ആവേശപ്പോരാട്ടത്തിൽ ഇക്വഡോറിനെ എതിരില്ലാത്ത രണ്ട് ഗോളുകൾക്ക് വീഴ്ത്തി ആതിഥേയരായ മെക്സിക്കോ ലോകകപ്പിന്റെ പ്രീ ക്വാർട്ടറിലേക്ക് യോഗ്യത നേടി. കനത്ത മഴയും ഇടിമിന്നലും കാരണം നിശ്ചിത സമയത്തിലും വൈകി ആരംഭിച്ച മത്സരത്തിന്റെ ആദ്യ പകുതിയിലാണ് രണ്ട് ഗോളുകളും പിറന്നത്. തുടക്കം മുതൽ കളിയിലുടനീളം വ്യക്തമായ ആധിപത്യം പുലർത്തിയ മെക്സിക്കോയ്ക്ക് മുന്നിൽ ഇക്വഡോറിന് മറുപടിയില്ലായിരുന്നു. പ്രീ ക്വാർട്ടറിൽ ഇംഗ്ലണ്ട് - ഡി.ആർ കോംഗോ മത്സരത്തിലെ വിജയികളെയായിരിക്കും മെക്സിക്കോ നേരിടുക.
മത്സരത്തിന്റെ 22-ാം മിനിറ്റിൽ മികച്ചൊരു മുന്നേറ്റത്തിനൊടുവിൽ ഹൂലിയൻ ക്വിനോനെസ് നേടിയ ഗോളിലൂടെയാണ് മെക്സിക്കോ ആദ്യ വെടിപൊട്ടിച്ചത്. ഈ ഗോളിന്റെ ആവേശം അടങ്ങും മുൻപ് തന്നെ ആതിഥേയർ അടുത്ത പ്രഹരവും ഏൽപ്പിച്ചു. 31-ാം മിനിറ്റിൽ ലഭിച്ച സുവർണ്ണാവസരം പ്രയോജനപ്പെടുത്തി പരിചയസമ്പന്നനായ സ്ട്രൈക്കർ റൗൾ ഹിമെനെസ് മെക്സിക്കോയുടെ ലീഡ് രണ്ടാക്കി ഉയർത്തി (2-0). ആദ്യ പകുതിയിൽ ഇക്വഡോറിനെ പൂർണ്ണമായും പ്രതിരോധത്തിലാക്കാൻ മെക്സിക്കൻ പടയ്ക്ക് സാധിച്ചു.
രണ്ടാം പകുതിയിൽ പന്തടക്കത്തിൽ ഇക്വഡോർ അൽപം മുന്നിട്ടുനിന്നെങ്കിലും മെക്സിക്കോയുടെ ശക്തമായ പ്രതിരോധ കോട്ട ഭേദിക്കാൻ അവർക്കായില്ല. സൂപ്പർ താരം എന്നെർ വലൻസിയയും സംഘവും എണ്ണപ്പെട്ട ചില അവസരങ്ങൾ സൃഷ്ടിച്ചെങ്കിലും അതൊന്നും ഗോളാക്കി മാറ്റാൻ മെക്സിക്കൻ പ്രതിരോധം അനുവദിച്ചില്ല. മത്സരത്തിന്റെ അവസാന മിനിറ്റുകളിൽ കളി പരുക്കനായതോടെ ഇക്വഡോർ താരങ്ങളായ അലൻ ഫ്രാങ്കോ, കെൻട്രി പായേസ്, മോയ്സസ് കൈസെഡോ എന്നിവർ മഞ്ഞക്കാർഡ് വാങ്ങി. കളി അവസാനിക്കാൻ നിമിഷങ്ങൾ മാത്രം ബാക്കിനിൽക്കെ വായ പൊത്തി സംസാരിച്ചതിന് ഇക്വഡോർ താരം പിയറോ ഹിൻകാപിക്ക് ചുവപ്പ് കാർഡ് കണ്ട് പുറത്തുപോകേണ്ടി വന്നതോടെ പത്തുപേരുമായാണ് ഇക്വഡോർ മത്സരം പൂർത്തിയാക്കിയത്.
