ന്യൂഡൽഹി: മുൻ ഇന്ത്യൻ ക്യാപ്റ്റനും ബി.സി.സി.ഐ മുൻ പ്രസിഡന്റുമായ സൗരവ് ഗാംഗുലിയെ ഡൽഹി ക്യാപിറ്റൽസിന്റെ മുഖ്യ പരിശീലകനായി നിയമിച്ചു. 2027 ലെ ഐ.പി.എൽ (IPL) സീസണിന് മുന്നോടിയായാണ് ദാദ ഡൽഹി ടീമിന്റെ പൂർണ്ണ ചുമതലയേറ്റെടുക്കുന്നത്.
2019-ൽ ഉപദേശകനായി (Advisor) ഡൽഹി ക്യാപിറ്റൽസിൽ എത്തിയ ഗാംഗുലി, പിന്നീട് പുരുഷ-വനിതാ ടീമുകളുടെ 'ഡയറക്ടർ ഓഫ് ക്രിക്കറ്റ്' പദവി ഉൾപ്പെടെ മാനേജ്‌മെന്റിൽ പ്രമുഖ സ്ഥാനങ്ങൾ വഹിച്ചിട്ടുണ്ട്. ദക്ഷിണാഫ്രിക്കൻ ലീഗായ SA20-ൽ ഡൽഹി ക്യാപിറ്റൽസിന്റെ സഹോദര ടീമായ പ്രിട്ടോറിയ ക്യാപിറ്റൽസിനെ ഫൈനൽ വരെ എത്തിച്ച പരിശീലക പരിചയവുമായാണ് 54-കാരനായ ഗാംഗുലി ഇനി ഡൽഹിയുടെ മുഖ്യ തന്ത്രജ്ഞനാകുന്നത്. കഴിഞ്ഞ സീസണിൽ ആറാം സ്ഥാനത്ത് ഫിനിഷ് ചെയ്ത ഡൽഹി, ഗാംഗുലിക്ക് കീഴിൽ ഭയരഹിതമായ പുതിയൊരു ടീമിനെ വാർത്തെടുത്ത് കന്നി ഐ.പി.എൽ കിരീടം സ്വന്തമാക്കാനുള്ള ലക്ഷ്യത്തിലാണ്.
ഡൽഹി ക്യാപിറ്റൽസ് തനിക്ക് വളരെ പ്രിയപ്പെട്ട ഫ്രാഞ്ചൈസിയാണെന്നും, ടീം ഉടമസ്ഥരും കളിക്കാരുമായി അടുത്ത ബന്ധമുണ്ടെന്നും സ്ഥാനമേറ്റെടുത്ത ശേഷം സൗരവ് ഗാംഗുലി പ്രതികരിച്ചു. ടീമിനെ വിജയവഴിയിൽ തിരിച്ചെത്തിക്കുക എന്നത് ആവേശം തരുന്ന വലിയൊരു ഉത്തരവാദിത്തമാണെന്നും അദ്ദേഹം കൂട്ടിച്ചേർത്തു.
