സംസ്ഥാനത്ത് വീണ്ടും ശക്തമായ മഴയ്ക്ക് സാധ്യത; പത്തനംതിട്ടയും ഇടുക്കിയുമടക്കം വിവിധ ജില്ലകളിൽ യെല്ലോ അലർട്ട്

തെക്കൻ തായ്‌ലൻഡിനും സമീപമുള്ള മ്യാൻമറിനും മുകളിലായി രൂപപ്പെട്ട ചക്രവാതച്ചുഴിയുടെ സ്വാധീനത്താൽ സംസ്ഥാനത്ത് വരും ദിവസങ്ങളിൽ മഴ വീണ്ടും കനക്കുമെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകി. ഇതിന്റെ അടിസ്ഥാനത്തിൽ ബുധനാഴ്ച പത്തനംതിട്ട, ഇടുക്കി ജില്ലകളിലും വ്യാഴാഴ്ച കോട്ടയം, എറണാകുളം, ഇടുക്കി ജില്ലകളിലും യെല്ലോ അലർട്ട് പ്രഖ്യാപിച്ചിട്ടുണ്ട്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ ലഭിക്കുന്ന ശക്തമായ മഴയ്ക്കൊപ്പം ഇടിമിന്നലിനും മണിക്കൂറിൽ 30 മുതൽ 40 കിലോമീറ്റർ വരെ വേഗതയുള്ള ശക്തമായ കാറ്റിനും സാധ്യതയുണ്ട്.

നിലവിലെ ചക്രവാതച്ചുഴി തിങ്കളാഴ്ചയോടെ വടക്കൻ ആൻഡമാൻ കടലിന് മുകളിലേക്ക് എത്തുമായിരിക്കും. തുടർന്ന് വടക്ക്-പടിഞ്ഞാറൻ ദിശയിൽ നീങ്ങി വടക്കുകിഴക്കൻ ബംഗാൾ ഉൾക്കടലിലേക്ക് എത്തുന്നതോടെയാണ് വരും ദിവസങ്ങളിൽ സംസ്ഥാനത്തുടനീളം മഴ വ്യാപകമാകുന്നത്.

മഴ മുന്നറിയിപ്പിന് പുറമെ, കേരളത്തിലെ മുഴുവൻ തീരദേശ ജില്ലകളിലും ദേശീയ സമുദ്രവിവര വിശകലന കേന്ദ്രം (INCOIS) 'കള്ളക്കടൽ' പ്രതിഭാസത്തെ തുടർന്ന് റെഡ് അലർട്ട് പ്രഖ്യാപിച്ചിട്ടുണ്ട്. നാളെ രാവിലെ 10.30 വരെ തീരത്ത് 1.0 മുതൽ 1.5 മീറ്റർ വരെ ഉയർന്ന തിരമാലകൾക്കും കടലാക്രമണത്തിനും സാധ്യതയുണ്ട്. തിരുവനന്തപുരത്തെ കാപ്പിൽ മുതൽ കാസർകോട്ടെ കുഞ്ചത്തൂർ വരെയുള്ള മുഴുവൻ തീരദേശ താഴ്ന്ന മേഖലകളിലും വെള്ളം കയറാൻ സാധ്യതയുള്ളതിനാൽ ജനങ്ങൾ പ്രത്യേക ജാഗ്രത പാലിക്കണമെന്ന് അധികൃതർ നിർദേശിച്ചു.