എഫ്.ആർ.ആർ.ഒ നോട്ടീസിനെതിരെ നിയമപോരാട്ടത്തിൽ ഇമ്രാൻ ഖാൻ; തിങ്കളാഴ്ച വരെ രാജ്യത്ത് തുടരാൻ അനുമതി

ഒക്ടോബർ 28-നകം ഇന്ത്യ വിടണമെന്ന് ആവശ്യപ്പെട്ട് ഫോറിനേഴ്സ് റീജിയണൽ രജിസ്ട്രേഷൻ ഓഫീസ് (എഫ്.ആർ.ആർ.ഒ) പുറപ്പെടുവിച്ച നോട്ടീസിനെതിരായ നിയമപോരാട്ടത്തിൽ ബോളിവുഡ് നടൻ ഇമ്രാൻ ഖാന് താൽക്കാലിക ആശ്വാസം. ഇമ്രാൻ ഖാൻ സമർപ്പിച്ച ഹർജി പരിഗണിക്കുന്നത് ബോംബെ ഹൈക്കോടതി നവംബർ രണ്ട് തിങ്കളാഴ്ച ഉച്ചയ്ക്ക് മൂന്നു മണിയിലേക്ക് മാറ്റി. കേന്ദ്ര സർക്കാരിന്റെ അഭിഭാഷകൻ കൂടുതൽ സമയം ആവശ്യപ്പെട്ടതിനെത്തുടർന്നാണിത്. എഫ്.ആർ.ആർ.ഒ അനുവദിച്ച സമയപരിധി അവസാനിക്കാൻ ഒരു ദിവസം മാത്രം ബാക്കിനിൽക്കെയാണ് കോടതിയുടെ ഈ ഇടപെടൽ.

യു.എസ് പൗരനും 'ഓവർസീസ് സിറ്റിസൺ ഓഫ് ഇന്ത്യ' (ഒ.സി.ഐ) കാർഡുടമയുമായ നടൻ തനിക്കെതിരെയുള്ള നോട്ടീസിനെ ചോദ്യം ചെയ്ത് ഹൈക്കോടതിയെ സമീപിക്കുകയായിരുന്നു. ചീഫ് ജസ്റ്റിസ് മഹേഷ് ചന്ദ്ര ത്രിപാഠി, ജസ്റ്റിസ് അദ്വൈത് സേത്ന എന്നിവരടങ്ങിയ ഡിവിഷൻ ബെഞ്ചാണ് കേസ് പരിഗണിച്ചത്. ഹർജിയിലെ വാദം കേൾക്കൽ തിങ്കളാഴ്ചത്തേക്ക് മാറ്റിവെക്കണമെന്ന് കേന്ദ്ര സർക്കാരിനുവേണ്ടി ഹാജരായ അഡിഷണൽ സോളിസിറ്റർ ജനറൽ (എ.എസ്.ജി) അനിൽ സിങ് അഭ്യർത്ഥിക്കുകയായിരുന്നു. അതുവരെ ഇമ്രാൻ ഖാനെതിരെ ഉടനടി നടപടികളൊന്നും ഉണ്ടാകില്ലെന്നും അദ്ദേഹം കോടതിക്ക് ഉറപ്പുനൽകി.

എഫ്.ആർ.ആർ.ഒ നോട്ടീസ് പ്രകാരം നടൻ തൊട്ടടുത്ത ദിവസം ഇന്ത്യ വിടേണ്ടതുണ്ടെന്ന് ഇമ്രാൻ ഖാന്റെ അഭിഭാഷകൻ കോടതിയുടെ ശ്രദ്ധയിൽപ്പെടുത്തിയെങ്കിലും, അടുത്ത വാദം കേൾക്കുന്നതുവരെ അദ്ദേഹം രാജ്യത്ത് തുടരുന്നതിൽ നടപടിയുണ്ടാകില്ലെന്ന് കേന്ദ്രം വ്യക്തമാക്കി. തുടർന്ന് കേസ് പരിഗണിക്കുന്നത് നവംബർ 2-ലേക്ക് മാറ്റിയ കോടതി, എഫ്.ആർ.ആർ.ഒ ഉത്തരവ് നടപ്പിലാക്കുന്നത് നീട്ടിവെച്ച് ഉത്തരവിട്ടു. ഒക്ടോബർ 10-ന് മുംബൈയിൽ എസ്.ഐ.ആറുമായി ബന്ധപ്പെട്ട് നടന്ന പ്രതിഷേധത്തിൽ ഇമ്രാൻ ഖാനെ പോലീസ് കസ്റ്റഡിയിലെടുത്തിരുന്നു. ഇതിന് പിന്നാലെ ഒക്ടോബർ 14-നാണ് ഇമിഗ്രേഷൻ ആന്റ് ഫോറിനേഴ്സ് ആക്ട് പ്രകാരം ഒക്ടോബർ 28-നകം ഇന്ത്യ വിടാൻ എഫ്.ആർ.ആർ.ഒ അദ്ദേഹത്തോട് ആവശ്യപ്പെട്ടത്.