തിരുവനന്തപുരം: ഏഷ്യൻ ഗെയിംസിൽ വെള്ളി മെഡൽ നേടാൻ കഴിഞ്ഞതിൽ അതീവ സന്തോഷമുണ്ടെന്ന് ഇന്ത്യൻ കായികതാരം വിദർശ വിനോദ്. ജന്മനാട്ടിൽ തിരിച്ചെത്തിയ വിദർശയ്ക്ക് നൽകിയ ഉജ്ജ്വല സ്വീകരണത്തിന് ശേഷം മാധ്യമങ്ങളോട് സംസാരിക്കുകയായിരുന്നു അവർ. നിലവിലെ സംസ്ഥാന സർക്കാർ കായികതാരങ്ങളെ വലിയ രീതിയിലാണ് പ്രോത്സാഹിപ്പിക്കുന്നതെന്നും മുൻപെങ്ങുമില്ലാത്ത പിന്തുണയും വലിയ അംഗീകാരവുമാണ് കായിക വകുപ്പ് നൽകുന്നതെന്നും അവർ കൂട്ടിച്ചേർത്തു.
അതോടൊപ്പം, ഏഷ്യൻ ഗെയിംസ് ലോങ്ജംപ് മെഡൽ ജേതാവ് ആൻസി സോജനെതിരെ സോഷ്യൽ മീഡിയയിലുണ്ടായ സൈബർ ആക്രമണങ്ങൾ ഏറെ വേദനിപ്പിച്ചുവെന്ന് വിദർശ പറഞ്ഞു. ആൻസി മികച്ച ആത്മവിശ്വാസമുള്ള, വേറിട്ടൊരു വ്യക്തിത്വത്തിന് ഉടമയായ കുട്ടിയാണെന്നും ഇത്തരം ആക്രമണങ്ങൾ കായികതാരങ്ങളുടെ മനോവീര്യത്തെ ബാധിക്കുന്നതാണെന്നും വിദർശ ചൂണ്ടിക്കാട്ടി.
