ഡാലസ്: ക്രിസ്റ്റ്യാനോ റൊണാള്‍ഡോയ്ക്കും പോര്‍ച്ചുഗലിനും ലോകകപ്പ് പ്രീ-ക്വാര്‍ട്ടറില്‍ നിരാശാജനകമായ മടക്കം. തിങ്കളാഴ്ച രാത്രി നടന്ന ആവേശകരമായ നോക്കൗട്ട് മത്സരത്തില്‍ സ്‌പെയിന്‍ 1-0 നാണ് പോര്‍ച്ചുഗലിനെ പരാജയപ്പെടുത്തിയത്. മത്സരത്തിന്റെ 91-ാം മിനിറ്റില്‍ മിഖേല്‍ മെറിനോ നേടിയ ഗോളാണ് മത്സരത്തില്‍ നിര്‍ണ്ണായകമായത്. ഇതോടെ റൊണാള്‍ഡോയുടെ നീണ്ട ലോകകപ്പ് കരിയറിനാണ് ഡാലസ് സ്റ്റേഡിയത്തില്‍ അവസാനമായത്.
റഫറിയുടെ ഫൈനല്‍ വിസില്‍ മുഴങ്ങിയതിന് പിന്നാലെ ഏറെ നിരാശനായി കാണപ്പെട്ട റൊണാള്‍ഡോ, കണ്ണ് തുടച്ചുകൊണ്ട് ആരാധകരെ അഭിവാദ്യം ചെയ്താണ് മൈതാനം വിട്ടത്. ടൂര്‍ണമെന്റിന് മുന്‍പ് തന്നെ ഇത് തന്റെ അവസാന ലോകകപ്പായിരിക്കുമെന്ന് താരം വ്യക്തമാക്കിയിരുന്നു. ലോകകപ്പ് കിരീടം നേടാന്‍ കഴിഞ്ഞില്ലെങ്കിലും വലിയ റെക്കോര്‍ഡുകളുമായാണ് റൊണാള്‍ഡോ ലോകകപ്പ് വേദികളില്‍ നിന്ന് പടിയിറങ്ങുന്നത്. ഗ്രൂപ്പ് ഘട്ടത്തില്‍ ആറ് ഫിഫ ലോകകപ്പുകളില്‍ കളിക്കുന്ന ആദ്യ താരം എന്ന ചരിത്ര നേട്ടം അദ്ദേഹം സ്വന്തമാക്കിയിരുന്നു. ഈ ടൂര്‍ണമെന്റില്‍ ഉസ്‌ബെക്കിസ്ഥാനെതിരെ രണ്ട് ഗോളുകള്‍ നേടിയ താരം, ക്രോയേഷ്യക്കെതിരായ മത്സരത്തില്‍ പെനാല്‍റ്റിയും ലക്ഷ്യത്തിലെത്തിച്ചിരുന്നു.
കഴിഞ്ഞ രണ്ട് പതിറ്റാണ്ടിനിടെ ആറ് ലോകകപ്പുകളില്‍ പോര്‍ച്ചുഗലിനായി ബൂട്ട് കെട്ടിയെങ്കിലും ട്രോഫി നേടുക എന്ന സ്വപ്നം മാത്രം ബാക്കിയായി. എങ്കിലും 2016-ല്‍ യൂറോ കപ്പും, 2019, 2025 വര്‍ഷങ്ങളില്‍ നേഷന്‍സ് ലീഗ് കിരീടങ്ങളും പോര്‍ച്ചുഗലിന് നേടിക്കൊടുത്ത റൊണാള്‍ഡോ വലിയൊരു രാജ്യാന്തര കരിയര്‍ തന്നെയാണ് അവശേഷിപ്പിക്കുന്നത്. ലോകകപ്പ് വേദിയിലെ റൊണാള്‍ഡോയുടെ അധ്യായം അവസാനിച്ചെങ്കിലും, അന്താരാഷ്ട്ര ഫുട്‌ബോളില്‍ അദ്ദേഹം തുടരുമോ എന്ന കാര്യത്തില്‍ വരും ദിവസങ്ങളില്‍ തീരുമാനമുണ്ടാകും.
ഡാലസിലെ പുല്‍മൈതാനത്ത് വീണ ആ കണ്ണീര്‍ത്തുള്ളികള്‍ കേവലം ഒരു പരാജയത്തിന്റെ വേദനയല്ല, മറിച്ച്, സര്‍വ്വതും കീഴടക്കിയിട്ടും കാലത്തിന്റെ അതിരുകള്‍ക്ക് മുന്നില്‍ വഴങ്ങേണ്ടി വന്ന ഒരു മഹാപ്രതിഭയുടെ ആത്മസംഘര്‍ഷങ്ങളുടെ നേര്‍ച്ചിത്രമായിരുന്നു അത്. ലോകകപ്പിന്റെ വലിയ വേദിയില്‍ ഇനി ആ ഏഴാം നമ്പര്‍ ജേഴ്‌സി ഉണ്ടാകില്ലെങ്കിലും, അദ്ദേഹം അവശേഷിപ്പിച്ചു പോകുന്ന ഓര്‍മ്മകള്‍ക്ക് ഫുട്‌ബോളിനോളം തന്നെ ആയുസ്സുണ്ടാകും.
കാലം കാത്തുവെക്കാത്ത കിരീടം; കണ്ണീരണിഞ്ഞ് റൊണാള്‍ഡോ മടങ്ങി
Jaihind TV News Report
Jaihind TV Web Desk
Updated Oct 12, 2026
3 min read
777 reads
