വോട്ടർ പട്ടിക പരിഷ്കരണത്തിന്റെ (SIR) സുതാര്യതയും വിശ്വാസ്യതയും പൂർണ്ണമായി നഷ്ടപ്പെട്ടെന്നും ഭരണഘടനാ സാധുത തന്നെ ചോദ്യം ചെയ്യപ്പെടുന്ന സാഹചര്യമാണുള്ളതെന്നും ചൂണ്ടിക്കാട്ടി വോട്ടർ പട്ടിക പരിഷ്കരണ നടപടികൾ ഉടനടി നിർത്തിവെക്കണമെന്ന് കോൺഗ്രസ് ആവശ്യപ്പെട്ടു. സെപ്റ്റംബർ 29 ചൊവ്വാഴ്ച ചേർന്ന കോൺഗ്രസ് പ്രവർത്തക സമിതി (CWC) യോഗത്തിന് ശേഷമാണ് പാർട്ടി ഈ ആവശ്യം മുന്നോട്ടുവെച്ചത്. തങ്ങളുടെ അറിവില്ലാതെ വോട്ടർ പട്ടിക പരിഷ്കരണവുമായി ബന്ധപ്പെട്ട തീരുമാനങ്ങൾ കൈക്കൊണ്ടതിൽ പ്രതിഷേധിച്ച് രണ്ട് തിരഞ്ഞെടുപ്പ് കമ്മീഷണർമാരായ സുഖ്ബീർ സിംഗ് സന്ധുവും വിവേക് ജോഷിയും 10 മാസത്തിനിടെ 14 തവണ രേഖാമൂലം എതിർപ്പ് രേഖപ്പെടുത്തിയെന്ന റിപ്പോർട്ടുകൾ പുറത്തുവന്ന പശ്ചാത്തലത്തിലാണ് സി.ഡബ്ല്യു.സി യോഗം ചേർന്നത്.
പ്രതിസന്ധി പരിഹരിക്കാനുള്ള ശ്രമ ഭാഗമായി തിരഞ്ഞെടുപ്പ് കമ്മീഷൻ ഒൻപത് നടപടികൾ പ്രഖ്യാപിച്ചെങ്കിലും ഉയർന്നുവന്ന പ്രധാന ചോദ്യങ്ങൾക്ക് ഇനിയും വ്യക്തത വന്നിട്ടില്ല. സി.ഡബ്ല്യു.സി യോഗത്തിനുശേഷം മാധ്യമങ്ങളെ കണ്ട എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ, മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന് പദവിയിൽ തുടരാനുള്ള ധാർമ്മികവും സ്ഥാപനപരവുമായ എല്ലാ അധികാരവും നഷ്ടപ്പെട്ടതായി കുറ്റപ്പെടുത്തി. വോട്ടർ പട്ടിക പരിഷ്കരണ നടപടികൾ ഉടൻ നിർത്തിവെക്കണമെന്നും പട്ടികയിൽ നിന്ന് നീക്കം ചെയ്ത 13.30 കോടി പേരുകൾ പുനഃസ്ഥാപിക്കണമെന്നും ആവശ്യപ്പെട്ട സി.ഡബ്ല്യു.സി, ചീഫ് തിരഞ്ഞെടുപ്പ് കമ്മീഷണറുടെ രാജി ആവശ്യപ്പെടുകയും ചെയ്തു.
സർക്കാരിന്റെ "വോട്ട് ചോരി"ക്കെതിരെ (വോട്ട് മോഷണം) പാർട്ടി ശക്തമായ ജനകീയ പ്രതിരോധം തീർക്കുമെന്ന് കെ.സി. വേണുഗോപാൽ വ്യക്തമാക്കി. പരമ്പരാഗതമായ പ്രതിഷേധ രീതികൾക്ക് പകരം ആശയപരമായ ശക്തമായ പ്രതിരോധ പ്രസ്ഥാനം വേണമെന്ന് കഴിഞ്ഞ ജൂണിൽ ചേർന്ന 'ഇന്ത്യ' (INDIA) സഖ്യയോഗത്തിൽ രാഹുൽ ഗാന്ധി ആവശ്യപ്പെട്ടിരുന്നു. ജനങ്ങളുടെ ശബ്ദവും ആവശ്യങ്ങളും കേൾക്കാൻ ഭരണകൂടം തയ്യാറാകാത്ത സാഹചര്യത്തിൽ ജനാധിപത്യപരമായ പ്രതിരോധ മാത്രമാണ് മുന്നിലുള്ള വഴിയെന്ന് വേണുഗോപാൽ കൂട്ടിച്ചേർത്തു.
രാജ്യത്ത് നടക്കുന്നത് നിഷ്പക്ഷമായ തിരഞ്ഞെടുപ്പല്ലെന്നും നരേന്ദ്ര മോദിയും അമിത് ഷായും ഗ്യാനേഷ് കുമാറും ചേർന്നുള്ള മാച്ച് ഫിക്സിംഗാണ് നടക്കുന്നതെന്നും കോൺഗ്രസ് ജനറൽ സെക്രട്ടറി ജയ്റാം രമേശ് ആരോപിച്ചു. വോട്ട് മോഷണത്തിലൂടെ എത്തുന്ന പ്രതിനിധികൾ നിർമ്മിക്കുന്ന നിയമങ്ങളും വരുത്തുന്ന സ്ഥാപനപരമായ മാറ്റങ്ങളും നിയമവിരുദ്ധമാണെന്ന രാഹുൽ ഗാന്ധിയുടെ വാക്കുകൾ അദ്ദേഹം ഓർമ്മിപ്പിച്ചു. വോട്ട് ചോരിയിൽ നിന്ന് നിയമ ചോരിയും, അതിൽ നിന്ന് സ്ഥാപന ചോരിയും സംഭവിക്കുന്നുവെന്നും ഇത് ഭരണഘടനയ്ക്ക് നേരെയുള്ള ആക്രമണമാണെന്നും പാർട്ടി വ്യക്തമാക്കി.
കർണാടകയിലെ മഹാദേവപുരയിലും ഹരിയാന, മഹാരാഷ്ട്ര നിയമസഭാ തിരഞ്ഞെടുപ്പുകളിലും നടന്ന അപാകതകൾ മുൻനിർത്തി കഴിഞ്ഞ രണ്ട് വർഷമായി കോൺഗ്രസ് വിഷയം ഉയർത്തുന്നുണ്ട്. പാർലമെന്റിനകത്ത് എതിർപ്പും തെരുവിൽ ശക്തമായ പ്രതിഷേധവും തുടരുമെന്ന് ജയ്റാം രമേശ് പറഞ്ഞു. വിഷയത്തിൽ സംയുക്ത പോരാട്ട തന്ത്രം രൂപീകരിക്കുന്നതിനായി 'ഇന്ത്യ' സഖ്യം ബുധനാഴ്ച ഡൽഹിയിൽ യോഗം ചേരുകയാണ്. ഇതിനുപുറമെ, മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ പുറത്താക്കാനുള്ള പ്രമേയം കൊണ്ടുവരാനും പ്രതിപക്ഷ പാർട്ടികൾ നീക്കം നടത്തുന്നുണ്ട്.
