ഡൽഹിയിൽ പ്രതിപക്ഷ എം.പിമാർ നടത്തിയ പ്രതിഷേധത്തിനിടയിലെ കസ്റ്റഡിയും തിരഞ്ഞെടുപ്പ് കമ്മീഷന്റെ പ്രവർത്തനരീതികളും രാജ്യത്തെ ജനാധിപത്യ സ്ഥാപനങ്ങളുടെ വീഴ്ചയെയാണ് കാണിക്കുന്നതെന്ന് മുതിർന്ന കോൺഗ്രസ് നേതാവ് സച്ചിൻ പൈലറ്റ് ആരോപിച്ചു. കോൺഗ്രസ് വാർ റൂമിൽ മാധ്യമങ്ങളെ കണ്ട അദ്ദേഹം, രാഹുൽ ഗാന്ധി, പ്രിയങ്ക ഗാന്ധി തുടങ്ങിയ മുതിർന്ന നേതാക്കളുടെ നേതൃത്വത്തിൽ തിരഞ്ഞെടുപ്പ് കമ്മീഷന്റെ ജനാധിപത്യപരമായ ഉത്തരവാദിത്തം ആവശ്യപ്പെട്ട് നടന്ന പ്രതിഷേധങ്ങളെ കൈകാര്യം ചെയ്ത രീതിയെ രൂക്ഷമായി വിമർശിച്ചു. തിരഞ്ഞെടുപ്പ് പാനലിനെ കാണാനെത്തിയ പ്രതിപക്ഷ പ്രതിനിധികളെ ചർച്ചയ്ക്ക് അനുവദിക്കാതെ കസ്റ്റഡിയിലെടുത്ത നടപടി ഏകാധിപത്യപരമായ സമീപനമാണെന്നും ജനാധിപത്യ സ്ഥാപനങ്ങൾ ചർച്ചകൾക്കായി തുറന്നിരിക്കണമെന്നും അദ്ദേഹം ചൂണ്ടിക്കാട്ടി.
വോട്ടുപട്ടിക പരിഷ്കരണ പ്രക്രിയയിലൂടെ ലക്ഷക്കണക്കിന് വോട്ടർമാരെ ഒഴിവാക്കാൻ സാധ്യതയുണ്ടെന്ന് പൈലറ്റ് മുന്നറിയിപ്പ് നൽകി. വോട്ടവകാശത്തിന്മേലുള്ള ഈ കടന്നുകയറ്റത്തെ നോട്ടുനിരോധനത്തോട് ഉപമിച്ച് 'വോട്ടുബന്ദി' എന്ന് വിശേഷിപ്പിച്ച അദ്ദേഹം, വിഷയം അടിയന്തിരമായി പരിഹരിക്കണമെന്ന് ആവശ്യപ്പെട്ടു. അടുത്തിടെ സമാപിച്ച രാജസ്ഥാൻ നഗരസഭ തിരഞ്ഞെടുപ്പിൽ ഔദ്യോഗിക ഫലത്തേക്കാൾ മികച്ച പ്രകടനമാണ് കോൺഗ്രസ് കാഴ്ചവെച്ചതെന്നും പാർട്ടിക്ക് ഉയർന്ന വോട്ട് വിഹിതം ലഭിച്ചിട്ടുണ്ടെന്നും അദ്ദേഹം അവകാശപ്പെട്ടു. വോട്ട് വിഹിതത്തിൽ മുന്നിലെത്തിയതിനാൽ ബി.ജെ.പി ജയിച്ചിട്ടും തോറ്റെന്നും കോൺഗ്രസ് തോറ്റെങ്കിലും ജയിച്ചെന്നുമാണ് തനിക്ക് പറയാനുള്ളതെന്ന് അദ്ദേഹം വ്യക്തമാക്കി.
തദ്ദേശ തിരഞ്ഞെടുപ്പിൽ ഭരണതലത്തിൽ വ്യാപക ക്രമക്കേടുകൾ നടന്നതായി വിവിധ ജില്ലകളിൽ നിന്ന് പരാതികൾ ലഭിച്ചിട്ടുണ്ടെന്ന് പൈലറ്റ് ആരോപിച്ചു. ഈ തിരഞ്ഞെടുപ്പ് ഫലങ്ങൾ വിശകലനം ചെയ്ത പാർട്ടി, വരാനിരിക്കുന്ന പഞ്ചായത്തീരാജ് തിരഞ്ഞെടുപ്പിനായി ഒറ്റക്കെട്ടായി ഒരുങ്ങുകയാണ്. പഞ്ചായത്ത് തിരഞ്ഞെടുപ്പിൽ കോൺഗ്രസിന് വൻ ഭൂരിപക്ഷം ലഭിക്കുമെന്ന് പ്രത്യാശ പ്രകടിപ്പിച്ച അദ്ദേഹം, ഇതിനായി രാജസ്ഥാനിലെ ഗ്രാമങ്ങളും മണ്ഡലങ്ങളും കേന്ദ്രീകരിച്ച് രണ്ടുമാസത്തെ ജനസമ്പർക്ക പരിപാടി സംഘടിപ്പിക്കുമെന്നും അറിയിച്ചു.
തൊഴില്ലായ്മ, കർഷകരുടെ പ്രശ്നങ്ങൾ, ക്ഷേമപദ്ധതികളുടെ നടത്തിപ്പ്, ഡി.എ.പി (DAP) വളത്തിന്റെ രൂക്ഷമായ ക്ഷാമം എന്നിവയിലൂന്നിയായിരിക്കും വരാനിരിക്കുന്ന പ്രചാരണം. സംസ്ഥാത്ത് പോലീസിന്റെ കാവലിൽ ഡി.എ.പി വളം വിതരണം ചെയ്യേണ്ട ഗതികേടാണുള്ളതെന്നും സർക്കാർ ഇത് കണ്ടില്ലെന്ന് നടിക്കുകയാണെന്നും അദ്ദേഹം കുറ്റപ്പെടുത്തി. വോട്ടവകാശ സംരക്ഷണവും പ്രാദേശിക വിഷയങ്ങളും മുൻനിർത്തി നടത്തുന്ന ഈ ശക്തമായ പ്രചാരണം പഞ്ചായത്ത് തിരഞ്ഞെടുപ്പിൽ കോൺഗ്രസിന് വൻ വിജയം സമ്മാനിക്കുമെന്നും, അത് 2028-ലെ രാജസ്ഥാൻ നിയമസഭാ തിരഞ്ഞെടുപ്പിന് വലിയ ഊർജ്ജമാകുമെന്നും സച്ചിൻ പൈലറ്റ് കൂട്ടിച്ചേർത്തു.
