ന്യൂഡല്‍ഹി: 'ഓപ്പറേഷന്‍ സിന്ദൂര്‍' സൈനിക നീക്കത്തിനിടെ പാകിസ്താന്റെ ദൗത്യവിമാനത്തെ ഇന്ത്യയുടെ എസ്-400 (S-400) മിസൈല്‍ പ്രതിരോധ സംവിധാനം തകര്‍ത്തത് 314 കിലോമീറ്റര്‍ അകലെവെച്ചാണെന്ന് വിവരങ്ങള്‍. ഇത്രയും ദൂരപരിധിയില്‍ നിന്ന് ഒരു വ്യോമലക്ഷ്യം തകര്‍ക്കുന്നത് ആഗോളതലത്തില്‍ തന്നെ അപൂര്‍വ്വവും ചരിത്രപരവുമായ നേട്ടമാണ്. പ്രതിരോധ മന്ത്രാലയം പുറത്തിറക്കിയ വാര്‍ഷിക റിപ്പോര്‍ട്ടിലാണ് ഓപ്പറേഷന്‍ സിന്ദൂറില്‍ എസ്-400 വഹിച്ച നിര്‍ണായക പങ്കിനെക്കുറിച്ച് വ്യക്തമാക്കുന്നത്.
പാക് വ്യോമസേനയുടെ സവിശേഷ ദൗത്യമേറ്റെടുത്ത എയര്‍ക്രാഫ്റ്റാണ് ഇന്ത്യന്‍ അതിര്‍ത്തി കടക്കുംമുന്‍പ് എസ്-400-ന്റെ ഇരയായത്. ഈ വ്യോമാക്രമണത്തെ 'ഏറ്റവും ദൈര്‍ഘ്യമേറിയ ഭൂതല-വ്യോമ സംഹാരം' എന്നാണ് റിപ്പോര്‍ട്ടില്‍ വിശേഷിപ്പിച്ചിരിക്കുന്നത്. അത്യാധുനിക റഡാറുകള്‍ വഴി ശത്രുവിമാനത്തിന്റെ ഭീഷണി കൃത്യമായി തിരിച്ചറിഞ്ഞ ശേഷമായിരുന്നു ഈ ദീര്‍ഘദൂര ആക്രമണം.
പഹല്‍ഗാം ഭീകരാക്രമണത്തിന് മറുപടിയായി പാകിസ്താനിലെ ഭീകരകേന്ദ്രങ്ങളെ ലക്ഷ്യമിട്ടാണ് ഇന്ത്യ ഓപ്പറേഷന്‍ സിന്ദൂര്‍ ആരംഭിച്ചത്. എന്നാല്‍ ഇന്ത്യയെ ലക്ഷ്യമിട്ട് പാകിസ്താന്‍ തിരിച്ചടിക്ക് മുതിര്‍ന്നതോടെയാണ് എസ്-400 മിസൈല്‍ യൂണിറ്റുകള്‍ പ്രവര്‍ത്തനക്ഷമമാക്കിയത്. ഭൂമിയിലോ ആകാശത്തോ ഇന്ത്യന്‍ വ്യോമസേനയ്ക്ക് എത്തിപ്പെടാന്‍ സാധിക്കാത്ത ഒരു മേഖലയും ഇന്ന് നിലവിലില്ലെന്ന് വാര്‍ഷിക റിപ്പോര്‍ട്ട് വ്യക്തമാക്കുന്നു.
ഓപ്പറേഷന്‍ സിന്ദൂറില്‍ ചരിത്രം കുറിച്ച് ഇന്ത്യ: പാക് വിമാനം എസ്-400 മിസൈല്‍ തകര്‍ത്തത് 314 കിലോമീറ്റര്‍ അകലെവെച്ച്; ആദ്യം
Jaihind TV News Report
Jaihind TV Web Desk
Updated Oct 12, 2026
2 min read
1,075 reads
