Mobile app available on
Trending
Browse

All sections

Watch
Browse all videos

No business videos available

No Middle East videos available

Popular News

ശബരിമല തീർത്ഥാടനം: തിരക്ക് നിയന്ത്രിക്കാൻ ആർട്ടിഫിഷ്യൽ ഇന്റലിജൻസ്; സുരക്ഷയും സൗകര്യങ്ങളും വർധിപ്പിക്കുമെന്ന് രമേശ് ചെന്നിത്തല

ശബരിമല തീർത്ഥാടനം: തിരക്ക് നിയന്ത്രിക്കാൻ ആർട്ടിഫിഷ്യൽ ഇന്റലിജൻസ്; സുരക്ഷയും സൗകര്യങ്ങളും വർധിപ്പിക്കുമെന്ന് രമേശ് ചെന്നിത്തല

പത്തനംതിട്ട: ശബരിമല തീര്‍ത്ഥാടന കാലത്ത് ക്രൗഡ് മാനേജ്‌മെന്റിനായി ആര്‍ട്ടിഫിഷ്യല്‍ ഇന്റലിജന്‍സ് (AI) സാങ്കേതികവിദ്യ അടക്കം ഏര്‍പ്പെടുത്തുമെന്ന് ആഭ്യന്തര മന്ത്രി രമേശ് ചെന്നിത്തല അറിയിച്ചു. നിലക്കല്‍ ഇടത്താവളത്തിലെ ഗസ്റ്റ് ഹൗസില്‍ ഉദ്യോഗസ്ഥരുടെയും ജനപ്രതിനിധികളുടെയും അവലോകന യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.

ശബരിമല മണ്ഡല-മകരവിളക്ക് മഹോത്സവം സുഗമമാക്കാന്‍ പോലീസ് സേനയ്ക്ക് വലിയ ഉത്തരവാദിത്തമാണുള്ളതെന്ന് അദ്ദേഹം വ്യക്തമാക്കി. ദേവസ്വം ബോര്‍ഡ് അടക്കമുള്ള വിവിധ വകുപ്പുകളുമായി പോലീസിനെ ഏകോപിപ്പിക്കാനാണ് യോഗം വിളിച്ചുചേര്‍ത്തത്. മുന്‍കാലങ്ങളിലെ ചെറിയ വീഴ്ചകള്‍ പോലും പരിഹരിച്ച് മുന്നൊരുക്കങ്ങള്‍ മികച്ച രീതിയിലാണ് പുരോഗമിക്കുന്നത്.

സന്നിധാനം, പമ്പ, നിലയ്ക്കല്‍ എന്നീ മൂന്നു മേഖലകളായി തിരിച്ചാണ് പ്രവര്‍ത്തനം. എഡിജിപി പി. വിജയനാണ് ശബരിമല പോലീസ് നോഡല്‍ ഓഫീസര്‍. 10 മുതല്‍ 12 ദിവസം വരെ ദൈര്‍ഘ്യമുള്ള ആറ് ഘട്ടങ്ങളായാണ് പോലീസ് വിന്യാസം. ഓരോ ഘട്ടത്തിലും മൂന്നു സ്ഥലങ്ങളിലും എസ്.പി റാങ്കിലുള്ള സ്‌പെഷ്യല്‍ ഓഫീസറെയും അഡീഷണല്‍ എസ്പി, സീനിയര്‍ ഡിവൈഎസ്പി റാങ്കിലുള്ള അസിസ്റ്റന്റ് സ്‌പെഷ്യല്‍ ഓഫീസറെയും നിയോഗിക്കും.

എരുമേലി-പമ്പ, വണ്ടിപ്പെരിയാര്‍-പുല്‍മേട് തുടങ്ങിയ പരമ്പരാഗത പാതകളിലും ഉപ്പുപാറ, കാളകെട്ടി, അഴുത, സത്രം, പരുന്തന്‍പാറ ഉള്‍പ്പെടെയുള്ള പ്രധാന കേന്ദ്രങ്ങളിലും ശക്തമായ പോലീസ് സാന്നിധ്യം ഉറപ്പാക്കും. സന്നിധാനം, പമ്പ, നിലയ്ക്കല്‍ എന്നിവിടങ്ങളില്‍ സി.സി.ടി.വി നിരീക്ഷണം കര്‍ശനമാക്കും. പൊതുമരാമത്ത് വകുപ്പിന്റെ നേതൃത്വത്തില്‍ സന്നിധാനത്തെയും പമ്പയിലെയും കെട്ടിടങ്ങളുടെ ഫിറ്റ്‌നസ് പരിശോധിച്ച് ഉറപ്പുവരുത്തും.

നിലയ്ക്കലിലെ റോഡുകളുടെയും പാര്‍ക്കിംഗ് ഗ്രൗണ്ടുകളുടെയും അറ്റകുറ്റപ്പണികള്‍ അടിയന്തരമായി പൂര്‍ത്തിയാക്കാന്‍ ദേവസ്വം ബോര്‍ഡിന് നിര്‍ദ്ദേശം നല്‍കി. പുല്ലുമേട് ഉള്‍പ്പെടെയുള്ള അപകടസാധ്യതാ മേഖലകളില്‍ ഫയര്‍ഫോഴ്സിന്റെയും ആരോഗ്യവകുപ്പിന്റെയും സേവനങ്ങള്‍ ഉറപ്പാക്കും. അയല്‍സംസ്ഥാനങ്ങളില്‍ നിന്നുമെത്തുന്ന ഭക്തര്‍ക്കായി നെടുമ്പാശ്ശേരി വിമാനത്താവളത്തിലും ചെങ്ങന്നൂര്‍ റെയില്‍വേ സ്റ്റേഷനിലും റിസപ്ഷന്‍ ഓഫീസുകള്‍ പ്രവര്‍ത്തിക്കും.

തീര്‍ത്ഥാടകരെ സംസ്ഥാനത്തിന്റെ അതിഥികളായി കണ്ട് ആവശ്യമായ എല്ലാ അടിസ്ഥാന സൗകര്യങ്ങളും സര്‍ക്കാര്‍ ഉറപ്പാക്കും. പോലീസുകാരുടെ ശബരിമല ഡ്യൂട്ടി അലവന്‍സ് വര്‍ധിപ്പിച്ചിട്ടുണ്ടെന്നും സന്നിധാനത്ത് പുതിയ മെസ്സ് സ്ഥാപിക്കുമെന്നും അദ്ദേഹം കൂട്ടിച്ചേര്‍ത്തു. കൂടാതെ, റാന്നി എം.എല്‍.എ അഡ്വ. പഴകുളം മധുവിന്റെ ആവശ്യം പരിഗണിച്ച് വടശേരിക്കരയില്‍ പുതിയ പോലീസ് സ്റ്റേഷന്‍ അനുവദിക്കുമെന്നും രമേശ് ചെന്നിത്തല വ്യക്തമാക്കി.

പഴകുളം മധു എം.എല്‍.എ അധ്യക്ഷനായ ചടങ്ങില്‍ ഡി.ജി.പി റവാഡ ചന്ദ്രശേഖര്‍, എ.ഡി.ജി.പി പി. വിജയന്‍, ഇന്റലിജന്‍സ് എ.ഡി.ജി.പി ദിനേന്ദ്ര കശ്യപ്, ദക്ഷിണമേഖലാ ഐ.ജി പി. പ്രകാശ്, പത്തനംതിട്ട ജില്ലാ കളക്ടര്‍ എ. നിസാമുദ്ദീന്‍, ദേവസ്വം ബോര്‍ഡ് പ്രസിഡന്റ് കെ. ജയകുമാര്‍ തുടങ്ങിയ ഉന്നത ഉദ്യോഗസ്ഥര്‍ പങ്കെടുത്തു.







Related articles

See all
Popular News

ശബരിമല മുന്നൊരുക്കം: തദ്ദേശ സ്വയംഭരണ സ്ഥാപനങ്ങൾക്കായി മുഖ്യമന്ത്രി 3.36 കോടി രൂപ അനുവദിച്ച...

Popular News

ശബരിമല നട ഇന്ന് തുറക്കും; പുതിയ മേൽശാന്തിമാർ ചുമതലയേൽക്കും

Popular News

ശബരിമല യാത്രക്കാരുടെ ശ്രദ്ധയ്ക്ക്: നവംബർ 16ന് വൈകിട്ട് നട തുറക്കും; ഉച്ചയ്ക്ക് 12-ന് ശേഷമേ...

Popular News

പ്രായപൂർത്തിയാകാത്ത മകന് കാറും ബൈക്കും ഓടിക്കാൻ നൽകി, ഇൻസ്റ്റഗ്രാമിൽ റീൽസ്; അമ്മയ്ക്കെതിരെ...

Save your stories

Sign in