ജനാധിപത്യം സംരക്ഷിക്കാനും വോട്ട് മോഷണം തടയാനും ഭരണഘടനയെ കാത്തുസൂക്ഷിക്കാനുമായി രാംലീല മാർച്ചിലേക്ക് അണിനിരക്കാൻ ആഹ്വാനം ചെയ്ത് രാഹുൽ ഗാന്ധി. സോഷ്യൽ മീഡിയയിലൂടെ പങ്കുവെച്ച വീഡിയോ സന്ദേശത്തിലാണ് അദ്ദേഹം ഇക്കാര്യം വ്യക്തമാക്കിയത്. ഇത് ഏതെങ്കിലും ഒരു രാഷ്ട്രീയ പാർട്ടിയുടെ മാത്രം മാർച്ചല്ലെന്നും മറിച്ച് ഹിന്ദുസ്ഥാന്റെ ആത്മാവിന്റെ മാർച്ചാണെന്നും അദ്ദേഹം അഭിപ്രായപ്പെട്ടു. നരേന്ദ്ര മോദി, അമിത് ഷാ, ഗ്യാനേഷ് കുമാർ എന്നിവരുടെ ഭരണരീതികളിൽ മടുത്തവരും ജനാധിപത്യത്തെയും ഭരണഘടനയെയും സംരക്ഷിക്കാൻ ആഗ്രഹിക്കുന്നവരുമായ ഏവരും ഒന്നിക്കണമെന്നും, ഇതൊരു ഒറ്റപ്പെട്ട പ്രതിഷേധമല്ല മറിച്ച് രാജ്യത്തിനു വേണ്ടിയുള്ള പോരാട്ടമാണെന്നും അദ്ദേഹം കൂട്ടിച്ചേർത്തു.
പോലീസിനെയോ അവരുടെ ലാത്തികളെയോ ഓർത്ത് ഒട്ടും ആശങ്കപ്പെടേണ്ടതില്ലെന്നും അനാവശ്യ തന്ത്രങ്ങളുമായി രംഗത്തുവരാൻ ബിജെപിക്ക് ഇനി ധൈര്യമുണ്ടാകില്ലെന്നും രാഹുൽ ഗാന്ധി വ്യക്തമാക്കുന്നു. ഭരണഘടനയെയും ഭാരതമെന്ന മഹാരാഷ്ട്രത്തെയും സംരക്ഷിക്കാൻ ഒന്നിച്ചു മുന്നേറാമെന്നും ഭയപ്പെടേണ്ട യാതൊരു ആവശ്യവുമില്ലെന്നും അദ്ദേഹം ആഹ്വാനം ചെയ്തു. രാഷ്ട്രീയ വ്യത്യാസങ്ങൾ മാറ്റിവെച്ച് എല്ലാ വിദ്യാർത്ഥി സംഘടനകളും മാർച്ചിൽ പങ്കാളികളാകണം. ഇന്ത്യയും നിങ്ങളുടെ അഭിപ്രായസ്വാതന്ത്ര്യവും ആശയങ്ങളും ചിന്താരീതികളും കടന്നാക്രമിക്കപ്പെടുന്നുവെന്ന് തോന്നുന്നുവെങ്കിൽ മുന്നോട്ടുവന്ന് ഒപ്പം ചേരുക. ഇതൊരു ഗംഭീര മാർച്ചും രാജ്യത്തിന്റെ ആത്മാവിനു വേണ്ടിയുള്ള പോരാട്ടവുമായിരിക്കുമെന്നും, രാംലീല മൈതാനത്ത് എല്ലാവരെയും നേരിൽ കാണാമെന്ന പ്രതീക്ഷയോടെയുമാണ് അദ്ദേഹം വീഡിയോ അവസാനിപ്പിക്കുന്നത്.
