കോഴിക്കോട് കോർപ്പറേഷനിലെ കുറ്റിച്ചിറ വാർഡിൽ നടന്ന ഉപതിരഞ്ഞെടുപ്പിൽ യു.ഡി.എഫ് സ്ഥാനാർത്ഥി ഫർസീന അറക്കൽ 436 വോട്ടുകളുടെ ഭൂരിപക്ഷത്തിൽ മിന്നുന്ന വിജയം നേടി. എൽ.ഡി.എഫിന്റെയും ബി.ജെ.പിയുടെയും പ്രചാരണങ്ങളെ മറികടന്നാണ് യു.ഡി.എഫ് സ്ഥാനാർത്ഥിയുടെ ഈ മുന്നേറ്റം. മുൻപ് ഈ ഡിവിഷനെ പ്രതിനിധീകരിച്ചിരുന്ന ഫാത്തിമ തഹ്ലിയ പേരാമ്പ്രയിൽ നിന്ന് നിയമസഭാംഗമായി തിരഞ്ഞെടുക്കപ്പെട്ടതിനെ തുടർന്ന് രാജിവെച്ച ഒഴിവിലേക്കാണ് ഇവിടെ ഉപതിരഞ്ഞെടുപ്പ് നടന്നത്. കോഴിക്കോട് ജില്ലയിൽ ഉപതിരഞ്ഞെടുപ്പ് നടന്ന ഏക ഡിവിഷൻ കൂടിയായിരുന്നു കുറ്റിച്ചിറ.
യു.ഡി.എഫിന് വേണ്ടി ഫർസീന അറക്കലും എൽ.ഡി.എഫിന് വേണ്ടി ടി.ടി. ജംഷീനയും ബി.ജെ.പിക്കായി ജീജ കെ.യുമാണ് ഇവിടെ മത്സരരംഗത്തുണ്ടായിരുന്നത്. ശക്തമായ പ്രചാരണങ്ങൾ നടന്ന മത്സരത്തിൽ യു.ഡി.എഫിന്റെ കുത്തക സീറ്റ് തിരിച്ചുപിടിക്കാൻ എൽ.ഡി.എഫിന് കഴിഞ്ഞില്ല. അതേസമയം, കഴിഞ്ഞ തവണ ഫാത്തിമ തഹ്ലിയ നേടിയ രണ്ടായിരത്തിലധികം വോട്ടുകളുടെ ഭൂരിപക്ഷത്തിലേക്ക് എത്തുവാൻ ഇത്തവണ ഫർസീനയ്ക്ക് കഴിഞ്ഞില്ല. പോളിങ് ശതമാനത്തിലുണ്ടായ വലിയ കുറവാണ് ഭൂരിപക്ഷം കുറയാൻ ഇടയാക്കിയതെന്നാണ് പ്രാഥമിക വിലയിരുത്തൽ.
വാശിപോരാട്ടത്തിനൊടുവിൽ യു.ഡി.എഫിലെ ഫർസീന അറക്കൽ 2,681 വോട്ടുകൾ നേടി വിജയിച്ചപ്പോൾ, എൽ.ഡി.എഫ് സ്ഥാനാർത്ഥി ടി.ടി. ജംഷീനയ്ക്ക് 2,275 വോട്ടുകളും ബി.ജെ.പി സ്ഥാനാർത്ഥി ജീജ കെ.യ്ക്ക് 204 വോട്ടുകളും ലഭിച്ചു. സംസ്ഥാനത്ത് ഉപതിരഞ്ഞെടുപ്പ് നടന്ന വാർഡുകളിൽ ഏറ്റവും കുറഞ്ഞ പോളിംഗ് രേഖപ്പെടുത്തിയത് കുറ്റിച്ചിറയിലാണ്; 56.22 ശതമാനം പോളിംഗ് മാത്രമാണ് ഇവിടെ രേഖപ്പെടുത്തിയത്.
