വാഷിംഗ്ടണ്‍: ഇസ്രായേലിന് പ്രതിവര്‍ഷം നല്‍കിവരുന്ന സാമ്പത്തിക സഹായം ഈ വര്‍ഷത്തോടെ അവസാനിപ്പിക്കുമെന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് പ്രഖ്യാപിച്ചു. ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവുമായി നടത്തിയ ചര്‍ച്ചയിലാണ് പ്രതിവര്‍ഷം നല്‍കുന്ന 4 ബില്യണ്‍ യു.എസ് ഡോളറിന്റെ സഹായ പാക്കേജ് അവസാനിപ്പിക്കാന്‍ ധാരണയായതെന്ന് ട്രംപ് വ്യക്തമാക്കി. അമേരിക്കയില്‍ നിര്‍ണായകമായ ഇടക്കാല തിരഞ്ഞെടുപ്പിന്റെ വോട്ടെടുപ്പ് പുരോഗമിക്കവേയാണ് ഈ അപ്രതീക്ഷിത പ്രഖ്യാപനം. എന്നാല്‍ ഇസ്രായേലിലേക്കുള്ള ആയുധ വില്‍പ്പന തുടരുമെന്നും, ഭാവിയില്‍ ആവശ്യമെങ്കില്‍ മാത്രം സഹായങ്ങള്‍ നല്‍കുമെന്നും ട്രംപ് കൂട്ടിച്ചേര്‍ത്തു. ഇതോടെ പതിറ്റാണ്ടുകളായി തുടരുന്ന യു.എസ്-ഇസ്രായേല്‍ സൈനിക ബന്ധത്തില്‍ വലിയ മാറ്റങ്ങള്‍ക്കാണ് വഴിതുറന്നിരിക്കുന്നത്.
'ഇസ്രായേലിന് ഇനി മുതല്‍ സാമ്പത്തിക സഹായത്തിന്റെ ആവശ്യമില്ല. അതിനാല്‍ പ്രതിവര്‍ഷം നല്‍കുന്ന 4 ബില്യണ്‍ ഡോളര്‍ നല്‍കുന്നത് നിര്‍ത്തലാക്കാന്‍ നെതന്യാഹുവുമായി മാസങ്ങള്‍ക്ക് മുന്‍പ് തന്നെ ധാരണയിലെത്തിയിരുന്നു. ഈ വര്‍ഷം അവസാനത്തോടെ ഇത് പൂര്‍ണ്ണമായും നിര്‍ത്തും,' ട്രംപ് 'ഫോക്സ് ആന്‍ഡ് ഫ്രണ്ട്‌സ്' അഭിമുഖത്തില്‍ പറഞ്ഞു. ഇസ്രായേലിന് നല്‍കുന്ന ഈ ധനസഹായം ബിജെപി/റിപ്പബ്ലിക്കന്‍ പാര്‍ട്ടിക്കെതിരെ ഡെമോക്രാറ്റുകള്‍ നിരന്തരം ഉന്നയിക്കുന്ന വിമര്‍ശനങ്ങള്‍ക്ക് തടയിടാന്‍ സഹായിക്കുമെന്നും അദ്ദേഹം ചൂണ്ടിക്കാട്ടി.
നിലവിലെ യു.എസ്-ഇസ്രായേല്‍ ധാരണാപത്ര പ്രകാരം 2028 സെപ്റ്റംബര്‍ വരെ ഇസ്രായേലിന് വര്‍ഷത്തില്‍ 3.8 ബില്യണ്‍ ഡോളറിന്റെ സൈനിക സഹായം നല്‍കാന്‍ നിയമപരമായ ബാധ്യതയുള്ളതിനാല്‍, ഡിസംബറിനുള്ളില്‍ സഹായം എങ്ങനെ പൂര്‍ണ്ണമായി നിര്‍ത്തുമെന്നതിനെക്കുറിച്ച് ട്രംപ് വ്യക്തത വരുത്തിയിട്ടില്ല. 2023 ഒക്ടോബറിലെ ഹമാസ് ആക്രമണത്തിന് ശേഷം ഗാസയില്‍ ഇസ്രായേല്‍ നടത്തുന്ന സൈനിക നടപടികളില്‍ അമേരിക്കയ്ക്കുള്ളില്‍, പ്രത്യേകിച്ച് ഡെമോക്രാറ്റിക് പാര്‍ട്ടിയിലും പൊതുജനങ്ങള്‍ക്കിടയിലും കടുത്ത എതിര്‍പ്പ് ഉയര്‍ന്നിരുന്നു. വാഷിംഗ്ടണ്‍ ഇസ്രായേലിന് പരിധിയില്ലാത്ത പിന്തുണ നല്‍കുന്നുണ്ടെന്ന ചിന്ത അമേരിക്കന്‍ ജനതയ്ക്കിടയില്‍ വര്‍ധിച്ചുവരുന്നതായാണ് അടുത്തിടെ പുറത്തുവന്ന സര്‍വേകള്‍ വ്യക്തമാക്കുന്നത്. ക്വിന്നിപിയാക് സര്‍വകലാശാല ജൂണില്‍ നടത്തിയ സര്‍വേയില്‍ 48 ശതമാനം വോട്ടര്‍മാരും, 66 ശതമാനം ഡെമോക്രാറ്റുകളും ഇസ്രായേലിനോടുള്ള യു.എസ് നയം അമിത പിന്തുണയുള്ളതാണെന്ന് അഭിപ്രായപ്പെട്ടിരുന്നു.
അതേസമയം, ട്രംപിന്റെ സ്വന്തം റിപ്പബ്ലിക്കന്‍ പാര്‍ട്ടിക്കുള്ളിലെ 'മഗ' (MAGA) വിഭാഗത്തിനിടയിലും ഇസ്രായേലുമായുള്ള സഖ്യത്തെച്ചൊല്ലി ഭിന്നതകള്‍ രൂക്ഷമാണ്. ഇറാനുമായുള്ള സംഘര്‍ഷത്തില്‍ അമേരിക്ക ഇടപെടുന്നതിനെ പാര്‍ട്ടിയിലെ ഒരു വിഭാഗം ചോദ്യം ചെയ്യുന്നുണ്ട്. ഇറാനെതിരെയുണ്ടായ സംയുക്ത ആക്രമണങ്ങള്‍ മൂലം ആഗോളതലത്തില്‍ ഇന്ധനവില ഉയര്‍ന്നത് ട്രംപിന്റെ ജനപ്രീതിയെ ബാധിച്ചിട്ടുമുണ്ട്.
ട്രംപിന്റെ പ്രഖ്യാപനം ഇസ്രായേല്‍ രാഷ്ട്രീയത്തിലും വലിയ കൊടുങ്കാറ്റ് സൃഷ്ടിച്ചിട്ടുണ്ട്. തങ്ങളുടെ തന്ത്രപ്രധാനമായ സൈനിക-സുരക്ഷാ പങ്കാളിത്തത്തിലുണ്ടായ ഈ വലിയ മാറ്റം മാധ്യമങ്ങളിലൂടെയാണ് ഇസ്രായേല്‍ ജനതയും സുരക്ഷാ വിഭാഗവും അറിഞ്ഞതെന്നും, ഇത് ബെഞ്ചമിന്‍ നെതന്യാഹുവിന്റെ ഭരണപരാജയമാണ് കാണിക്കുന്നതെന്നും ഇസ്രായേല്‍ പ്രതിപക്ഷ നേതാവ് ഗാഡി ഐസന്‍കോട്ട് വിമര്‍ശിച്ചു.
എന്നാല്‍, അമേരിക്കന്‍ നയങ്ങളില്‍ മാറ്റം വരുന്നുണ്ടെന്നും യു.എസ് ധനസഹായത്തെ അമിതമായി ആശ്രയിക്കുന്നത് ഇസ്രായേല്‍ ക്രമേണ കുറയ്ക്കുമെന്നും നെതന്യാഹു കഴിഞ്ഞ മാസം ഒരു ടെലിവിഷന്‍ അഭിമുഖത്തില്‍ സൂചിപ്പിച്ചിരുന്നു. തിരഞ്ഞെടുപ്പ് ദിനത്തില്‍ തന്ത്രപ്രധാനമായ ഈ പ്രഖ്യാപനം നടത്തിയത് രാഷ്ട്രീയ നിരീക്ഷകരെയും അത്ഭുതപ്പെടുത്തിയിട്ടുണ്ട്. ഇറാനെതിരെ വീണ്ടും ശക്തമായ സൈനിക നീക്കങ്ങള്‍ക്ക് യു.എസും ഇസ്രായേലും പദ്ധതിയിടുന്നുണ്ടെന്ന വാര്‍ത്തകള്‍ക്കിടെയാണ് ട്രംപിന്റെ ഈ നിര്‍ണായക നീക്കം.
ഇസ്രായേലിനുള്ള വാര്‍ഷിക സാമ്പത്തിക സഹായം നിര്‍ത്തലാക്കാന്‍ അമേരിക്ക; അപ്രതീക്ഷിത പ്രഖ്യാപനവുമായി ട്രംപ്
Jaihind TV News Report
Jaihind TV Web Desk
4 min read
232 reads
