പുതിയ ഫീച്ചറുകളും അത്യാധുനിക ഇൻസ്ട്രുമെന്റ് ക്ലസ്റ്ററുമായി പ്രമുഖ ഇരുചക്ര വാഹന നിർമ്മാതാക്കളായ ബജാജ്, പൾസർ എൻഎസ്400ഇസഡിന്റെ (Pulsar NS400Z) പുതുക്കിയ പതിപ്പ് വിപണിയിലെത്തിച്ചു. 1,90,015 രൂപയാണ് (എക്സ്-ഷോറൂം, ഡൽഹി) ഈ പുതിയ മോഡലിന്റെ വില. വിപണിയിൽ എത്തുന്നതിന് മുന്നോടിയായി ഡീലർഷിപ്പുകളിൽ കണ്ട ടിഎഫ്ടി കൺസോൾ വലിയ വാർത്തയായിരുന്നു. ഇതിന് പിന്നാലെയാണ് കമ്പനി ഇപ്പോൾ ബൈക്കിന്റെ ഔദ്യോഗിക ലോഞ്ച് നടത്തിയിരിക്കുന്നത്.
5 ഇഞ്ച് ടിഎഫ്ടി ഡിസ്പ്ലേയും കണക്റ്റഡ് സാങ്കേതികവിദ്യയും
പഴയ ബോണ്ടഡ് ഗ്ലാസ് എൽസിഡി മാറ്റി പകരം 5 ഇഞ്ച് ടിഎഫ്ടി ഡിസ്പ്ലേ നൽകിയതാണ് ബൈക്കിലെ പ്രധാന മാറ്റം. ഗൂഗിൾ മാപ്സ് മിററിങ് വഴിയുള്ള ടേൺ-ബൈ-ടേൺ നാവിഗേഷൻ, മ്യൂസിക് കൺട്രോൾ, ഡോക്യുമെന്റ് സ്റ്റോറേജ്, ലാപ് ടൈമർ തുടങ്ങിയ മികച്ച സൗകര്യങ്ങൾ ഇതിൽ ലഭ്യമാണ്. കൂടാതെ, പുതിയ ഇന്റർഫേസ് വഴി നാല് റൈഡിങ് മോഡുകൾ തിരിഞ്ഞെടുക്കാനും ട്രാക്ഷൻ കൺട്രോൾ നിയന്ത്രിക്കാനും കഴിയും. ബ്ലൂടൂത്ത് കണക്റ്റിവിറ്റിക്കൊപ്പം യുഎസ്ബി ടൈപ്പ്-സി ചാർജിങ് പോർട്ടും ഇതിൽ ഉൾപ്പെടുത്തിയിട്ടുണ്ട്.
മുൻകരുതലോടെ 'പാനിക് ബ്രേക്ക് അലേർട്ട്'
സുരക്ഷയ്ക്ക് മുൻഗണന നൽകിക്കൊണ്ട് 'പാനിക് ബ്രേക്ക് അലേർട്ട്' സംവിധാനവും ബജാജ് ഈ മോഡലിൽ അവതരിപ്പിച്ചിട്ടുണ്ട്. പെട്ടെന്ന് ശക്തമായി ബ്രേക്ക് ചെയ്യേണ്ടി വരുമ്പോൾ ഹസാർഡ് ലൈറ്റുകൾ സ്വയമേവ കത്തിക്കൊണ്ട് പിന്നിൽ വരുന്ന വാഹനങ്ങൾക്ക് അപകട മുന്നറിയിപ്പ് നൽകാൻ ഈ ഫീച്ചറിന് സാധിക്കും. പൾസർ സീരീസിലെ മറ്റ് മോഡലുകളിൽ ടിഎഫ്ടി ഡിസ്പ്ലേ നൽകിയതിന് പിന്നാലെയാണ് എൻഎസ്400ഇസഡിലും ഈ സുരക്ഷാ ഫീച്ചറുകൾ ലഭ്യമാക്കിയിരിക്കുന്നത്.
കരുത്തുറ്റ എൻജിനും പ്രകടനശേഷിയും പുതിയ ഫീച്ചറുകൾ ഉൾപ്പെടുത്തിയെങ്കിലും ബൈക്കിന്റെ എൻജിനിൽ മാറ്റങ്ങളൊന്നും വരുത്തിയിട്ടില്ല. 40 bhp കരുത്തും (9,000 rpm) 33 Nm ടോർക്കും (7,500 rpm) ഉത്പാദിപ്പിക്കുന്ന 349 സിസി, സിംഗിൾ സിലിണ്ടർ, ലിക്വിഡ്-കൂൾഡ് എൻജിനാണ് ഇതിലുള്ളത്. 6-സ്പീഡ് ഗിയർബോക്സ്, ഇലക്ട്രോണിക് ത്രോട്ടിൽ ബോഡി, 43 mm യുഎസ്ഡി ഫ്രണ്ട് ഫോർക്കുകൾ, ഡ്യുവൽ ചാനൽ എബിഎസ്, റേഡിയൽ ടയറുകൾ എന്നിവ തുടരുമ്പോഴും കെടിഎം 390 ഡ്യൂക്ക് ഉൾപ്പെടെയുള്ള ശക്തരായ എതിരാളികളോടാണ് 300-400 സിസി വിഭാഗത്തിൽ എൻഎസ്400ഇസഡ് മത്സരിക്കുന്നത്.
