പ്രധാനമന്ത്രി നരേന്ദ്ര മോദിക്കെതിരെ ശക്തമായ പരിഹാസവും വിമർശനവുമായി സിജെപി സ്ഥാപകൻ അഭിജീത് ദിപ്കെ. പ്രധാനമന്ത്രി പദവി ഒഴിഞ്ഞ് മോദി സമൂഹമാധ്യമങ്ങളിലെ 'ഇൻഫ്ലുവൻസർ' ആകുന്നതാണ് നല്ലതെന്ന് ദിപ്കെ വിമർശിച്ചു. യുവാക്കളെ ലക്ഷ്യമിട്ടുള്ള മോദിയുടെ ഇൻസ്റ്റഗ്രാം വീഡിയോകളെ പരാമർശിച്ചായിരുന്നു അദ്ദേഹത്തിന്റെ പ്രതികരണം. മഹാരാഷ്ട്രയിലെ ജന്മനാട്ടിലേക്കുള്ള യാത്രയ്ക്കിടെ മാധ്യമങ്ങളോട് സംസാരിക്കവെ, "ഒരു ഇൻഫ്ലുവൻസർ ആകാനാണ് അദ്ദേഹത്തിന് കൂടുതൽ താല്പര്യമെന്ന് തോന്നുന്നു, അത് അദ്ദേഹം നന്നായി ചെയ്യുന്നുമുണ്ട്" എന്ന് ദിപ്കെ കുറ്റപ്പെടുത്തി.
പരീക്ഷാ തട്ടിപ്പ് ബില്ലിനെക്കുറിച്ചുള്ള പ്രതികരണം
പരീക്ഷാ തട്ടിപ്പുകാർക്കുള്ള ശിക്ഷ കടുപ്പിക്കുന്നതിനായി ലോക്‌സഭ പാസാക്കിയ പുതിയ ഭേദഗതി ബില്ലിനെയും സിജെപി സ്ഥാപകൻ നിശിതമായി വിമർശിച്ചു. രാജ്യത്ത് ഒന്നിനു പുറകെ ഒന്നായി പുതിയ നിയമങ്ങൾ പാസാക്കുന്നുണ്ടെങ്കിലും, ആളുകളുടെ ഉദ്ദേശ്യവും നിലപാടുകളും മാറാത്തിടത്തോളം കാലം ഒരു മാറ്റവും ഉണ്ടാകാൻ പോകുന്നില്ലെന്ന് അദ്ദേഹം പറഞ്ഞു. കേവലം നിയമങ്ങൾ ഉണ്ടാക്കുന്നതിന് പകരം അവ കൃത്യമായി നടപ്പിലാക്കിയാൽ മാത്രമേ നിലവിലെ പ്രശ്നങ്ങൾക്ക് ശാശ്വത പരിഹാരമാകൂ എന്നും അഭിജീത് ദിപ്കെ കൂട്ടിച്ചേർത്തു.
