മാസപ്പടി കേസുമായി ബന്ധപ്പെട്ട് ബി.ജെ.പി നേതാവ് ഷോൺ ജോർജ് നടത്തിയ വാർത്താസമ്മേളനത്തിൽ പാർട്ടിയിലെ മുതിർന്ന നേതാക്കൾക്ക് കടുത്ത അതൃപ്തി. പാർട്ടിയോട് ആലോചിക്കാതെ ഷോൺ പല വിഷയങ്ങളിലും പരസ്യ നിലപാട് സ്വീകരിക്കുന്നതാണ് പ്രധാന അമർഷത്തിന് കാരണം. ഷോണിന്റെ ഇത്തരത്തിലുള്ള അഭിപ്രായപ്രകടനങ്ങൾ പലപ്പോഴും പാർട്ടിയെയും മുതിർന്ന നേതാക്കളെയും പ്രതിസന്ധിയിലാക്കുന്നു എന്നാണ് ബി.ജെ.പിയിലെ പൊതുവായ വിലയിരുത്തൽ.
കഴിഞ്ഞ ദിവസം പുറത്തുവന്ന കരിമണൽ കർത്തയുടെ ഡയറിയിലെ വിവരങ്ങളാണ് പുതിയ തർക്കങ്ങൾക്ക് വഴിതുറന്നത്. ഡയറിയുടെ ഒരു പേജ് ഷോൺ ജോർജ് പുറത്തുവിടുമ്പോൾ മുൻ കേന്ദ്രമന്ത്രി വി. മുരളീധരൻ ബി.ജെ.പി പാർട്ടി ഓഫീസിൽ ഉണ്ടായിരുന്നു. ഷോൺ പുറത്തുവിട്ട പേജിൽ ബി.ജെ.പി നേതാക്കളുടെ പേരുകൾ ഉണ്ടായിരുന്നില്ലെങ്കിലും, തൊട്ടുപിന്നാലെ വി. മുരളീധരന്റെ പേരും അടങ്ങിയ വിവരങ്ങൾ പുറത്തുവരികയായിരുന്നു. വാർത്താസമ്മേളനത്തിനിടെത്തന്നെ മുരളീധരൻ ഈ ആരോപണങ്ങൾ തള്ളിക്കളഞ്ഞിരുന്നു.
എന്നാൽ, തൊട്ടടുത്ത ദിവസം ഷോണിന്റെ നടപടിയിൽ കടുത്ത പ്രതിഷേധമാണ് വി. മുരളീധരൻ പരസ്യമാക്കിയത്. രേഖകളുടെ സത്യവസ്ഥ പരിശോധിക്കേണ്ട ഉത്തരവാദിത്തം തനിക്കില്ലെന്നും, ദേശീയ നിർവാഹകസമിതി അംഗത്തിനോ മുൻ കേന്ദ്രമന്ത്രിക്കോ ഇതിന്റെ ഉറവിടത്തെക്കുറിച്ച് എങ്ങനെ അറിയാനാണെന്നും അദ്ദേഹം ചോദിച്ചു. കൃത്യമായി ആദായനികുതി അടയ്ക്കുന്ന ആളാണ് താനെന്ന് വ്യക്തമാക്കി ആരോപണങ്ങളെ പ്രതിരോധിച്ച മുരളീധരൻ, ഷോണിന്റെ നീക്കങ്ങളിലുള്ള അതൃപ്തി തുറന്നടിച്ചു. ഷോൺ നടത്തിയ ആരോപണങ്ങൾ ബി.ജെ.പിക്ക് തന്നെ തിരിച്ചടിയായെന്നാണ് പാർട്ടിയിലെ മുരളീധരപക്ഷത്തിന്റെയും കൃഷ്ണദാസ് പക്ഷത്തിന്റെയും വിലയിരുത്തൽ.
