"വോട്ടവകാശം ജീവിക്കാനുള്ള അവകാശം"; ഡൽഹിയിലെ എസ്.ഐ.ആർ ക്യാമ്പിൽ അപ്രതീക്ഷിത സന്ദർശനവുമായി രാഹുൽ ഗാന്ധി, വോട്ടർ പട്ടികയിൽ പുറത്തായവരുമായി നേരിട്ട് സംവദിച്ചു

ഡൽഹിയിലെ ത്രിലോക് പുരിയിലുള്ള എസ്.ഐ.ആർ ക്യാമ്പിൽ മുൻകൂട്ടി അറിയിക്കാതെ അപ്രതീക്ഷിത സന്ദർശനം നടത്തി രാഹുൽ ഗാന്ധി. വോട്ടർപട്ടികയുടെ പ്രത്യേക തീവ്ര പരിഷ്‌കരണവുമായി ബന്ധപ്പെട്ട് ആശങ്കകൾ ഉയരുന്നതിനിടെയാണ് അദ്ദേഹത്തിന്റെ ഈ നിർണായക സന്ദർശനം. മസ്ദൂർ കിസാൻ ശക്തി സംഘടന, വോട്ടർ അധികാര മഞ്ച് എന്നിവയുടെ നേതൃത്വത്തിൽ ത്രിലോക് പുരി ബ്ലോക്ക് 20-ൽ സംഘടിപ്പിച്ച "വോട്ട് അവകാശം ജീവിക്കാനുള്ള അവകാശം" എന്ന ജനസമ്പർക്ക പരിപാടിയിലാണ് രാഹുൽ പങ്കെടുത്തത്.

വോട്ടർപട്ടികയിൽ നിന്ന് പേരുകൾ നീക്കം ചെയ്യപ്പെട്ട സാധാരണക്കാരുമായും ദരിദ്രരുമായും അദ്ദേഹം നേരിട്ട് സംസാരിച്ചു. പേര് ഒഴിവാക്കപ്പെട്ടതിന്റെ കാരണങ്ങളും വോട്ടവകാശം പുനഃസ്ഥാപിക്കുന്നതുമായി ബന്ധപ്പെട്ട് ജനങ്ങൾ നേരിടുന്ന ബുദ്ധിമുട്ടുകളും അദ്ദേഹം ചോദിച്ചറിഞ്ഞു. രാഹുൽ ഗാന്ധിക്കൊപ്പം സി.പി.ഐ നേതാവ് ദീപങ്കർ ഭട്ടാചാര്യ, സ്വരാജ് ഇന്ത്യ നേതാവ് യോഗേന്ദ്ര യാദവ് എന്നിവരും ഈ ജനസമ്പർക്ക പരിപാടിയിൽ പങ്കാളികളായി.

തിരഞ്ഞെടുപ്പ് പ്രക്രിയകളിൽ അട്ടിമറി നടക്കുന്നുണ്ടെന്ന് ആരോപിച്ച രാഹുൽ ഗാന്ധി, ജനങ്ങളുടെ വോട്ടവകാശം സംരക്ഷിക്കാനായി പ്രതിപക്ഷം ശക്തമായി പോരാടുമെന്ന് ഉറപ്പുനൽകി. വോട്ടർ പട്ടികയിലെ ക്രമക്കേടുകൾക്കെതിരെ കോൺഗ്രസും ഇന്ത്യ സഖ്യവും രാജ്യതലസ്ഥാനത്ത് പ്രതിഷേധങ്ങൾ ശക്തമാക്കുന്ന സാഹചര്യത്തിൽ, ത്രിലോക് പുരിയിലെ രാഹുലിന്റെ ഈ അപ്രതീക്ഷിത സന്ദർശനം വലിയ രാഷ്ട്രീയ പ്രാധാന്യമാണ് നേടുന്നത്.