കുട്ടികളിൽ അക്രമവാസന കൂട്ടുന്നത് കൊറിയൻ സിനിമകളും ഗെയിമുകളും ; പരാതികൾ വർധിച്ചുവരുന്നതായി ആഭ്യന്തര മന്ത്രി നിയമസഭയിൽ

കുട്ടികളിൽ കൊറിയൻ സിനിമകൾ ഉൾപ്പെടെയുള്ള ക്രൈം സിനിമകളും ഓൺലൈൻ ഗെയിമുകളും അക്രമവാസന പ്രോത്സാഹിപ്പിക്കുന്നുവെന്ന പരാതികൾ വർധിച്ചുവരുന്നതായി ആഭ്യന്തര മന്ത്രി രമേശ് ചെന്നിത്തല നിയമസഭയിൽ വ്യക്തമാക്കി. വിഷയം വളരെ ഗൗരവത്തോടെയാണ് സർക്കാർ വീക്ഷിക്കുന്നതെന്നും കുട്ടികളിലെ ഇത്തരം തെറ്റായ പ്രവണതകൾ തടയാൻ ശക്തമായ നടപടികൾ സ്വീകരിക്കുമെന്നും അദ്ദേഹം സഭയെ അറിയിച്ചു.

ക്രൈം സിനിമകളും കൊറിയൻ സിനിമകളും കുട്ടികളിൽ അക്രമവാസന കൂട്ടുന്നുണ്ടെന്ന് പൊതുജനങ്ങളിൽ നിന്നും പരാതികൾ ലഭിച്ചിട്ടുണ്ട്. ഇതിനുപുറമേ, ഓൺലൈൻ ഗെയിമുകളുടെ സ്വാധീനം കാരണം കുട്ടികളിൽ അക്രമവാസന കൂടുകയും ആത്മഹത്യ ഉൾപ്പെടെയുള്ള വലിയ ദുരന്തങ്ങൾ സംഭവിക്കുകയും ചെയ്യുന്നുണ്ട്. 13 വയസ്സുള്ള കുട്ടി സ്വന്തം മുത്തച്ഛനെ കൊലപ്പെടുത്തുകയും പിന്നീട് യാതൊരു പശ്ചാത്താപവും പ്രകടിപ്പിക്കാതിരിക്കുകയും ചെയ്ത നടുക്കുന്ന സംഭവം ഇതിന് തെളിവാണെന്ന് മന്ത്രി ചൂണ്ടിക്കാട്ടി.

സൈബർ കുറ്റകൃത്യങ്ങളും കുട്ടികളിലെ അക്രമവാസനയും തടയുന്നതിനായി 'സൈബർ സേഫ് കേരള' എന്ന വിപുലമായ പദ്ധതി ആവിഷ്കരിച്ചു നടപ്പിലാക്കാനാണ് സർക്കാർ ലക്ഷ്യമിടുന്നത്. ഇതിന്റെ ഭാഗമായി ക്രമസമാധാനപാലന ചുമതലയുള്ള പോലീസ് സംവിധാനങ്ങളെ കൂടുതൽ ആധുനികവത്കരിക്കും. കൂടാതെ, പൊതുജനങ്ങൾക്ക് പോലീസ് സ്റ്റേഷനുകളിൽ നേരിട്ട് എത്താതെ തന്നെ ഡിജിറ്റൽ മാർഗ്ഗങ്ങളിലൂടെ എഫ്.ഐ.ആർ ലഭ്യമാക്കുന്ന 'മൈ പോലീസ് സ്റ്റേഷൻ' പദ്ധതി ഉൾപ്പെടെ നടപ്പിലാക്കി പോലീസ് സേവനങ്ങളെ കൂടുതൽ ഡിജിറ്റൽ സൗഹൃദമാക്കുമെന്നും അദ്ദേഹം കൂട്ടിച്ചേർത്തു.