മലയാള സിനിമാസ്വാദകരുടെ സോഷ്യല്‍ മീഡിയ ഫീഡുകളെ ഇളക്കിമറിച്ച് പുതിയൊരു സംഗീത വിരുന്ന്. ചെമ്പന്‍ വിനോദ് ജോസ്, ദേവ് മോഹന്‍, ലുക്മാന്‍, ആന്റണി പെപ്പെ എന്നിവര്‍ ഒന്നിച്ച് തകര്‍പ്പന്‍ പ്രകടനം കാഴ്ചവെക്കുന്ന 'ഡിസ്കോ' എന്ന ചിത്രത്തിലെ 'ഇതിന്നോ ആദമേ' ഗാനം യൂട്യൂബില്‍ ഇതിനോടകം 8 ദശലക്ഷത്തിലധികം കാഴ്ചക്കാരെ നേടി ട്രെന്‍ഡിങ്ങില്‍ ഒന്നാമതായി കുതിക്കുകയാണ്.
പരമ്പരാഗത മാര്‍ഗംകളി താളങ്ങളെയും നാടന്‍ നാടോടി ശൈലികളെയും ഇന്നത്തെ തലമുറയുടെ ആവേശത്തിനൊത്ത റാപ്പ് ബീറ്റുകളുമായി ലയിപ്പിച്ചാണ് സംഗീതസംവിധായകന്‍ മണികണ്ഠന്‍ അയ്യപ്പ ഈ ഗാനം ഒരുക്കിയിരിക്കുന്നത്. ഇന്‍സ്ട്രുമന്റേഷനിലെ മാന്ത്രികതയും പാട്ടിന്റെ ചടുലതയും കേള്‍വിക്കാരെ തന്നിലേക്ക് ആകര്‍ഷിക്കുന്നു. സുഹൈല്‍ കോയയും ലെമയും ചേര്‍ന്ന് വരികള്‍ രചിച്ചിരിക്കുന്ന ഈ ഗാനം ആലപിച്ചിരിക്കുന്നത് ചെമ്പന്‍ വിനോദ് ജോസ്, ഹിംന ഹിളാരി, ഹിനിത ഹിളാരി, നൗഷാദ് തൃശ്ശൂര്‍, മണികണ്ഠന്‍ അയ്യപ്പ, റോക്കി ഫുവോക്കോ എന്നിവര്‍ ചേര്‍ന്നാണ്. മിക്‌സിങ്ങും മാസ്റ്ററിങ്ങും നിര്‍വ്വഹിച്ചിരിക്കുന്നത് അബിന്‍ പോളാണ്.
ഉല്ലാസ് ചെമ്പന്റെ സഹോദരനും നടനും എഴുത്തുകാരനുമായ ചെമ്പന്‍ വിനോദ് തിരക്കഥയൊരുക്കുന്ന ഈ ചിത്രം ചെമ്പോസ്‌കി മോഷന്‍ പിക്‌ചേഴ്‌സിന്റെയും ഫാര്‍സ് ഫിലിംസിന്റെയും ബാനറിലാണ് നിര്‍മ്മിക്കുന്നത്. അങ്കമാലി ഡയറീസിന് ശേഷം ചെമ്പന്‍ വിനോദ് ജോസ് തിരക്കഥയെഴുതുന്ന ചിത്രത്തില്‍ ആന്റണി വര്‍ഗീസ് പെപ്പെ പ്രധാന വേഷത്തിലെത്തുന്നുണ്ട് എന്നതും പ്രത്യേകതയാണ്.
ദേവ് മോഹന്റെ റോ-ബോള്‍ഡ് കാരക്ടര്‍ പോസ്റ്റര്‍ ഇതിനോടകം ആരാധകശ്രദ്ധ പിടിച്ചുപറ്റിയിട്ടുണ്ട്. അര്‍ജുന്‍ അശോകന്‍, ശ്രീനാഥ് ഭാസി, വിഷ്ണു ഉണ്ണികൃഷ്ണന്‍ തുടങ്ങി വന്‍ താരനിരയാണ് ചിത്രത്തിലുള്ളത്. അര്‍മോ ക്യാമറ ചലിപ്പിക്കുന്ന ചിത്രത്തിന്റെ എഡിറ്റിംഗ് രോഹിത് വി.എസ് വാരിയത്താണ്. നവംബര്‍ 6-ന് ചിത്രം ലോകമെമ്പാടുമുള്ള തിയേറ്ററുകളില്‍ റിലീസ് ചെയ്യും.
മാർഗംകളി താളവും റാപ്പും ഒന്നിച്ച്; തരംഗമായി 'ഡിസ്കോ'യിലെ 'ഇതിന്നോ ആദമേ' ഗാനം, നവംബർ 6-ന് ചിത്രം റിലീസ്
Jaihind TV News Report
Jaihind TV Web Desk
2 min read
147 reads
