ഏഴാം വയസ്സ് മുതൽ പിച്ചിലെ പോരാട്ടം; WPL കരാർ സ്വന്തമാക്കുന്ന ഏറ്റവും പ്രായം കുറഞ്ഞ താരമായി ഉമ കാശ്വി

വനിതാ പ്രീമിയർ ലീഗിന്റെ (ഡബ്ല്യുപിഎൽ) ചരിത്രത്തിൽ ലേലത്തിൽ ഒരു ടീം സ്വന്തമാക്കുന്ന ഏറ്റവും പ്രായം കുറഞ്ഞ താരമെന്ന റെക്കോഡ് കർണാടകയുടെ 15-കാരി ഉമ കാശ്വി സ്വന്തമാക്കി. കൊച്ചിയിലെ ഗ്രാന്റ് ഹയാത്തിൽ നടന്ന താരലേലത്തിൽ 10 ലക്ഷം രൂപയ്ക്കാണ് ഈ യുവ ഓൾറൗണ്ടറെ ഡൽഹി ക്യാപ്പിറ്റൽസ് സ്വന്തമാക്കിയത്. കൃത്യം 15 വർഷവും 202 ദിവസവും പ്രായമുള്ളപ്പോഴാണ് ഉമയ്ക്ക് ഈ ഡബ്ല്യുപിഎൽ കരാർ ലഭിക്കുന്നത്. കഴിഞ്ഞ വർഷത്തെ ലേലത്തിൽ 16-ാം വയസിൽ ടീമിലെത്തിയ ദിയ യാദവിന്റെ റെക്കോഡാണ് താരം ഇവിടെ മറികടന്നത്. മധ്യപ്രദേശിലെ ബിലാസ്പുരിൽ കർണാടകയ്ക്ക് വേണ്ടി അണ്ടർ-19 ടി20 ചലഞ്ചർ ട്രോഫിയിൽ കളിച്ചുകൊണ്ടിരിക്കെയാണ് ഉമയെ തേടി ഈ സന്തോഷവാർത്തയെത്തിയത്.

വെറും ഏഴര വയസ്സുള്ളപ്പോഴാണ് ഉമ ക്രിക്കറ്റ് പിച്ചിലേക്ക് കാലെടുത്തുവെക്കുന്നത്. ആന്ധ്രയിൽ ഇന്റർ-ഡിസ്ട്രിക്റ്റ് ക്രിക്കറ്റ് കളിച്ചിട്ടുള്ള അമ്മാവൻ സായ് സത്യ വിജയുടെ പിന്തുണയും കഠിനമായ പരിശീലനവുമാണ് ഉമയുടെ വളർച്ചയ്ക്ക് അടിത്തറയിട്ടത്. ബെല്ലന്തൂരിലെ അക്കാദമിയിൽ ചേർത്ത ശേഷം ദിവസവും രാവിലെ 3,000 സ്റ്റെപ്പ് ഓട്ടവും, വൈകുന്നേരത്തെ സെഷന് ശേഷം അമ്മാവൻ നേരിട്ട് നൽകുന്ന 30 ഓവർ സൈഡ്ആം ബൗളിങ് പരിശീലനവും ഉമ കൃത്യമായി പൂർത്തിയാക്കുമായിരുന്നു. ഉമയുടെ കരിയറിന് പൂർണ്ണ പിന്തുണ നൽകുന്നതിനായി അമ്മാവൻ തന്റെ മുഴുവൻ സമയ ഐ.ടി ജോലി പോലും ഉപേക്ഷിക്കുകയുണ്ടായി.

ഒമ്പതാം വയസിൽ ഇന്ത്യ നിപ്പോൺ കപ്പിൽ മികച്ച യുവതാരത്തിനുള്ള പുരസ്‌കാരം നേടിയതോടെയാണ് ഉമ ശ്രദ്ധിക്കപ്പെടാൻ തുടങ്ങിയത്. വേദാ കൃഷ്ണമൂർത്തി, ജെമീമ റോഡ്രിഗസ്, ദീപ്തി ശർമ തുടങ്ങി നിരവധി പ്രമുഖ ഇന്ത്യൻ താരങ്ങൾക്കൊപ്പം ഡ്രസ്സിങ് റൂം പങ്കിടാൻ ഈ ചെറിയ പ്രായത്തിൽ തന്നെ താരത്തിന് അവസരം ലഭിച്ചു. 12-ാം വയസിൽ ബെംഗളൂരുവിൽ നടന്ന ഇന്റർ-സ്‌കൂൾ ടൂർണമെന്റിൽ പുറത്താകാതെ 217 റൺസടിച്ച താരം, പിന്നീട് ശ്രേയങ്ക പാട്ടീലിന്റെ കോച്ചായ അർജുൻ ദേവിന്റെ അക്കാദമിയിലേക്ക് മാറി. കർണാടക അണ്ടർ-15 ടീമിന്റെയും 'മഹാറാണി ട്രോഫി'യിൽ ബെംഗളൂരു ബ്ലാസ്റ്റേഴ്സിന്റെയും ക്യാപ്റ്റൻ പദവിയും ഉമ അലങ്കരിച്ചിട്ടുണ്ട്.

മധ്യനിരയിൽ തകർത്തുബാറ്റ് ചെയ്യാനും ഓഫ് സ്പിൻ ബൗളിങ്ങിലൂടെ വിക്കറ്റുകൾ വീഴ്ത്താനുമുള്ള സവിശേഷമായ കഴിവ് ഉമയെ മികച്ചൊരു ഓൾറൗണ്ടറാക്കി മാറ്റുന്നു. 2025-26 വനിതാ അണ്ടർ-15 ഏകദിന ട്രോഫിയിൽ 172 ശരാശരിയിൽ 516 റൺസാണ് താരം അടിച്ചുകൂട്ടിയത് (മൂന്ന് സെഞ്ചുറികളും ഒരു അർധസെഞ്ചുറിയും ഉൾപ്പെടെ). 2026 ജനുവരി 10-ന് കൊൽക്കത്തയിൽ മണിപ്പൂരിനെതിരേ നടന്ന മത്സരത്തിൽ വെറും 66 പന്തിൽ നിന്ന് 23 ഫോറുകളും 7 സിക്സറുകളും അടക്കം പുറത്താകാതെ 158 റൺസ് അടിച്ചുകൂട്ടിയ പ്രകടനമാണ് ഡബ്ല്യുപിഎൽ റഡാറിൽ താരത്തിന്റെ പേര് പതിയാൻ പ്രധാന കാരണമായത്.

ബംഗ്ലാദേശിലും നേപ്പാളിലുമായി നടക്കാനിരിക്കുന്ന അണ്ടർ-19 ലോകകപ്പിനുള്ള ഇന്ത്യൻ വനിതാ ടീം പ്ലാനുകളിൽ ഉമ ഉൾപ്പെട്ടിട്ടുണ്ട്. എന്നാൽ ലോകകപ്പ് മത്സരങ്ങളും ഡബ്ല്യുപിഎൽ ടൂർണമെന്റും ഒരേ സമയത്താണ് നടക്കുന്നത് എന്നതിനാൽ, ഡൽഹി കാപ്പിറ്റൽസിനായുള്ള താരത്തിന്റെ അരങ്ങേറ്റത്തിന് അൽപം കൂടി കാത്തിടവേള ആവശ്യമായി വന്നേക്കാം. ഇന്ത്യൻ വനിതാ ക്രിക്കറ്റിന്റെ ഭാവി വാഗ്ദാനങ്ങളിലൊന്നായാണ് ഉമ കാശ്വിയെ ഇപ്പോൾ ക്രിക്കറ്റ് ലോകം വിലയിരുത്തുന്നത്.