ചീഫ് ഇലക്ഷൻ കമ്മീഷണർ ഗ്യാനേഷ് കുമാറിനെതിരെ ജന്തർ മന്തറിൽ സംഘടിപ്പിക്കുന്ന വമ്പൻ പ്രതിഷേധത്തിന് നേതൃത്വം നൽകാനായി കോക്ക്റോച്ച് ജനതാ പാർട്ടി (CJP) സ്ഥാപകൻ അഭിജീത് ദീപ്കെ ഡൽഹിയിലേക്ക് തിരിച്ചു. പ്രതിഷേധ സമരം ആരംഭിക്കുന്നതിന് മുൻപ് തന്നെ പ്രധാനമന്ത്രി നരേന്ദ്ര മോദി 'തോൽവി സമ്മതിച്ചു' എന്ന് അദ്ദേഹം ആരോപിച്ചു.
മുംബൈയിൽ നിന്ന് വിമാനത്തിൽ കയറുന്നതിന് തൊട്ടുമുമ്പ് എക്‌സിൽ (X) പങ്കുവെച്ച കുറിപ്പിൽ, പ്രതിഷേധക്കാർക്ക് നേരെ നടത്തുന്ന നടപടികളും ഡൽഹി നഗരം അടച്ചിടുന്നതും സർക്കാരിന്റെ കരുത്തെയല്ല കാണിക്കുന്നതെന്ന് ദീപ്കെ പറഞ്ഞു. സ്വന്തം ജനങ്ങളെ ഭയപ്പെടുന്ന ഒരു നേതാവിന്റെ ഭയമാണ് ഇതിലൂടെ വ്യക്തമാകുന്നതെന്നും അദ്ദേഹം കൂട്ടിച്ചേർത്തു.
മുംബൈ വെർലിയിലെ ഫോർ സീസൺസ് ഹോട്ടലിൽ നിന്ന് രാവിലെ 6.50-ഓടെയാണ് ദീപ്കെ വിമാനത്താവളത്തിലേക്ക് തിരിച്ചത്. വിമാനത്താവളത്തിൽ മാധ്യമങ്ങളോട് സംസാരിക്കവെ, പ്രതിഷേധത്തിന് മുന്നോടിയായി ഡൽഹിയിൽ ഏർപ്പെടുത്തിയ അഭൂതപൂർവ്വമായ സുരക്ഷാ നിയന്ത്രണങ്ങളും ട്രെയിൻ സർവീസുകൾ റദ്ദാക്കിയതും ചൂണ്ടിക്കാട്ടി സർക്കാർ ഭയന്നിരിക്കുകയാണെന്ന് അദ്ദേഹം പറഞ്ഞു. തങ്ങളുടെ പ്രതിഷേധം ആരംഭിക്കും മുന്നേ തന്നെ മോദി തോൽവി സമ്മതിച്ചതായി അദ്ദേഹം എക്‌സിലൂടെ ആവർത്തിച്ചു. ദീപ്കെ രാവിലെ 10 മണിയോടെ ഡൽഹിയിൽ എത്തുമെന്നാണ് സി.ജെ.പി ഭാരവാഹികൾ അറിയിച്ചത്.
പ്രത്യേക തീവ്ര വോട്ടർപട്ടിക പുതുക്കൽ (SIR) നടപടികളിലെ അട്ടിമറി, വോട്ടർ രജിസ്ട്രേഷനായുള്ള ഫോം 6 മായി ബന്ധപ്പെട്ട ക്രമക്കേടുകൾ എന്നിവ ആരോപിച്ചാണ് ചീഫ് ഇലക്ഷൻ കമ്മീഷണർ ഗ്യാനേഷ് കുമാറിന്റെ രാജിയാവശ്യപ്പെട്ട് സി.ജെ.പി സമരം പ്രഖ്യാപിച്ചത്.
സുരക്ഷാ കാരണങ്ങളും നടപടിക്രമങ്ങളും ചൂണ്ടിക്കാട്ടി ജന്തർ മന്തറിൽ പ്രഖ്യാപിച്ച പ്രതിഷേധത്തിന് ഡൽഹി പോലീസ് അനുമതി നിഷേധിച്ചിട്ടുണ്ട്. ന്യൂഡൽഹി മേഖലയിൽ നിരോധനാജ്ഞ പ്രഖ്യാപിച്ച അധികാരികൾ, ജനങ്ങൾ നിയന്ത്രണങ്ങൾ പാലിക്കണമെന്ന് അഭ്യർത്ഥിക്കുകയും ചെയ്തു.
