തിരുവനന്തപുരം: കേരള സംസ്ഥാന ചലച്ചിത്ര വികസന കോര്‍പ്പറേഷന്‍ (കെ.എസ്.എഫ്.ഡി.സി) പുതിയ ചെയര്‍മാനായി നടന്‍ പ്രേംകുമാര്‍ ചുമതലയേറ്റു. ഒരു പദവി എന്നതിനപ്പുറം സര്‍ക്കാര്‍ ഏല്‍പ്പിച്ച വലിയൊരു ഉത്തരവാദിത്തമായാണ് ഈ ചുമതലയെ കാണുന്നതെന്ന് അദ്ദേഹം പ്രതികരിച്ചു.
'ഈ ചുമതല എനിക്ക് ലഭിച്ചത് ഒരു ദൈവീക നീതിയായി കരുതുന്നു. സിനിമാ മേഖല ഒരുപാട് പ്രതിസന്ധികള്‍ നേരിടുന്ന ഈ കാലഘട്ടത്തില്‍, ഇത്രയും നിര്‍ണായകമായൊരു ചുമതല എന്നെ വിശ്വസിച്ചേല്‍പ്പിച്ചതില്‍ ഏറെ സന്തോഷവും അതോടൊപ്പം വലിയ ഉത്തരവാദിത്തബോധവുമുണ്ട്,' സ്ഥാനമേറ്റെടുത്ത ശേഷം പ്രേംകുമാര്‍ മാധ്യമങ്ങളോട് പറഞ്ഞു.
മലയാള സിനിമാ വ്യവസായം നേരിടുന്ന പ്രതിസന്ധികള്‍ പരിഹരിക്കുന്നതിനും, സ്വതന്ത്ര സിനിമകളെയും പുതിയ സിനിമാപ്രവര്‍ത്തകരെയും പ്രോത്സാഹിപ്പിക്കുന്നതിനും ആവശ്യമായ ഇടപെടലുകള്‍ നടത്തുമെന്നും അദ്ദേഹം കൂട്ടിച്ചേര്‍ത്തു.
