽക്കുന്ന മെഴുകുതിരികൾക്ക് നടുവിലായി, ഓവർകോട്ട് ധരിച്ച് വൈൻ ഗ്ലാസ്സുമായി നിൽക്കുന്ന സാഗർ സൂര്യയുടെ സ്റ്റൈലിഷ് പോസ്റ്റർ പുറത്തുവിട്ടു. റെജിൻ എസ്. ബാബു തിരക്കഥയെഴുതി സംവിധാനം ചെയ്യുന്ന 'ഭൗമ' എന്ന ചിത്രത്തിലെ 'ജേക്കബ്' എന്ന കഥാപാത്രത്തെയാണ് പോസ്റ്ററിലൂടെ അണിയറപ്രവർത്തകർ പ്രേക്ഷകർക്ക് മുന്നിൽ പരിചയപ്പെടുത്തിയിരിക്കുന്നത്. ജോജു ജോർജ് സംവിധാനം ചെയ്ത 'പണി', 'പ്രകമ്പനം' എന്നീ ചിത്രങ്ങളിലെ മികച്ച പ്രകടനങ്ങൾക്ക് ശേഷം സാഗർ സൂര്യ എത്തുന്നു എന്ന പ്രത്യേകതയും ഈ കഥാപാത്രത്തിനുണ്ട്.

പാശ്ചാത്യ സംസ്‌കാരവും മഞ്ഞണിഞ്ഞ മനോഹരമായ പശ്ചാത്തലവും ദുരൂഹതകളും കോർത്തിണക്കി ഒരുക്കുന്ന ഒരു മിസ്റ്ററി ത്രില്ലർ ചിത്രമാണ് 'ഭൗമ'. ആറ്റസ് ഫിലിംസിന്റെ ബാനറിൽ ബസം കാദിയാർ നിർമ്മിക്കുന്ന ചിത്രം നവംബർ 12-ന് ഭാവനാ റിലീസ് തിയേറ്ററുകളിൽ എത്തിക്കും. ചിത്രത്തിന്റെ പ്രൊമോഷന്റെ ഭാഗമായി പുറത്തുവിട്ട സാഗർ സൂര്യയുടെ പുതിയ ലുക്ക് സോഷ്യൽ മീഡിയയിൽ ഇതിനോടകം വലിയ തരംഗം സൃഷ്ടിച്ചു കഴിഞ്ഞു. കൊച്ചി, പീരുമേട് എന്നിവിടങ്ങളിലായിട്ടാണ് ചിത്രത്തിന്റെ ചിത്രീകരണം പൂർത്തിയാക്കിയത്.

സാഗർ സൂര്യയ്ക്ക് പുറമെ ദിലീഷ് പോത്തൻ, വിനീത്, വിജയ് ബാബു, ജാഫർ ഇടുക്കി, രഘുനാഥ് പലേരി, സെന്തിൽ കൃഷ്‌ണ, മധുപാൽ, മണിക്കുട്ടൻ, ഭഗത് മാനുവൽ, ലെന, മെറിൻ ഫിലിപ്പ് തുടങ്ങി വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്. ഡോണി കടമ്മനിട്ടയുടെ കഥയ്ക്ക് ക്രിസ്റ്റോ സേവ്യറാണ് സംഗീതം പകരുന്നത്. ശരൺ വേലായുധൻ ഛായാഗ്രഹണവും സൂരജ് ഇ.എസ്. എഡിറ്റിംഗും നിർവ്വഹിക്കുന്നു.