ആലപ്പുഴ മെഡിക്കൽ കോളേജിൽ വരാനിരിക്കുന്ന കമ്മ്യൂണിറ്റി കിച്ചൻ പദ്ധതി ജനുവരി മാസത്തിൽ പ്രവർത്തനം ആരംഭിക്കുമെന്ന് ആരോഗ്യമന്ത്രി കെ. മുരളീധരൻ പ്രഖ്യാപിച്ചു. കേന്ദ്ര പൊതുമേഖലാ സ്ഥാപനമായ എച്ച്.എൻ.എല്ലുമായി (HNL) ഇതിനായുള്ള കരാർ നടപടികൾ പൂർത്തിയായിക്കഴിഞ്ഞു. എവിടെനിന്നെങ്കിലും പൊതിഞ്ഞുകൊണ്ടുവരുന്ന ഭക്ഷണത്തിന് പകരം രോഗികൾക്കും കൂട്ടിരിപ്പുകാർക്കും പോഷകസമൃദ്ധവും ഗുണനിലവാരമുള്ളതുമായ ഭക്ഷണം ഉറപ്പാക്കുകയാണ് പദ്ധതിയിലൂടെ ലക്ഷ്യമിടുന്നത്.
നേരത്തെ മെഡിക്കൽ കോളേജിൽ കമ്മ്യൂണിറ്റി കിച്ചൻ നടപ്പിലാക്കുന്നതിനെക്കുറിച്ച് പ്രഖ്യാപിച്ചപ്പോൾ അനാവശ്യമായ വിവാദങ്ങൾ ഉയർത്തിക്കൊണ്ടുവരാൻ ചിലർ ശ്രമിച്ചിരുന്നതായി മന്ത്രി ചൂണ്ടിക്കാട്ടി. 'അന്നം മുടക്കുന്നവന്റെ കരണത്തടിക്കണം' എന്ന് പറഞ്ഞ് ചിലർ തനിക്കെതിരെ പരസ്യമായി രംഗത്തുവരികയും ചെയ്തിരുന്നു. എന്നാൽ പദ്ധതി യാഥാർത്ഥ്യമാകുന്ന ജനുവരി മാസത്തിൽ ആരുടെ കരണത്താണ് അടിയേൽക്കുകയെന്ന് വ്യക്തമാകുമെന്നും വിമർശകർക്കുള്ള മറുപടിയായി മന്ത്രി കെ. മുരളീധരൻ വ്യക്തമാക്കി.
