വിമാന യാത്രയ്ക്കിടെ എം.എസ്. ധോണിയെ കണ്ട് ഇൻഡിഗോ എയർ ഹോസ്റ്റസ്; 'ക്യാപ്റ്റൻ കൂളിന്റെ' ഉപദേശം വൈറലാകുന്നു

ന്യൂഡൽഹി: ഇന്ത്യൻ ക്രിക്കറ്റ് ടീമിന്റെ എക്കാലത്തെയും മികച്ച ക്യാപ്റ്റൻമാരിലൊരാളായ എം.എസ്. ധോണിയെ യാത്രാമധ്യേ കണ്ടുമുട്ടിയതിന്റെ സന്തോഷം പങ്കുവെച്ച് ഇൻഡിഗോ എയർ ഹോസ്റ്റസായ ഐശ്വര്യ സിങ്. ജോലിത്തിരക്കുകളെക്കുറിച്ചും കടുപ്പമേറിയ പ്രവൃത്തിദിനങ്ങളെക്കുറിച്ചും പരാതിപ്പെട്ട തനിക്ക് ധോണി നൽകിയ വിലയേറിയ ഉപദേശവും ആ നിമിഷങ്ങൾ സമ്മാനിച്ച സന്തോഷവുമാണ് ഐശ്വര്യ സമൂഹമാധ്യമങ്ങളിലൂടെ പങ്കുവെച്ചിരിക്കുന്നത്. ഇൻസ്റ്റഗ്രാമിൽ മാത്രം 18 ലക്ഷത്തിലധികം ആളുകളാണ് ഈ വിഡിയോ ഇതിനോടകം കണ്ടുകഴിഞ്ഞത്.

തന്റെ വിമാനത്തിൽ എം.എസ്. ധോണി അതിഥിയായി എത്തിയതിന്റെ ആവേശം പങ്കുവെച്ച ഐശ്വര്യ, കളിക്കളത്തിന് പുറത്തും ആ മനുഷ്യൻ എത്രത്തോളം ലളിതമാണെന്ന് വ്യക്തമാക്കുന്നു. വിമാന ജോലിയുടെ കഠിനമായ തിരക്കുകളെക്കുറിച്ച് സംസാരിച്ചപ്പോൾ, വളരെ ശാന്തനായി ആ വാക്കുകൾ കേട്ട ധോണി, തിരക്കുപിടിച്ച പ്രവൃത്തിദിനങ്ങളിലെ മാനസിക സമ്മർദങ്ങളെ എങ്ങനെ ലഘൂകരിച്ച് നേരിടാമെന്ന് ചില ഉപദേശങ്ങൾ നൽകുകയായിരുന്നു. ഗൗരവമുള്ള ചർച്ചകൾക്ക് പുറമെ വിമാനയാത്രയുമായി ബന്ധപ്പെട്ട് അദ്ദേഹം പറഞ്ഞ ചെറിയ തമാശകളും യാത്രക്കാർക്കും ജീവനക്കാർക്കും വലിയ മാനസിക ആശ്വാസമാണ് നൽകിയത്.

ജീവിതത്തിലെ ഏറ്റവും വലിയ സ്വപ്നം സാക്ഷാത്കരിച്ച നിമിഷം എന്നാണ് ഐശ്വര്യ ഈ കൂടിക്കാഴ്ചയെ വിശേഷിപ്പിച്ചത്. നിങ്ങള്‍ എക്കാലത്തെയും വലിയ ഭാഗ്യവതിയാണെന്നും ഒരിക്കൽ അദ്ദേഹത്തെ നേരിൽ കാണാൻ ആഗ്രഹിക്കുന്നുവെന്നും വ്യക്തമാക്കി നിരവധി ആരാധകരാണ് ഇതിനകം കമന്റുകളുമായി രംഗത്തെത്തിയിരിക്കുന്നത്.