വാട്സ്ആപ്പ് ബിസിനസ് പ്ലാറ്റ്ഫോം ഉപയോഗിക്കുന്നവർക്കായി പുതിയ നിരക്ക് ഘടന പ്രഖ്യാപിച്ച് മെറ്റ. മുൻപ് സൗജന്യമായി നൽകിയിരുന്ന ചില കസ്റ്റമർ സർവീസ് സന്ദേശങ്ങൾക്കും യൂട്ടിലിറ്റി സന്ദേശങ്ങൾക്കുമാണ് ഒക്ടോബർ 1 മുതൽ മെറ്റ പണം ഈടാക്കാൻ തുടങ്ങിയിരിക്കുന്നത്. ഓരോ വാട്സ്ആപ്പ് ബിസിനസ് നമ്പറിനും പ്രതിമാസം 1,000 സൗജന്യ സർവീസ് മെസേജുകൾ വീതം ലഭിക്കും. എന്നാൽ 1,001-ാമത്തെ സന്ദേശം മുതൽ നിശ്ചിത നിരക്ക് ഈടാക്കുന്നതാണ്.
ഇന്ത്യയിൽ സർവീസ് മെസേജുകൾക്ക്, സന്ദേശമൊന്നിന് 0.115 രൂപ അഥവാ 11.5 പൈസയാണ് മെറ്റ നിശ്ചയിച്ചിരിക്കുന്നത്. ഇതിനു പുറമെ ജിഎസ്ടിയും (GST) ഈടാക്കും. കസ്റ്റമർ സർവീസ് വിൻഡോയ്ക്കുള്ളിൽ അയക്കുന്ന ഓർഡർ കൺഫർമേഷൻ, ഡെലിവറി അപ്ഡേറ്റുകൾ തുടങ്ങിയ യൂട്ടിലിറ്റി സന്ദേശങ്ങൾക്കും ഇനി മുതൽ ഈ നിരക്ക് ബാധകമായിരിക്കും.
അതേസമയം, വ്യക്തിഗത ആവശ്യങ്ങൾക്ക് വാട്സ്ആപ്പ് ഉപയോഗിക്കുന്ന സാധാരണ ഉപയോക്താക്കളെയും, സൗജന്യ വാട്സ്ആപ്പ് ബിസിനസ് ആപ്പ് ഉപയോഗിക്കുന്ന ചെറുകിട വ്യാപാരികളെയും ഈ നിരക്ക് വർധന ബാധിക്കില്ല. വലിയ സംരംഭങ്ങൾ ഉപയോഗിക്കുന്ന വാട്സ്ആപ്പ് ബിസിനസ് പ്ലാറ്റ്ഫോം (API) ഉപയോക്താക്കൾക്ക് മാത്രമാണ് ഈ നിരക്കുകൾ ബാധകമാകുന്നത്. എങ്കിലും, പെയ്ഡ് ഉപയോക്താക്കൾക്കായി പ്രത്യേക ഫീച്ചറുകൾ അവതരിപ്പിക്കാനും വാട്സ്ആപ്പ് ഒരുങ്ങുന്നതായി റിപ്പോർട്ടുകളുണ്ട്.
