സിപിഎം വിപുലീകൃത പത്തനംതിട്ട ജില്ലാ കമ്മിറ്റി യോഗത്തിന് പിന്നാലെ പാർട്ടിയിൽ വിഭാഗീയതയും അമർഷവും രൂക്ഷമാകുന്നു. ജില്ലാ കമ്മിറ്റിയിലേക്ക് പ്രത്യേക ക്ഷണിതാക്കളെ തെരഞ്ഞെടുത്തതിൽ ഉയർന്ന കടുത്ത അതൃപ്തിയെ തുടർന്ന് മുൻ മന്ത്രി എ.കെ. ബാലൻ, മന്ത്രി വി. ശിവൻകുട്ടി എന്നിവരുടെ പേഴ്സണൽ സ്റ്റാഫ് അംഗമായിരുന്ന ടിം ടൈറ്റസ് പാർട്ടി സ്ഥാനങ്ങൾ രാജിവെച്ചു. കോഴഞ്ചേരി ഏരിയ കമ്മിറ്റിയംഗവും കോയിപ്രം ബ്ലോക്ക് പഞ്ചായത്ത് അംഗവുമായ ടിം ടൈറ്റസിന്റെ രാജി ജില്ലാ നേതൃത്വത്തെ വലിയ പ്രതിസന്ധിയിലാക്കിയിട്ടുണ്ട്.
ജില്ലാ കമ്മിറ്റിയുടെ തീരുമാനങ്ങൾക്കെതിരെ കീഴ്ഘടകങ്ങളിൽ പ്രതിഷേധം ശക്‌തമായതോടെ പലയിടത്തും ഏരിയ കമ്മിറ്റി യോഗങ്ങൾ പോലും ചേരാൻ സാധിക്കാത്ത അവസ്ഥയാണുള്ളത്. ഇരവിപേരൂർ ഏരിയ കമ്മിറ്റി യോഗത്തിൽ പങ്കെടുക്കാൻ വെറും 5 പേർ മാത്രമാണ് എത്തിയത്. കൂടാതെ, അർഹരായവരെ തളളി അനർഹരെ ജില്ലാ നേതൃത്വത്തിലേക്ക് തിരികെ കയറ്റിയെന്ന് ആരോപിച്ച് തിരുവല്ല ഏരിയ കമ്മിറ്റിയിൽ നിന്നും സിപിഎം സംസ്ഥാന നേതൃത്വത്തിന് പരാതികളുടെ പ്രളയമാണ് ലഭിക്കുന്നത്.
അതേസമയം, ബിജെപിയിൽ നിന്നും പാർട്ടിയിലെത്തിയ വ്യക്തിയെ ജില്ലാ കമ്മിറ്റിയിൽ ക്ഷണിതാവാക്കിയ നടപടി പന്തളം ഏരിയ കമ്മിറ്റിയിലും വൻ പുകച്ചിലിന് വഴിവെച്ചിട്ടുണ്ട്. ഇതിൽ പ്രതിഷേധിച്ച് പന്തളം ഏരിയയിൽ പ്രാദേശിക നേതാക്കളുടെയും പ്രവർത്തകരുടെയും പരസ്യ പ്രതിഷേധം ശക്തമായി തുടരുകയാണ്. ജില്ലാ നേതൃത്വത്തിന്റെ തെരഞ്ഞെടുപ്പിലെ അപക്വമായ തീരുമാനങ്ങളാണ് പാർട്ടിയിൽ ഇത്രയും വലിയ പൊട്ടിത്തെറിക്ക് കാരണമായതെന്ന വിലയിരുത്തലിലാണ് ഒരു വിഭാഗം നേതാക്കൾ.
