തിരുവനന്തപുരം: ബംഗാള് ഉള്ക്കടലില് പുതിയ ന്യൂനമര്ദ്ദം രൂപപ്പെട്ടു. തെക്കുകിഴക്കന് ബംഗാള് ഉള്ക്കടലില് രൂപപ്പെട്ട ന്യൂനമര്ദ്ദം നാളെയോടെ ശക്തി കൂടിയ ന്യൂനമര്ദ്ദമായും നവംബര് 15-ഓടെ തീവ്ര ന്യൂനമര്ദ്ദമായും രൂപപ്പെടുമെന്നാണ് മുന്നറിയിപ്പ്. തീവ്ര ന്യൂനമര്ദ്ദം വടക്ക് - വടക്കുപടിഞ്ഞാറന് ദിശയില് നീങ്ങി, നവംബര് 16-ന് വൈകുന്നേരത്തോടെ മധ്യ ബംഗാള് ഉള്ക്കടലില് ചുഴലിക്കാറ്റായി കൂടുതല് ശക്തിപ്രാപിക്കാന് സാധ്യതയെന്നു കേന്ദ്ര കാലാവസ്ഥ വകുപ്പ് അറിയിച്ചു.
മധ്യ കിഴക്കന് അറബിക്കടലിലും സമീപ വടക്കന് ലക്ഷദ്വീപ് പ്രദേശങ്ങള്ക്കും മുകളില് ചക്രവാതചുഴി തുടരുന്നു. ഇതിന്റെ ഫലമായി നവംബര് 13 മുതല് 17 വരെ കേരളത്തില് ഒറ്റപ്പെട്ട സ്ഥലങ്ങളില് നേരിയ / ഇടത്തരം മഴയ്ക്ക് സാധ്യതയുണ്ട്.
ന്യൂനമര്ദ്ദത്തിന്റെ ഭാഗമായി ശക്തമായ കാറ്റിനും മോശം കാലാവസ്ഥയ്ക്കും സാധ്യതയുള്ളതിനാല് (13/11/2026 മുതല് 17/11/2026 വരെ) ബംഗാള് ഉള്ക്കടലില് യാതൊരു കാരണവശാലും മല്സ്യബന്ധനത്തിനായി പോകാൻ പാടുള്ളതല്ല. ഈ പ്രദേശങ്ങളില് ആഴക്കടലില് മല്സ്യബന്ധനത്തില് ഏര്പ്പെട്ടിട്ടുള്ള മല്സ്യത്തൊഴിലാളികള് എത്രയും വേഗം കരയിലേക്ക് തിരിച്ചെത്തണമെന്നും കാലാവസ്ഥാ വകുപ്പ് കർശന മുന്നറിയിപ്പ് നൽകിയിട്ടുണ്ട്.
ബംഗാള് ഉള്ക്കടലില് പുതിയ ന്യൂനമര്ദ്ദം രൂപപ്പെട്ടു; കേരളത്തിൽ നവംബർ 17 വരെ മഴയ്ക്ക് സാധ്യത