മുഖ്യമന്ത്രിക്കെതിരെ വ്യാജ രേഖകൾ ഉപയോഗിച്ച് അധിക്ഷേപ പ്രചാരണം നടത്താൻ ശ്രമിച്ചെന്ന കേസിൽ റിപ്പോർട്ടർ ടിവി മാനേജിങ് ഡയറക്ടർ ആന്റോ അഗസ്റ്റിനെ പോലീസ് ഇന്ന് ചോദ്യം ചെയ്യും. അന്വേഷണത്തിന്റെ ഭാഗമായി കളമശ്ശേരി പോലീസ് സ്റ്റേഷനിൽ നേരിട്ട് ഹാജരാകാനാണ് അദ്ദേഹത്തിന് നിർദേശം നൽകിയിരിക്കുന്നത്. വ്യാജരേഖ ചമയ്ക്കൽ, ഗൂഢാലോചന, അപകീർത്തിപ്പെടുത്തൽ എന്നീ വകുപ്പുകൾ ചുമത്തി രജിസ്റ്റർ ചെയ്ത കേസിൽ തുടരന്വേഷണത്തിനായി പോലീസ് അയച്ച സമൻസിന്റെ അടിസ്ഥാനത്തിലാണ് ഈ നടപടി.
അതേസമയം, പ്രശസ്ത ഫുട്ബോൾ താരം ലയണൽ മെസ്സിയെയും അർജന്റീന ടീമിനെയും കേരളത്തിലെത്തിക്കാമെന്ന് വാഗ്ദാനം നൽകി കോടികളുടെ സാമ്പത്തിക തട്ടിപ്പ് നടത്തിയെന്ന കേസിൽ ആന്റോ അഗസ്റ്റിൻ സമർപ്പിച്ച മുൻകൂർ ജാമ്യാപേക്ഷയിൽ കോടതി ഇന്ന് വിധി പ്രസ്താവിക്കും. എറണാകുളം പ്രിൻസിപ്പൽ സെഷൻസ് കോടതിയാണ് വാദം പൂർത്തിയാക്കി ഹർജിയിൽ അന്തിമ തീരുമാനം പറയുന്നത്. അറസ്റ്റ് ഭയന്നാണ് ആന്റോ അഗസ്റ്റിൻ മുൻകൂർ ജാമ്യം തേടിയത്, എന്നാൽ നിലവിൽ അറസ്റ്റ് ചെയ്യേണ്ടതില്ലെന്നും ചോദ്യം ചെയ്യലിന് ഹാജരാകാൻ നോട്ടീസ് നൽകുമെന്നുമാണ് അന്വേഷണ സംഘം കോടതിയെ അറിയിച്ചിട്ടുള്ളത്.
